فلم الرعب والأكشن اللي عشته في غرفة الولادة..

مرهفة · 08-10-2011, 01:43 AM

بسم الله الرحمن الرحيم

السلام عليكم ورحمة الله وبركاته

الحمد لله والشكر له ولدت وافتكيت من الكرشة..عقبال الكروشات يارب..الله يسهل لكم ان شالله..

طبعا في تاريخ 26/8/1432هـ يوم الأربعاء ولدت وجبت احلى بنوته في الوجود..ربي يخليها لي..فديتهااا
طبعا في هاليوم كنت بنفجر من الزهق طلعت انا وزوجي الصباح فطرنا بعدين قلت له شرايك نروح مزرعتكم نسبح يقولون الماي يسهل الولادة..(لاني زهقت وطولت في الحمل احس كنت ابي اولد بأي طريقة)
قالي خلاص مافي مشكلة وفعلا رجعت الشقة وجهزت لي ملابس ورحنا المزرعة مشيت فيها لين قلت بس
وبعدها سبحنا وحسيت وانا اسبح بآلام خفيفة بس غفلت عنها..
وبعدها جلسنا قدام التلفزيون لين الظهر ورجعنا الشقة طبعا انا كنت مواصلة مانمت في الليل..
رجعت الشقة جلست ارتب وانظف والساعة 3 بالضبط حسيت بآلام غريبة قلت في قلبي لاااا مو طلق بس احتياط خل امشي
وظليت امشي في الشقة من الصالة للغرفة واروح واجي والآلام تزيد وتزيد وتروح وتجي
وطبعا زوجي ماكان جنبي..والساعة 4 وشوي بديت ادق على زوجي ولا يرد(اثاريه كان نايم تحت عند اهله)
وادق بيتهم وماحد يرد وبعدها دقيت على مرت اخوه وقلت لها ووداني زوجها مع خالتي ام زوجي المستشفى..
واول مارحت جلسوني على كرسي متحرك<<اول مرة اجلس عليه هع هع
واكشفوا علي..(وكان الكشف يألم..لدرجة اني صرخت بقوة)وقالوا مفتوح الرحم 6 سم انا هنا حسيت بوناسة قلت يعني خلاص ماباقي شي..(لاني كنت دائما اقرا قصص الولادات واتحسر على عمري)
ولبسوني ثيابهم اللي تفشل وقالوا لي فصخي ثيابج<<هع
وصعدوني فوق (غرفة الفحص)..واول مادخلوني هالغرفة جات السستر وافحصت مرة ثانية وقالت فتح 7 سم<<انا هنا تشققت من الوناسة
وكان الألم كل شوي يزيد كل شوي يزيد وانا اصيح واصارخ واقرا آيات من القرآن..واسمع اللي معاي يصاااارخون وتزيد الآلام عندي..واللي مالحقوا عليها وولدت في نفس هالغرفة..واللي متأزمة حالتها وكل شوي دخل عليها دكتور..بس اللي قهرني السستر مبرررردة عالاخر جالسة تغني وشوي وترقص..
ناس تون وناس مبرررردة صج قهرررر
وظليت تقريبا ساعة في هالغرفة وهم كل شوي جاو فحصوا..وكنت اسأل ها كم وكان كل مرة يفتح اكثر
وبعدين فجأة جا دكتور وانا على طول غطيت خشتي وانا اقول في قلبي شعنده ذا جاي يم حريم يطلقون ووجعه<<فراغة تتحلطم
جاني يقول اذا تبين نفتح لج الكيس وينزل الماي عشان يسرع الولادة ونختصر ساعة من الوقت..مع اني مافهمت من كلامة الا انه هالشي اللي بيسويه بيسرع الولادة ..بس رفضت رفض تاااام وقلت له خلها على الله متكلة على ربي..قالي براحتج<<طنشته
وبعدين ماشفت الا نط دكتور ثاني..ولبس قفازات وقال يلا..قلت خير؟؟
قال نفحص..قلت له لااااااا مابي رجال انا..قال لازم يا اختي مافي نساء للولادة اليوم مافي الا رجال قلت لاتحاول..
رجال مابي رجال يجلس يفحص علي..وحاولوا فيني بس مارضيت حسيته عصب فصخ قفازاته وقطهم بقوة..قلت في قلبي احسن
وبعدها جات السستر وافحصت وقالت خلاص ولادة
..انا هنا تعالوا شوفوني حسيت نفسي بطير من الفرح على الرغم من الآلام اللي فيني..
ودخلوني ذيك الغرفة اللي مادري شلون صايرة..وقف قلبي..قلت هذا السرير اللي بولد عليه خوش خوش<<كل ذا الكلام في قلبها
انسدحت عليه وقالوا لي كلما جاج الم دفعي..وانا احاول ومافي فايدة..
