السلام عليكم ورحمة الله وبركاته
واخيرا الحمدلله والشكر ولدت وجبت ( ساره ) القمورة
وبقولكم كل شي بالتفصيل
( واخيرا تحقق حلمي وبكتب قصة ولادتي زي الحريم )
بدايه كانت ولادتي يوم الخميس 25 رمضان
انا من دخل شهر رمضان وانا دخلت بالتاسع
وكنت متحمسه ببداية التاسع اطبق تجارب البنات بتسهيل الولاده
ومن دخلت التاسع وانا كل مره اقول لزوجي وديني السوق
عشان امشي واقضي ملابس النونو
بس مع الاسف طويل العمر مشغول وكل يوم بكره ويجي بكره ويقول بكره
انا غسلت ايدي منه وقلت خليني امشي بالحوش
وفعلا مشيت مرتين كل مره حوالي 20 دقيقه وارجع واتروش وانا تعبااانه حدي
وبعدها مليت من المشي قلت خلاص باامشي بمكان مناسب ولا بلاها
ورحت مره انا وخواتي السوق انا قضيت للنونو وهم شروا ملابس العيد
وكنت بالايام الاولى من الشهر التاسع آكل تمر مع كاسة حليب محلى بالعسل
لاكن كان عندي مراجعة والطبيبة قالت ان البيبي زايد وزنه كان 2 كيلو و900 غرام
وقالت وقفي تمر مع الحليب واكل لانه ممكن يزيد وزنه وبتولدين بعمليه
طبعا انا ابيها من الله لاني طعم الحليب مع العسل ابدا ماحبه
لاكن مشكلتي طحت بالاكل وكنت افكر اني بالتاسع ماراح يمدي النونو يزيد وزنه اكثر
بالنسبه لباقي المسهلات قهوة قشر شربتها مرتين بس لاني ماحب القهوة اصلا
ومره واحده سويت كمادات مويه حاره
هاذي طبعا كلها تكون متقطعه
وكنت بين فتره وثانيه اسوي تمارين خاصه بالحامل لتسهيل الولاده
طبعا مثل ماقلت لكم اني ولدت بيوم الخميس
كنت قبلها تقريبا بيوم الأحد تنزل مني افرازات شبه شفافه استمرت يومين
وماكنت اعرف وش هاذي وبحثت بالنت ولقيت بعض الحريم يقولون
ان هذا ممكن تكون موية الجنين
طبعا قلت لزوجي وقال خلاص يوم الخميس نراجع دكتورتي ونتاكد
بيوم الثلاثاء كانت تجيني آلام اعلى البطن بشكل منتظم ومدري وش هاذي
وكنت احسبه بداية ولاده ونزلت موضوع هنا بالمنتدى اسال الحريم
بس حطموني وقالوا ان هذا شي طبيعي مو بداية ولاده
طنشت الموضوع برضوا
يوم الأربعاء قمت الظهر وكنت حاسه بنزول افرازات مني
ورحت الحمام اكرمكم الله عشان ابدل الا شفت المفاجاة الرهييييييبه
شفت السداده اللي يقولون عنها وكانت فعلا ماده لزجه وفيها خطوط دم
مره وناسه وجا زوجي من الدوام وبلغته ان ولادتي قربت
طبعا هو قال انشالله وطنش لان مو اول مره اقول نفس العباره
بنفس الليله كان في عزيمه ببيت اهلي
طبعا انا طول اليوم كان في الم بسيط يروح ويجي وكنت احاول اطنش
على الفطور المغرب فجاه كان يشد معاي الالم
زوجي لاحظ اني اتالم وبعد الفطور قال يلا عالمستشفى
وانا قلت لا , اولا كنت لازم احظر عزيمة اهلي والسبب الاهم
ماكنت ابي اروح ببداية الالم عشان مايرجعوني ويقولون توه باقي
وزوجي خايف علي وعلى النونو ومصر عالمستشفى وانا على رايي
والحمدلله رايي هو اللي مشى
رحت عند اهلي بدا مع الوقت تدريجيا يزيد الالم وانا كنت اجامل
ومابي ابين اني تعبانه بعدها زاد الالم لدرجه انا ماقدر اجامل ولا اكلم مع احد
رحت غرفة اختي وقلت لاهلي اني فيني نوم مابي اسوي لهم قلق
وكنت ناويه انا وزوجي ان اروح للمستشفى من غير مايقول لاي احد الا بعد الولاده
