معاناتي بالطلق وفقدي لجنيني..

[ام سراج]

بسم الله الرحمن الرحيم

السلام عليكم ورحمة الله وبركاته

اللهم صلي على محمد وآل محمد

كــان الحلم.. مزروع فيني.. وسقيته من جملة احشاي..

رسمت الأمل بيده.. وزرعت دروووب بجيته.. وغرسته حييل بقليبي..

عشت أيــام اتحرى ملقاه.. ومشيت بشهور اتخــيل محياه..

وكنت انــاغي صورته.. وارتّل ترانيم الوله للقياه..

حضّرت يمــه لجيتك.. ورسمت آمــــال بيدك..

بــس القدر طعن فرحة عمــر انتظرها وياك..

رحـــــلت.. وبالقلب حسره تركت..

رحـــلت.. ولحضني ضمه ماتركت..

رحــــلت.. وبعدك عيني شلال دمع تجري..

حبيت ادخـــل بهالصورة وبهالكلمات اللي بداخلي عن "جنيني" اللي فقدته.. في الشهر السابع بالاسبوع 24

واحكي لكــم كيف فقـــدته.. وتدعون ربي عسى يعوضني بغيره ويصبّر قلبي

لــــأن قلبي حيييييييييييييل مهمووووووووم..

قصتي هي.. اخذت اسبوعين بس من دخلت الشهر السابع.. فجأة بديت اشتكي من الم في ضلوووعي.. قلت طبيعي هالشي كل حامل تجيها اضلاعها..

ماتركت نفسي رحت المستشفى ع اساس اشوف شي لأضلاعي واطمئن على جنيني
رحــت وعطاني العلاج بس مافاد.. ورحت مستشفى خاص وشكيت لها عن اضلاعي
وقلت بالمره دامني هنا اخذ سونار واعرف جنس الجنين وقالت فيني " بنوته"
فرحــت حيييييييييييييل وبعدين قالت لي : انتي تقولي بالشهر السابع والجنين طالع بالسونار كانه بالسادس ماعرف هذا من الجهاز او الجنين فيه شي.. مااهتميت قلت يمكن من الجهاز.. طيب ووصفت لي العلاج عن اضلاعي واخذته وهم مافاد..

رحت بعدين المركز اللي كنت اتعالج فيه وكانوا ماخذين من قبل مني تحليل بول و(انتوا بكرامه) وطلع فيني زلال في البول ورسلوني على مستشفى النساء والولادة مستعجل.. ع اساس يعالجوني.. ورحت مستشفى الولادة واخذوا عليي تحليل بول واخذوا عليي الضغط وقالوا الضغط مرتفع حيييل ولازم اتنوم عندهم ونوموني عدهم..
وشافوا بالسونار وقالوا الجنين فيه شي نموه بطيئ وكانه بالخامس ماكانه بالسابع

بس قالوا ماراح نستعجل ونخوفك >> انتوا خوفتوني وخلصتوا خلاص
راح ننتظر الدكتورة المختصه حق علم الاجنه ونشوف لبكره.. ودخلوني غرفة الملاحظه ثلاث ايام من السبت الى يوم الاثنين وانا في غرفة الملاحظه وحاطين عليي قياس الضغط ومغذي ومغنيسوم للجنين وغير عذبوني وهم كل ست ساعات ياخذون تحليل دم.. والقهر انهم حاطين لي قسطرة للبول ومقدر ادخل الحمام اذا احتجت.. يقولون ع اساس يتابعوا الضغط.. وكنت كل شوي احط يدي على بطني واحس بها تتحرك واقول في داخلي: آه حبيبتي مدري هذا آخر لقاء بيني وبينك؟! او بتعيشي وبحضنك لصدري.. آآه يمه بنتي شلون بنزلك؟! وبعدين جات حقت علم الاجنه وشافت بالسونار وطلع نفس الشي انه صغير والمشيمه ماتغذيه.. وقرروا لازم يولدوني بطلق صناعي.. انا رفضت بالاول وبديت ابكي بقووووة كيف اتخلى عن ضناي وانا كنت انتظره طول هالفتره!! كنت اناغيه واتخيله قبالي!! شلون بقدر اني افارقه!!
بس الدكاتره هم اعرف مني.. قالوا ان ظل في بطني بيرتفع الضغط للدماغ وبنصاب بالكلى.. وبيجيني تسمم.. بس استفسرت منهم احتماليت العيش كم لجنيني قالوا بس 40 % ووزنه نص كيلو بس لكن الاعمار بيد الله.. فوافقت قلت اذا اللي ببطني لي فربي بيحفظه واذا مو لي.. فهو امانه واللي عطاني وياه بيسترجعها والحمدلله على كل حال..

