بسم الله الرحمن الرحيم
قصة عجبتني لاخت في منتدى تاني حبيت انقلها لحبيباتي في منتداي المفضل عسى نستفيد من نصيحة الاخت الله يتمم حملها على خير
انا زيكوا بالظبط كنت معاكوا كنت اول مالاقي واحده متاخره في الحمل وحملت اتبسط اوي احس ان فيه امل كنت بحس بالامل وانا هنا لان بلاقي بنات زيي مع ان اللي حواليا كانوا محسسني ان مفيش حد زيي
هبدا حكايتي من الاول حكايتي بدات من اول شهر جواز انا بحب الاطفال جدا من اول شهر روحت لدكتور قالي انتي زي الفل وان شاء الله تحملي خلال كام شهر والكام شهر عدوا ومفيش حاجه رحت تاني لدكتور تاني قالي انتي كويسه وهتحملي باذن الله خلال السنه دي تعدي السنه ومفيش حمل وكان كل شهر لما تيجي افضل اعيط واقعد في اوضه الاطفال اعيط والدنيا احسها ضيقه والحياه سودا
لما عدي سنه جواز بدات رحله العلاج عملت اشعه بالصبغه وطلعت تمام بعدها قررت اجرب تلقيح صناعي وربنا ماقدرش بالحمل بعدها بكام شهر قررت الجا للحقن المجهري وكان الدكتور متفائل جدا اني هجيب توام لان الحاله كويسه ومتشخصه عقم غير معلوم السبب واستجابتي كانت تمام ويوم التحليل كان عندي امل كبييييييير وكانت المفاجاه انه محصلش حمل الدنيا اسودت اوي وحسيت ان الامل راح وتمر الشهور وانا زي مانا والناس حواليا مستغربين ليه مش بيحصل حمل لان كل واحده بتتجوز في خلال شهر بتحمل
كل واحده كانت تقولي ربنا يرضي عليكي كانوا الناس حاسين اني عمله ذنب وبتجازي بيه وبعد سنه النفسيه بقت ف الارض وكان الناس حواليا يقولولي اطلعي عمره اقولهم انا مش معايا فلوس انا فلوسي يدوبك للعلاج وفعلا حوشت تاني وعملتها تاني ونفس النتيجه ربنا مارادش في للوقت ده كنت حسه اني بموت كنت حسه مفيش امل خلاااص وكنت عاوزه اموت فعلاتخيلوا لدرجه ايه وكنت مقرره معملهاش تاني وخلاص
كان الوضع بالنسبالي اني عاوزه اعمل لاخرتي عشان لما اموت ارتاح متتخيلوش كميه الياس اللي كنت فيه المهم نزلت تحفيظ قران وكنت بحفظ لدرجه ان المحفظه كانت مستغربه مني اني عندي عزيمه واصرار يمكن ف الاول الياس خلاني عاوزه احفظ لكن بعد كده الوضع اني حبه القران حبيبته وحبيبت ترتيله شغلني فعلا
وفي رممضان اول مره اعرف ارتل القران وانا بقراه مكنتش عارفه يعني ايه تجويد اصلا اتعلمت التجويد المهم رمضان عدي عليا والنفسيه بقت تمام وحياتي اتغيرت كلهاااا مبقتش زعلانه بقت انزل دار ايتام واقعد مع الاطفال واسمع كلمه مامااا مانا نفسي اسمعهاااا واشتقت للعمره اشتقت مش عارفه ليه وربنا شاهد انه مكنش بسبب الخلف المهم لما قلت لجوزي قالي مش هنقدر نحوش العمره والعمليه مع بعض ويشاء الله انه يجيلي فلوس عشان اطلع العمره وطبعا العمره كانت عباره عن عشر ايام في الجنه اتبسطت جدا وكنت حسه اني طايره من الفرحه ورجعت من هناك عروسه جديده كلها شباب وحيويه ده انا كلمت ربنا واشتكيت له من الدنيا واللي مزعلني ده انا كنت جمب قبر الرسول صلي الله عليه وسلم وبدعي ربنا بقوله انا مش ولود يارب اجعل مني ذريه يباهي بيها سيدنا محمد يوم القيامه كنت راجعه شخص تاني كل الااهات اللي ف قلبي والاحزان ربنا مسحهم بمجرد ماشتكيتله كل الامي راحت
المهم بعد شهرين من العمره جوزي قالي تعالي نعمل العمليه وناخد ثواب السعي وافقت بس كنت زعلانه عملت استخاره كتير وقررت اني لو مارتحتش هاسيب العمليه في اي وقت كنت زعلانه لان سكه الادويه والدكاتره بتقلب عليكي الاحزان بس المره دي كنت واثقه من ان ربنا هيكتبلي الخير سواء ف النجاح او الفشل وعملتهاااا وانا راجعه بعد النقل بلطجيه قفلوا الطريق وفضلت في العربيه عشر ساعات رجعت البيت قلت لجوزي اوعدني لو محصلش نصيب نحوش تاني ونعملها قالي اوعدك وعدت ايام الانتظار ونزلت الشغل في اليوم 12 وكنت جمب معمل تحليل قلت لجوزي يلا كفايه دلع عليا لحد كده انا هاحللل عشان اعرف يقولي سيبيني في الحلم كمان يومين اقوله احنا مش هنزعل احنا متفقين المهم عملت التحليل
والمفاجاه انا حامل الحمد لله طبعا مصدقتش سبحان الله لان المره دي انا اتبهدلت بعد النقل بس ربك لما يريد لما حملت عرفت ان ربنا ابتلاني عشان اتغير تغيير كلي عمري ماكنت هافكر ف العمره عمري ماكنت هتعلم تجويد
انا في السابع الحمد لله انا عاوزه اقول لكل واحده ياست متسيبيش نفسك للشيطان انا حامل لكن الشيطان مش سايبني سيبيها علي الله ومفيش احن منه واستفيدي بالفتره دي متضيعيش عمرك في الياس خليكي قد الابتلاء عاوزه تشتكي اشتكي لربنا بس ربنا يفرحنا جميعا بذريه صالحه وباذن الله اوعدكم اني ساعه الولاده ادعيلكم كلكم باولاد صالحين يكونوا سند ليناا يارب ارزقنابذريه تفرح قلوبنا واسفه علي الاطاله
11-27-2013, 12:34 PM
قصة اخت للعبرة : تجربتي في تاخر الحمل تعالي مش هتندمي
أم معاذ إن شاء الله 
[/IMG]
جديد منتدى منتدى علاج العقم و تأخر الحمل
العرض المتطور
