رحلتي الثانيه مع اطفال الانابيب

[حرم اللوغاني]

السلام عليكم ورحمة الله وبركاته .. انا عضوه جديده معاكم فالمنتدى ..
طبعا مثل ما كتبت فالموضوع هذي ثانيه تجريه لي لاطفال الانابيب الله يكتب لها النجاح ان شاءالله
طبعا التجربتين مختلفتين تماااااما من حيث الادويه والاجراءات الاولى عملتها في مركز مدكير للاخصاب في دبي وبصراحه حسيت خبرتهم قليله جدا مقارنة بالمركز اللي انا معاهم حاليا .. طبعا حاليا انا فمركز العين للاخصاب في دولة الامارات وهو مستشفى حكومي الله يطول بعمر شيخونا الكرام ..
طبعا بدت معاي الدكتوره بالتحاليل لي ولزوجي وقالت في بطئ بحركة الحيوانات المنويه التابعه لزوجك .. بدت معاي العلاج على الفور من ناحيه المنشطات ابر جونال اف 250 طبعا وبعدها الابره التفجيرية وفكل مراجعه يا بنات كانت تسوي لي تحليل دم وعملت لي مرتين مسحه لعنق الرحم وهذا اللي ريحني مستشفى يتابع الفحوصات وتاثير الادويه اول باول .. المهم تم سحب ما يقارب 11 بويضه واتصلو فيني ثاني يوم قالوا 7 منهم تخصبوا وبنشوف كم وحده تظل لليوم الخامس والحمدلله ظلوا 5 وهم بالعاده يسمون الدرجه الاولى لكن يا بنااااااات اهني الفرق واللي اغلب العيادات ما يسونه ونحن نتامل بالدرجة الاولى واخر شي ما يصير حمل وما ندري ان احتمال اللي فالدرجه الاولى يكون عندهم خلل في الكروموسومات طبعا المستشفى من اجراءاته يسوي فحص للجينات اللي هو فحص الكروموسومات اهني عرفت انه 4 من الاجنه فيهم خلل وفقط واحد سليم من حيث عدد الكروموسومات يعني خالي من اي اعاقه او خلل لان اغلب الاجنه لو ثبتت اول اشهر وفيها خلل بيصير لها اجهاض تالي واذا كملت بيكون فيه تشوه او خلل بالجنين لما يولد وقلت الحمدلله على كل نعمه وفضل .. طبعا جمدت لي الجنين وقالت برجعه الشهر الجاي لان هالشهر بتكون كيس نتيجة الهرمونات والادويه وبينزل مع الدوره .. وعطتني ادويه تضبط من بطانة الرحم ورحت لها بعد الدوره الثانيه ثاني يوم تاكدت كل شي تمام وعطتني وكملت ع الادويه لحد ما شافت اليوم المناسب للترجيع والحمدلله رجعت لي الجنين من 5 ايام وقالت كل الوضع ممتاز الجنين وانتي وكل شي تمام والله يكتب الخير .. بصراحه دكتوره راقيه جدا هيه من براغ وطبعا المركز يوفر مترجمات ما قصروا فعلا .. ادعولي بنات يثبت جنيني هالمره يارب العالمين .. وعلى فكره قالت تقدرين تمارسين حياتج الطبيعيه وقالت تحركي بشويش اللهم قالت لا تعملين تمارين اللي فيها ضغط على المبايض نفس تمارين البطن قالت كل شي الصيام والحركه والصلاه وانتي واقفه والشاور والاكل والسياقه كل شي مسموح .. وقالت الاهم تستمرين بالادويه والتحاميل والابر واشربي ماي كثير لحد يوم الكشف عن الحمل وان شاءالله متفاءلة خير ..

[حرم اللوغاني]

واي حد له تجربه مع مركز العين للاخصاب يريت يدخل على ويخبرني تجربته .. انا عند دكتوره مارتينا .. او اي حد عنده استفسار يريت يسالني

[مرام2018]

الله يتمم لك بخير ويرزقك الذرية الصالحة المعافاة وتفرحي بشوفته ويرزق كل المنتظرات ءامين يارب العالمين

[حرم اللوغاني]

المشاركة الأصلية كتبت بواسطة مرام2018

الله يتمم لك بخير ويرزقك الذرية الصالحة المعافاة وتفرحي بشوفته ويرزق كل المنتظرات ءامين يارب العالمين

اميييين يارب العالمين بحق هالايام الفضيله ان يرزقني ويثبت جنيني ويرزق كل منتظر يارب

[*عسل*]

ماشاءالله ربي يتمملك على خير
ويباركلك فيها

[حرم اللوغاني]

المشاركة الأصلية كتبت بواسطة *عسل*

ماشاءالله ربي يتمملك على خير
ويباركلك فيها

اللهم امين يارب شكرا لدعوتك حبيبتي

[Lyaly]

الله يتمم بخير يااارب والله انا خايفه اسويها

[حرم اللوغاني]

امين يا رب .. والله ما تخافي العمليه بسيطه وبالنهايه تجربه .. انا من سنتين ونص متزوجه وماحملت طبيعي فقررت اجرب مره ومرتين وثلاث الامل موجود الحمدلله .. الاهم استخيري واذا الله رايد لك بتتيسر امورك كلها لا تخافين جربي مو خسرانه بس نصيحه لوجه الله لضمان العمليه بإذن الله اعملي فحص الاجنه بعد عمليه سحب البويضات اطلبيها لو ما يسونها لانها بعد الله سبب في النجاح .. انا اول عمليه ما عملت فحص الاجنه وما نحجت العمليه .. هالمره عملت وياارب يثبت بحول الله وقوته ..

ربي لا تذرني فرد وانت خير الوارثين

[TETA]

الله يبشرج بحمل سليم معافى وتام يارب
وعسى الله يرزق الجميع

طمنينا عنج ؟

[حرم اللوغاني]

المشاركة الأصلية كتبت بواسطة teta

الله يبشرج بحمل سليم معافى وتام يارب
وعسى الله يرزق الجميع

طمنينا عنج ؟

امين يارب ،، للحين ما عملت الفحص عندي فضول بس خايفه اليوم 12 من ترجيع الاجنه وباقي على تحليلي 3 ايام دعواتكم خايفه جدا ما غير احس بوخز الدوره يروح ويرجع