عملت تلقيح صناعي للمره الرابعه

[الله أملي ورجائي]

السلام عليكم ورحمه الله وبركاه
شلونكم بنات انا اعتذر عن الانقطاع الي دام سنين ولاكن انقطعت بضروف رغمآ عني بسبب الدراسه وضغوطات الحياه
اغلب البنات يعرفون انا منتظره الحمل لي سنوات وعمر بنتي صار عشره الله يحفظها
طبعا لاانا فيني خلل ولا زوجي كذالك اثنينا اللهم لك الحمد مانعاني من شي
انا اقيم في دوله اوربيه من 18 سنه ومايعلم بغربتي غير رب العالمين
لمه ادخلت بنتي الروضه وكملت 4 سنوات فكرنا انا وابوها نجيب لها اخو او اخت ان شاءالله
وصارلي ست سنوات احاول ومافي اي حمل
لجئت للتلقيح الصناعي وسويته اول مره وانزلت الدوره قبل التاريخ المحدد بخمس ايام
وسويتها الشهر الي بعده وبعد انزلت الدوره قبل موعدها بخمس ايام للاسف
وكررتها مره ثالثه بعد ماخذيت راحه شهر وانزلت الدوره قبل موعدها باسبوع طبعآ صابني تحطيم موطبيعي حتى الدكتوره الي سوتها لي قالت مستغربه قاعد تنزل عليج الدوره قبل موعدها جدا مبكره
قلت لها في شي علط بالموضوع فقالت لي حابه تعيدينها قلت لها لا حاليآ ماافكر واريد اخذ راحه على القليله ثلاث شهور تعبت من الادويه والمنشطات وبنفس الوقت التكاليف الي قعدتني على الحديده
كل محاوله توصل 800 دولار
المهم قررت اسوي العمليه هالشهر وبالفعل كلمت الدكتوره وقلت لها ثلاث مرات والعمليه تفشل اذا تضل جذي تفشل انا موقادره اسويها واكررها كان من البدايه قايلين لي حتى اتوكل على الانابيب وتكلفه الانابيت ثلاث الالاف دولار ولا الخساير الي قطيتها هيه شافتني تنرفزت وعصبت قررت تعطيني بدل الكلوميد ابر بالبطن كل يوم ابره وقالت مفعولها اضبط من الكلوميد قلت لها اوك واتفقت معاهم وقالولي اول ماتنزل الدوره خاطبينا علشان نكتب لك على علاج وبالفعل طرشت لهم ايميل وطرشولي العلاج وخذيته وكان عباره عن كرتون كبير فيه مايقارب ال 15 ابره مع قلم كبير ويوجد داخل القلم محلول وحددت لي كل يوم اخذ جرعه 75 مل من خامس يوم الدوره لغايه سبع ايام وعقب عطتني موعد سونار حتى تشوف احجام البويضات ورحت للسونار ولقت عندي ثلاث بويضات اثنين حجمهم ممتاز والثالثه 12
قالت هذي ابره تفجيريه تاخذينها اليوم الساعه عشره بالليل ويجي زوجك عقبه الصبح يعطينا العينه وانتي موعدك بال12 علشان نحقن الحيوان المنوي
وبالفعل راح زوجي بعد طلايب ودوخه راس وانا رحت بال 12 وخذت لي سونار وقالت البويضه مفجوره وكلشي تمام حقنت الحيوان المنوي وقالت قومي انا قمت على طول وقالتلي بكتب لج على لصقات مثبت حمل وكل ثلاث ايام تغيرين وحده وباماكن مختلفه بجسمك وراح اكتبلك كريم مهبلي يجي على شكل حقنات كل يوم وحده بالليل وورى 15 يوم حللي بهذا التحليل المنزلي
وطلعت منها اليوم لي 11 يوم بالضبط من التلقيح وموحاسه اني حامل اعراض الدوره شالتني شل
واليوم قلت بحلل تحليل منزلي اول مااقعد الصبح يمكن القى خط ثاني مسدوح جنب اخوه ولعلها تباشير خير
لان قبل بالمرات السابقه كنت اسوي تحاليل بيوم 8 وعشره ويطلع سالب بس سبحان الله اليوم حللت ومن اول دقيقه طلع لي الخط الثاني اللهم لك الحمد حمد الشاكرين
باقي على الموعد اربع ايام ادعولي يابنات امانه ان ربي يجبر بخاطري هالشهر....