تجربتي مع منظار البطن التشخيصي والعلاجي

[أم حبيبة ان شاء الله]

السلام عليكم ورحمة الله وبركاته
عاوزة اقدملكم تجربتي مع منظار البطن وياريت تفيد حد من المقبلين عليه لاني قبل مااعمل المنظار دورت علي تجارب الناس عشان استفيد واعرف كل حاجة عنه ملقيتش الا موضوع واحد ومن حوالي تلات سنين

انا الحمد لله اجريته يوم خمسة اكتوبر الماضي يعني بقاله الان حوالي شهرين بس واليكم التجربة
اولا حالتي انا متزوجة من 4 سنين ومحصلش حمل ولا مرة رحنا طبعا لدكتورة وعملنا تحاليل لي وتحليل زوجي واشعة الصبغة مرتين في سنتين وكشفت بالسونار وتابعنا التبويض كذا مرة واخدت منشطات اشي حبوب واشي حقن وابر التفجير وعملت التلقيح الصناعي تلات مرات في سنتين وكورسات علاج الالتهابات ومثبتات وكل الحاجات اللي بيعملوها الناس اللي زي حالاتي وخسيت عشرة كيلو بس رجعتهم تاني ورحت كمان لست بدوية اللي هي بتعمل كاسات الهوا وادتني خلطة عسل بالاعشاب وخدتها وطبعا مخليتش بقي بردقوش اناناس قشر بصل سمسم كل الحاجات اللي بيقولوا عليها دي جربتها
اخيرا جوزي قالي بقي نتوكل علي الله نعمل حقن مجهري
رحت لدكتور استشاري مناظير مش عارفة لو ينفع اقول اسمه ولا لا هو دكتور في السنبلاوين بلد قرب المنصورة اسمه د احمد شعبان السباعي
انا بردو بقول اسمه لان ملقيتش ريفيوهات عنه وانا بدور علي النت رغم ان الناس بتشكر فيه اوي
المهم روحناله وفي نيتنا الحقن المجهري ونعرف ناس عملوه عنده قبل كدة ونجح بفضل الله

طبعا كشف عليا وشاف التحاليل واشعة الصبغة وقالي انا شايف ان الحالة مش سيئة عندك انبوبة فيها التصاقات انما ده ميمنعش الحمل 4 سنوات
انتي مكنش الاختيار الامثل ليكي هو التلقيح الصناعي ده بيبقي مفيد لو الزوج هو اللي عنده مشكلة ولا حتي الحقن المجهري انا شايف الافضل نعمل منظار استكشافي علاجي نشوف في ايه ولو في حاجة تتعالج بنعالجها فورا
استخرنا ربنا ودورت علي النت علي اد ماقدرت انما ملقتش المعلومات اللي كنت عاوزاها خالص
وشفت فيديو بتاع د هشام الشاعر واد ايه بيشكر في نتايج المنظار حمسني جدا اني اعمله

انا طبعا قرات ان في منظار بيدخل من البطن ومنظار بيدخل من المهبل طب ايه الحالات اللي بيعملوا فيها ده وده محدش قايل . طيب بنلبس ايه اثناء العملية لان انا وانا بعمل التلقيح الصناعي الممرضة قالتلي ان بتوع المنظار بيدخلوهم مللط لا ومدير المركز بييجي يتاكد بنفسه كمان وطبعا لا يمكن اعمل عملة زي دي ومدير المركز لما جه يتاكد مني في التلقيح انا كنت صاحية طردته
وكنت عاوزة اعرف تكلفته كام وعاوزة اعرف بيطلب بعده اشعة صبغة ولا لا لاني معدتش قادرة استحمل اشعة الصبغة دي جسمي تحسس جدا من المها ومعدتش قادرة اتصور ان اتعرضله تالت والدكتور جاوبني علي كل ده
قبل العملية بيوم لازم تصومي قبل العملية باتناشر ساعة
انا صمت 8 بالليل عن الاكل والمية وكان مفروض معادنا 8 الصبح

كمان لازم تكوني متوقفة عن تناول الاسبرين بكل اشكاله قبل العملية باسبوع

يوم العملية
عملت في مستشفي مكة بالسنبلاوين مستشفي كئيبة بس نضيفة
دخلت العمليات حوالي الساعة عشرة ونص بهدومي اللي جاية بيها من البيت وادوني شبشب البسه
طبعا كنت داخلة متوترة وبعيط وحالتي حالة
قابلني دكتور التخدير وحاول يهديني وكان طيب معايا ركبلي الكانيولا ولا حسيت بالمها خالص وحط جنبي محلول بس مداهوليش وانا صاحية
واداني حقنة في ساعتها راسي تقلت ويادوب سندوني لحد السرير بتاع العملية وقلعت البنطلون والداخلي ورحت في البنج لا شفت الدكتور ولا شفت المنظار
صحيت بعدها بطني بتوجعني وانا بفوق وشالوني ودوني الاودة كنت شبه واعية بنسبة 90 في المية شايفة وسامعة وسمعت ادان الظهر فعرفت ان بقالي حوالي ساعة جوة
وقعدت اقولهم نادوا الدكتور يقول انا عندي ايه
الوجع اللي كنت حاساه كان شديد نسبيا حسست بايدي لقيته حاطط علي بطني شاش في اعلي الورك شمال ويمين وعلي السرة
بطني كنت موجوعة زي الم الدورة كدة وفي شوية حرقان في الجنبين ولو اتكلمت او ضحكت بصوت من الوجع بس كل اللي في البطن ده ولا حاجة جنب الم الضلوع والرقبة عظم الصدر بيبقي بيوجع كان تريللا معدية عليه كدة والرقبة بيوجعوني الحتة اللي فيها اول عظمة الصدر دي كان حد ماسكنيني من زوري كدة بس متخافيش بيروح بالمسكن