وكانت الآلام تذبح ماتوقعتها كذا ماشفت نفسي الا اصاااااارخ بقووووة وكلما حطوا التخطيط حق الجنين على بطني خذته وكفخت به على الأرض..
قمت امجع شعري من الألم مو قادرة اتحمل..وكانت في سستر سعودية الله يحفظها ويوفقها يارب معاي..وكانت تقرا علي وتهديني..وانا جالسة احضن فيها
واصارخ..وكل شوي اقول لها مو قادرة ماتحمل تعبت واهي تقولي حاولي..وانا حالتي حالة..
والسسترات الفلبينيات منقهرين مني احسهم شوي ويكفخوني..
وكل شوي قلت لها دقي على زوجي واجلس اكلم زوجي واصيح وهو يهديني..
وظليت على هالحال لين الساعة 8ونص يعني تقريبا ساعة ونص..وانا اسمع حريم يصارخون واطفال يصيحون..وكلما سمعت طفل يصيح اقول للسستر السعودية..متى اسمع هالصوت وارتاح وانا كنت اصيييييح..<<شكلها يكسر الخاطر هع
وفجأة..اشوف دكتور داخل علي من غير احم ولا دستور..حتى شيلتي ماكانت علي..وفي ذاك الوقت ماكنت فاضية اقول مابي والا مابي..
خلاص حطوني امام الامر الواقع..<<قهر
وعلى طول سوا لي جراحة وجالي اهو ومعاه ثلاث سسترات..ثنتين ماسكين رجولي ووحدة تنتظر الجنين من تحت والعلة الدكتور جا جهة بطني..وقالي يلا دفعي وانا مو قادرة واحاول ولا في فايدة..
اساسا ماكانت عندي طاقة لاني ماكنت نايمة طول الليل ولا تغديت يعني ميتة وهلكاااانة..
حاااولت والسستر تشجعني نقولي شعر مال جنين واضح وانا احاول وكل شوي اسألهم ها طلع الراس؟؟<<تتحلم الاخت هع
واشوف وجيه السسترات كئيبة وخلاص اتحطم..
والالام تزيد واصاارخ واصيح اقول هونت مابي اولد<<بكيفج بس..حتى السستر السعودية قامت تضحك علي وتمازحني وتسألني شنو قالوا لج ولد والا بنت..
وانا احاول اسايرها وارد عليها لانها كانت واقفة معاي مو مقصرة..
نرجع للدفع والآلام اللي مو راضية تخلص..حاولت ماقدرت ماشفت الا الدكتور حاط كوعة على بطني ويدفع في بطني لتحت وانا اصااارخ واصيح
حراااام عليك بمووووووت ماااااااااقدر بختنق وهو ولا هامه شي ويكمل..وكفخته ولطخته ولا في فايده..بعدها استسلمت له وجلس يدفع بطريقته اللي اذبحتني..
وفجأة شفت بطني فش<<حلو المصطلح ههههههه
وشفتهم وهم يطلعونها حسيت اني خلاص خلصت خلصت مرحلة الولادة..ومرحلة الحمل..خلصت المعركة اللي عشتها مع الممرضات والدكتور..
خلصت كل شي..شفت بنتي نتتتتتفة..اقول في قلبي كل هالعفسة على نتيفة اجل لو حجمها كبير شصار؟؟كوواااارث..
جابوها لي وبستها حسيت باحساس حلوووو..وبعدها اخذوها..وانا ظليت في غرفة الولادة جات لي السستر قالت يلا لازم في يطلع مشيمة..يلا ادفع..
قلت في قلبي بعد؟؟؟ السالفة فيها دفع..مافيني حيل خلاص تقطعت..بس حاولت والحمد لله بسرعة طلعت المشيمة بس اللي قهرني..تقولي شوف هذا مشيمة<<شحقة توريني اياها مادري..
لوعت جبدي حسبي الله عليهاااا..
وبعدها جات الدكتورة سوت الخياطة..وطولت واهي تخيط اثر الجراحة كبيرة حيل موصلينها للفخذ..
يعني لعوزووني حيييل..لاني انا لعوزتهم هههههه
تقريبا ماصارت 9 في الليل الا انا والدة وخالصة..
بس الحمد لله افتكيت..طبعا بنوتتي ماعطوني اياها..اساسا ماطلعوها الا بعد اربع ايام من خروجي..
ادري طولت عليكم بس قصتي قصة رعب واكشن..
وطبعا كنت بدخل قبل اكتبها لكم..بس كنت تعباااانة حدي ماقدر اجلس ولا اتحرك..والحمد لله الحين خفيت..
ودخلت ابشركم بولادتي ومرة وحدة اكتب لكم قصة ولادتي..
الله يسهل لكل حامل ياااارب ويعطي كل محرومة..