وجت لحظة الولادة وجات الدكتورة بتحط لي الطلق الصناعي فبديت ابكي وتسارعت دقات قلبي بكر اول مره اجرب الحمل والولاده وع طول ولادة بطلق صناعي وكان الرحم مش مفتووح وماكانت الآلآم ولادة فيني بس هم بيولدوني..

فحطوا عليي اوكسجين ع اساس ابطئ شوي اهدي من تسارع دقات قلبي.. قلت لهم ابقى عمليه مابى طلق اخاف.. وجاني الاستشاري قال يابابا رحمك مش مفتوح واذا بنسوي لك عملية راح تولدين كل مره بعملية.. فبعد نقاش حطوا لي طلق صناعي برحمي.. كان مثل المطاط ويالم حييييييييييل يوم حطته وبديت اصرخ ياربي و ياعلي يابالحسن خلاص دكتوره شيليه ماابقاه ..بس ماحسيت فيه لانهم حطوا لي مسكن في فخذي ع اساس اذا بيشتد مايألمني.. ونمت ... وفجأة حسيت بشي نزل مني ويألمني وبديت اصرخ سيستر تعالي مدري شنو نزل مني وجات تسرع وشافت شنو نزل مني قالت انا مايعرف شنو هذا ونادت سيستر ثانيه وطلع اللي نزل مني المطاط اللي حطوه لي في الطلق.. اثاريه يحطونه وبعدين كل شوي ينتفخ في الرحم ع اساس يتوسع الرحم واذا انتفخ يطلع لحاله.. المهم قلت لها ابقى مسكن وعطتني ادول وغفيت اشوي وصرت احس بالألم كل خمس دقايق او اقل واجلس واقول آه وانادي السيستر ع اساس تعطيني مسكن واقول لها احس ابقى اروح الحمام فيني براز تقول لا هذا مافيه براز هذا راس بيبي قلت لها لا ابقى ادخل الحمام قالت مافيه سوي براز هنا.. قلت لا مابى قلت لها عطيني مسكن بفخذي وخليني انام وبعد ماحنيت ع راسها عطتني ونمت.. وتقريبا ع الساعه 2:35 بديت احس بالآلآم بقووووة وكاني بدخل الحمام وقلت للسيستر ابقى اروح الحمام قالت ماما هذا راس بيبي قلت فيني براز قالت لا ماما .. طفشت قلت اهو بسويها ولا عليي منها مو راضيه توديني الحمام..
بس احاول ادفع ولاشي.. وبعدين اظل شوي واصرخ بقووووووووة وتجي السيستر وتقولي دفعي بعد وادفع واصرخ ياربي وياعلي يابالحسن .. وشوي خلاص ارتحت طلع البيبي ودخت ولاحسيت بالدنيا الا السيستر تقول خلي رجولك ماما كذا في يرفع ويجي انا ينظف.. >> طولت عليكم ادري بس وربي احكي لكم معاناتي

المهم جات مره ثانيه اليوم الثاني حقت علم الاجنه قالت البيبي في الحضانه والحمدلله على سلامتك.. >> انا كنت عارفه انه البيبي فرصة العيش كانت له ضئيلة وكان وزنه بس نص كيلووو وانا بالسابع المفروض اكثر وكانت عن جد المشيمه ماتغذيه