جه الدكتور بعد ساعة اداني اسطوانة سي دي وطبعا الستات كانوا قايلين لازم تاخدي سي دي لو مداكيش سي دي بيقي عك في حاجة جوة وانا كنت مكسوفة اقوله هات سي دي بس هو جابه من نفسه
وقالي الحمد لله عملنا الازم كان في حاجات بسيطة علي المبيض شيلناها وعملنا ثقبين في كل مبيض
كان في التهاب في انبوبة نضفناه
كان في التهاب في الرحم غسلناه وشوية بقع بطانة مهاجرة كويناها
وكتبلي مضاد حيوي هاي بيوتك بيتكتب في كل عمليات النسا وحقن سفتريكسون عشان التهاب الانبوبة ده وفلاجيل مطهر معوي وكتافلام مسكن وقاللي اشوفك يوم الثلاثاء


يوم الخميس والجمعة والسبت كنت تعبانة جدا بطني فيها مغص وتحسي ان الاعضاء سايبة اماكنها كدة ومهوية وبطني منفوخة جدا واي مطب في الطريق او ضحكة او لقمة كانت توجعني
لو قومت اروح الحمام كنت بمشي متنية مش قادرة افرد طولي من وجع البطن ولو اتحركت علي السرير حتي بتوجعني
صدري كان مطبق والعضم بيوجعني جدا وباخد نفسي بالعافية بس لما كنت باخد الدوا كنت بقعد بتاع 4 ساعات كدة كويسة
يوم الاحد الحمد لله مكنش في الا الم الغرز وكنت باكل براحتي ومفيش وجع في عضمي ولا حاجة
يوم الثلاثاء فكلي الخيط وكتبلي مرهم ميكسديرم لاماكن الغرز وقالي غالبا اول دورة بعد المنظار بتنزل نتابع التبويض بقي ان شاء الله من بعدها
لسة اسبوع علي الميعاد ده ارجو من الله انها متجيش

ده اللي حصل معايا ووعيته لكن المنظار بقي بشكل علمي بيعمل ايه بالظبط وبيفيد مين وميفيدش مين ... اقولك


المنظار نوعين بطني يعني بيدخل من البطن ورحمي يعني بيدخل من المهبل للرحم
منظار البطن بيدخل من السرة اعلي الورك الايمن اعلي الورك الايسر
الدكتور بيضخ غاز ثاني اوكسيد الكربون عشان يبعد غشاء البريتون المبطن للبطن عن الاعضاء ويشوفها كويس والغاز ده هو المتسبب في وجع الضلوع بعد العملية
بيكشف عن المبايض لو عليها اكياس بيشيلها بتبقي بالظبط عاملة زي اللي طالعله فقاعة مية في صباعه وبيسلخها كدة
بيعمل تثقيب المبايض لتنشيطهم
بيكشف عن قناة فالوب من برة من ناحية البطن عشان لو لازقة في اي عضو جنبها يفكها
بيكشف تجويف البطن عشان مرض البطانة المهاجرة
بيكشف عن الرحم من برة
بيتعمل غرز طبعا مكان الفتحات بتاعته
منظار الرحم
بيدخل من فتحة المهبل مبيعوزش فتح ولا خياطة
ده بيكشف عن الرحم من جوة لو في نتوئات او مشاكل خلقية او اورام او التهابات
بيكشف عن داخل قناة فالوب لو فيها انسدادات او التهابات بيشيلها

يعني بشكل عام المنظار مفيد لصاحبات مشاكل التكيس البطانة المهاجرة ضعف التبويض ومشاكل الانابيب ومشاكل الرحم

اما الحقن المجهري بيفيد حالتين فقط حالة ضعف مخزون المبيض وحالة انعدام الحيوانات المنوية لدي الزوج
لو واحدة عندها بطانة مهاجرة او تكيس عملت حقن مجهري مبيفيدهاش لان الهرمونات بتبقي ملخبطة والبويضة مش جيدة فمش بينجح او بتسقط
فانا بعتبر الدكتور اللي رحتله راجل امين لان هو كان ممكن يلبسني في الحقن وانا عندي مشاكل الحقن ميحلهاش وياخد فلوس وخلاص
فمهم اوي تسالي عن امانة الدكتور اللي رايحاله ميبقاش تاجر وعاوز يكسب وخلاص

اخيرا سعر المنظار
بيتراوح بين الفين الي 8 الاف جنيه حسب جشع الدكتور
الدكتور عملهولي ب اربعة ونص وده طبعا سعر مرضي بالنسبالي لانه عمللي النوعين من المنظار وكان شامل حسابه وحساب المستشفي

ياريت دعوة من القلب ان ربنا ينفعني بالعملية دي ويرزقني بالذرية الصالحة عاجلا غير اجل ان شاء الله وكل مشتاقة