السلام عليكم ورحمة الله وبركاته
هذي أول مشاركه لي بهاذا المنتدى الأكثر من رائع وأتمنى من كل وحده تدخل وتقرأ موضوعي انها تدعي لي بالذريه الصالحه
ابتدت قصتي بعد ماتزوجت من تقريبا ثلاث سنوات ونصف بعد زواجي بشهرين حملت والحمد لله ماتتخيلون قد ايش كنت فرحانه وكمان زوجي بس لما خلصت الشهر الثاني ودخلت الثالث بدى معي النزيف فلما رحت للطبيبه قالت لي انه الجنين مافيه نبض والنمو أساسا متوقف وقتها حزنت كثيييييييييييير بس ماأعطيت الموضوع ذيك الأهميه لأني وقتها كنت صغيره ولساتني أدرس طبعا كان الاجهاض بالبيت والله لايوريكم المعاناة الي عشتها مع كل قطعه تنزل والحمد لله على كل حال وجميع الفحوصات كانت الحمد لله سليمه ومافيه شي يخوف فقلت يمكن كان ضغط الدراسه وتعب الامتحانات
بعدها أخذت مانع لمدة 9 شهور وتركته بعد فتره طويله جدا حملت وكان هذا بشهر7 الي راح يعني قبل رمضان المهم فرحت بهذا الحمل الي جاء بعد فترة انتضار بس للأسف من خلص الشهر الثاني ودخلت الثالث جاني نزيف ورحت للطبيبه وسوت لي سونار وقالت الجنين مو واضح ومافيه نبض ماأشوف غير الكيس وقالت يمكن النمو ضعيف عشان كذا ميبان وسوت لي لي تحليل الهرمون ولقته مرره نازل بعدها سوو لي عملية تنظيف والحمد لله على كل حال
المره الثالثه الي حملت فيها كانت يشهر 1 وقتها أنا ماكنت مفكره بالحمل قلت بأأجله شوي عشان ارتاح جسديا ونفسيا بس الدكتوره الله يهديها ماأعطتني موانع قالت يمكن عندك ضعف بالتبويض عشان كذا يكون حملك ضعيف فقالت خليك على الموانع الطبيعيه وأعطتني كلوميد قالت استخدميه ثاني يوم بالدوروبعدها بنعمل لك سونار لمراقبة حركة البويضات بسقدر الله وماشاء فعل و طلعت حامل ومااستخدمت الكلوميد
استعملت حبوب تثبيت وابر تثبيت كل اسبوع آخذها وحمض الفوليك والاسبرين عشت تعب ومعاناة مايعلمها غير ربي بعد مادخلت الثالث جاني النزيف والمعاناة نفسها تتكرر طبيبة الطوارئ لما شافت ملفي ونتايج الأشعه والتحاليل قالت انه الحاله الي فيك غريبه مالها علاقه لابالأجسام المضاده ولا الفيروسات تقول انه الجنين يتآآكل لحد مايختفي والطبيب الي سوى لي الأشعه يقول من الغبي الي سوى لك الأشعه الي من اسبوعين المفروض ينبهك انه كيس بدون جنين لما قلت انه انت انصدم وماعرف حتى يتكلم وطلب ملفي واشاعتي السابقه ولما قعد يقلبها انصدم أكثر قال كان كل شي تمام وشلون بالسرعه هذي يصير لك كذا الكيس فاضي مافيه شي فطلبوا مني أسوي عملية تنظيف وسويتها وتحديدا بيوم الثلاثاء 3/5 بس المره هذي شفت الموت ماتتخيلون يابنات قد ايش تعبت من شدة الألم قاعده يومين مانمت وماقدرت أنام الا بحبوب منومه جسمي كله ينمل ماأحس بشي أبدا ويجيني شد عضلي ماأقدر حتى أحرك رجولي وماني عارفه السبب والمشكله الآن صار لي تقريبا 15 يوم وأنا أنزف وكل يوم يزيد عن اليوم الي قبله هذا غير النغزات الي بأسفل بطني وخلاص جسمي صار مرره ضعيف وماني قادره أتحرك دايما بالسرير واربع وعشرين ساعه نايمه الي يشوفني يقول مخدره والحمد لله على كل حال
مع العلم انه بكل مره أحمل فيها لاأشوف جنين ولا أسمع النبض أبدا
تكفون يابنات الله يخليكم من مرت بنفس حالتي أو تعرف أحد صار له نفسي تطمني والله اني في هم مايعلمه الا الله
وغير كذا هل النزيف طول هذي الفتره شي طبيعي لأنه باجهاضاتي الي قبل اسبوعين بالكثير وخلاص يوقف بس الي أنا شايفته كل يوم قاعد يزيد
تكفون يابنات ادعولي من كل قلبكم ان الله يرزقني ويرزق كل محرومه بالذريه الكامله المعافاة عاجلا غير آجل يااااااااارب