وبعدين بعد مااستقرت حالتي صعدوني غرفه ثانيه.. وجاتني امي ورحت شفت البيبي بالحضانه.. هنا المعاناه واللي قلبي تألم فيها.. رحنا وشفنا الجنين مره صغيييير وعيونه ماتشققت بالاساس وحاطين عليه مغذي ومدري شنو بس شفته وربي حسيت بحنيه ناحيته بقيت احضنه بس ماقدرت..
وطلعت من المستشفى يوم الاربعاء واليوم الثاني اتصلوا على زوجي قالوا تعالوا استلموا الجنين لانه توفى.... في هاللحظة ماتت البسمه وياه.. مات الانتظار..
مات الامل فيني.. صعبه انتظره ويروح.. صعبه لحظة الفراق.. قلت ياليتني ماشفتها ع اساس اقدر يمكن انساها.. بس شفتها طبعا كانت بنت..
ومن ولدت اخذت 17 يوم بس وهي كله ع بالي اتذكرها واصيييح.. وربي وانا اكتب لكم قصتي وانا ابكـــــي.. لكن الحمدلله على كل حال ذخرتها ليوم القيامه..

انا ماكتبت لكم القصه الا لاني عارفه ومتيقنه انكم ماراح تنسوني من الدعاء بان الله يعوضني بغيرها.. وانتوا مابتقصرون..

[أم جنى فديتها]

الله يعوضك خيرآ مما اعطاك
انشاء الله تكون لك شفيعه يوم القيامه
وربي اللي عطاك راح يعطيك غيرها انشاء الله ...

[همسة دلع]

الله يعوضك بااذن الله
وعليك بصبر وقولي اللهم اجرني في مصيبتي واخلف لي خيرا منها

[كرميلا]

ياحياتي يام سراج والله اني اقرا كلامك والدمعه في عيني

من جد اصعب شي انك تفقدي جنين كنتي تنتظريه بفارغ الصبر وتحسبي الايام والشهور عشان تضميه ولكن هذي مشيئه الله

وهذا ابتلاء للانسان فلا تتحطمي وتمسكي بالصبر لان الله مع الصابرين

وصدقيني باذن الله ربي بيعوضك بدل البنت اثنين وثلاثه.....

واسال الله لكي الثبات وان يرزقك ربي الذريه الصالحه اميييييين يارب...

[decheesecake]

الله يعوضك خير ان شالله.. ويعطيكي مره تانيه..
ويصبرك انتي و زوجك و يرزقكم الذريه الصالحه

[ام سراج]

المشاركة الأصلية كتبت بواسطة أم جنى فديتها

الله يعوضك خيرآ مما اعطاك
انشاء الله تكون لك شفيعه يوم القيامه
وربي اللي عطاك راح يعطيك غيرها انشاء الله ...

ام جنى تسلمين ع الدعوه..
وربي يسهل عليك

[ام سراج]

المشاركة الأصلية كتبت بواسطة همسة دلع

الله يعوضك بااذن الله
وعليك بصبر وقولي اللهم اجرني في مصيبتي واخلف لي خيرا منها

هموووسه تسلمين ع الدعوووه الحلوة

وعسى ربي مايحرمك من غالي

[ام سراج]

المشاركة الأصلية كتبت بواسطة كرميلا

ياحياتي يام سراج والله اني اقرا كلامك والدمعه في عيني

من جد اصعب شي انك تفقدي جنين كنتي تنتظريه بفارغ الصبر وتحسبي الايام والشهور عشان تضميه ولكن هذي مشيئه الله

وهذا ابتلاء للانسان فلا تتحطمي وتمسكي بالصبر لان الله مع الصابرين

وصدقيني باذن الله ربي بيعوضك بدل البنت اثنين وثلاثه.....

واسال الله لكي الثبات وان يرزقك ربي الذريه الصالحه اميييييين يارب...

كرميلا يالغلاا فديت دمعتك..

آآه اي وربي اصعب شي.. جهزت لولادتي وهسه مقدر اشوف اللي جهزته
اذا شفتهم ابكي.. حسيت بالامومه لحظة ماشفتها.. آآه الحمدلله على كل حآل
عسى ربي يمسح على قلبي بالصبر.. والحمدلله على كل حال

مشكورة يالغلاا ع المرور..

[ام سراج]

المشاركة الأصلية كتبت بواسطة decheesecake

الله يعوضك خير ان شالله.. ويعطيكي مره تانيه..
ويصبرك انتي و زوجك و يرزقكم الذريه الصالحه

تسلمين يالغلاااا

لاخلا ولاعدم..

[ام تميم 66]

الله يعوضك ياارب خييييييييير

وان شاءالله قريييييييييييييييييييييييييييييييييييب ياارب