تحيــــآآآآتي..

ليتني · 08-10-2011, 02:42 AM

حمدالله على السلامه حبيبتي تتربى بعزكم يارب
ذكرتيني بقصه ولادتي نفسي بالضبط بس انا ماحاولو وياي على طول ودوني قيصريه حسبي الله عليهم يبون يفتكون

االـ م ـهـــااا · 08-10-2011, 03:10 AM

الف مبروووك وعقباالي ياارب عووشررت وللحين مو رااضي يطلع البيبي

سحاب · 08-10-2011, 03:18 AM

الف مبروك والحمد الله علي السلامه

سارونة الكويت · 08-10-2011, 03:42 AM

الف الف الف مبروووووووك والحمدالله ع السلامه

الله يحفظ بنيتج ويباركلج فيها

الفال لنا ولجميع الكروشات

اسومه القموره · 08-10-2011, 03:44 AM

الف الف مبروووووووووووووك تتربى في عزكم

شهوده · 08-10-2011, 03:46 AM

الحمد لله على سلامتك
والله يخليها لك
ويسهل علي,,,,, وعقبال مايفش بطني

عشق الطفولة · 08-10-2011, 04:29 AM

الف الف مبروووووك و الحمد لله على سلامتك
و عقبالنا يا رب بولادة ميسره و سهله
و الله عشت معاك في الاكشن حقك
بس الحمد لله ربي يسر لك الله يخلي لك بنوتتك و يحفظها من كل شر

عبير 99 · 08-10-2011, 04:49 AM

الحمد الله على سلامتك
والف الف مبروك احلى بنوته وتتربى بعزكم
بس تعالي شلون موصلينها حد الفخذ مافهمت
يعني بالعرض ؟؟؟
يمه
واي مستشفى ولدتي ؟

تاج ذهب · 08-10-2011, 04:58 AM

الف مليوووووووون مبروك حبيبتي تتربى بعزكم البنوتة يلا هانت عليكي ان شاء الله والباقي الله يسرلنا ونولد على خير وسلامة

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الي داخلة غرفة الولادة قريب؟؟	نوخة	إستفسارات مرحلة الولادة	21	10-07-2016 07:29 PM
ضرب زوجته فى غرفة الولادة	Om Rodina	منتدى الحياة الأسرية والزوجية	111	11-25-2014 09:26 AM
أحداث لا تُنسى في غرفة الولادة	عوااااشي	إستفسارات مرحلة الولادة	15	03-09-2014 09:19 AM
رقص شرقي في غرفة الولادة!!!!!!!!!!!	آية	منتدى حوامل الطبي	62	02-10-2013 11:29 AM
تعرفي على عشبه المد ..واستفسري اكثر من المنتيات وبنات بدايه الفضائيه	وجن عمري	منتدى السوق التجاري	0	06-06-2011 08:33 PM