حقن سيولة الدم

[Abeer89]

السلام عليكم و رحمة الله و بركاته

يا اخواتي من اخبارتكم أبي استفيد. أول حمل حملت بتوأم لكن نبضهم وقف و هم شهرين و نزلتهم بعد شهر كمان. الان ولله الحمد بعد مرور شهرين من الاجهاض حامل ثاني تقريباكملت شهر الان. رحت أراجع عند دكتوره في مستوصف و أنا مقيمه في جده. سألتني عن التوأم و قالت لا غريبه يموتوا في نفس الوقت و أكيد المشكله في أنا.

بعد التحاليل طلعتلي كل مشاكل الحمل في و مافي كريم غسول او علاج لاي شي صغير الا و اعطتني اياه. اعطتني مثبت حمل و اخذ اسبرين يوميا و بعد تحليل سيولة الدم طلع عندي ضعف خفيف فيه و قالتلي لازم اخذ حقن يوميا.

المهم زوجي ما ارتاحلها حس انها بتعمل دعايه للأدوية. قال نروح نشوف دكتور ثاني. رحت عند الدكتور أنس المرزوقي في الأطباء المتحدون و شاف التحاليل قاللي نص هالتحاليل مالها داعي و ثلاثة أرباع الأدويه مالها لزوم. قاللي مو مشكله أخذ الاسبرين كويس. بس مثبت الحمل ماله داعي لكن بما اني بديت اخذه لازم اكمله طول الثلاث الأشهر الأولى. و بالنسبه للحقن قال ما احتاجها ومافي شي مبين في التحاليل اللي عملتها مع الدكتوره اللي قبله اللي يستدعي حقن. قال هذا لسه حملي الثاني و ممكن التوأم من ربنا ماتوا مو شرط لانهم ماتوا سوا يعني في مشكله. مره ارتحت لهالدكتور لانه ما كان بيعمل دعايه للأدويه و حسيته فاهم وهو بروفيسور في جامعه. لكن أخاف اسمع كلامه على أساس بدري من أول حملين,3 ندور عمشكله, لأن التنزيل والله مو سهل. فأيش رأيكم؟ الله يخليكم لا تبخلوا علي بمعلومه تريحني و تفيدني.