قبل السحور بشوي جا زوجي واخذني معاه نرجع بيتنا
طبعا بالسياره كان يسولف معاي عن احداث يومه
وانا واصله حدي مالي مزاج لاي احد
شافني تعبانه وقال مشينا عالمستشفى قلت له لا بروح البيت برتبه
مابي اولد واروح عند اهلي وبيتي حوسه
زوجي ماعطاني مجال وطوالي عالمستشفى
كنت مخططه انا وزوجي اني اولد بمستشفى ابانمي اللي بمخرج 9
لانه هو قريب لبيتنا
دخلت مع باب الطواريء ومع اني كنت اقدر امشي عادي
بس زوجي جاب لي كرسي ودخلت وانا كنت متوقعه اني بتفشل
والدكتوره بتقول توه بدري وترجعني البيت
ودخلت الغرفه وجات دكتوره فليبينيه تكشف علي
وتخيلوا قالت الرحم مفتوح 5 سم
انا تفاجات مررره ان هالالم البسيط و5 سم
وبدلوا ملابسي بسرعه عشان اصعد غرفة الولاده
وخلال هالوقت طلبت ابرة الظهر
وخلوا زوجي يوقع بالموافقه عليها
وصعدوني لقسم الولاده اول ملاحظته بهالقسم صراخ الحريم المرعب اللي فعلا خلاني افكر بالالم
وجات الدكتوره مره ثانيه وقالت لي ان وضع الجنين صعب ويمكن نولدك بعمليه
لاكن في استشاري بيجي يفحص عليك ويساعدك بالولاده طبيعي
انا وافقت وجا الدكتور واظنه كان لبناني اوسوري
المهم فحص علي وقال ان الجنين نازل بوجهة مو براسه مثل الطبيعي
وانه بيحاول يعدل وضعه لاكن اذا استمر على حاله بتكون عمليه
وقال حاليا بنزل موية الجنين وانشالله يتعدل وضعه
وفعلا نزل موية الجنين وكااانت دافيه
وقلت له انا طالبه ابرة ظهر عطوني اياها وفكوني من الالم
قال بنتاكد اول اذا طبيعي عطيناك ابرة ظهر
واذا ماتعدل وضع الجنين صارت عمليه وسوينا لك بنج كامل
طبعا انا خلال هالوقت بدا الالم يزيد معاي وكنت لم يجيني الطلق اشد على نفسي واحس جسمي يصلب من الالم وبعدها يخف لطلق شوي
ومع الوقت اكتشفت طريقه تخفف الالم اذا جاني الطلق اني ادفع بقوه
كاني بطلع النونو وبنفس الوقت اشغل تفكيري باي شي ثاني
وسبحان الله كان الالم يخف وكنت طبعا طول الوقت استغفر الله
بنية ان ربي يسهل علي واولد طبيعي
وبعد فتره تعبت من الالم وناديت الدكتور مره ثانيه عشان يكشف علي
وكشف وقال معاك الرحم مفتوح 7 سم
سبحان الله انا استغربت ليش الحريم يقولون الولاده صعبة مره
مع اني انا كنت اتالم بس مو مثل ماكنت متخيله من كلامهم
عموما قلت للدكتور خلاص مابي اصبر اكثر عطني ابرة ظهر
وجا اخصائي التخدير ووداني غرفة ثانيه وعطاني الابرة
وكلها دقايق وبدا مفعولها مرره روعه
وماكنت احس باي الم ابدا
لدرجة اني كنت انام اغفى شوي واقوم
وبعدها جات الدكتوره تكشف علي وقالت يلا البيبي بيطلع ونادت الممرضات
ونادت باقي الممرضات وكلها دقايق الا الكل حواليني
ويقولون ادفعي وانا احاول ادفع وادفع لاكن كان بصعوبه
لان كان البيبي نازله بوجهها مو براسها
وكلهم يقولون ادفعي انا وقتها بكيت لاول مره من بداية الولاده
كنت خايفه مدري ليه ؟ وكنت ابكي لان كلهم يقولون ادفعي وانا ادفع ومو
قادره انزل البيبي
وبنفس الوقت انا كنت اضغط على بطني قلت يمكن يساعد
والحمدلله يمكن بعد حوالي ربع ساعه حسيت براسها يوم نزل
وعلى طول رفعت راسي اشوف وشفت الحبل السري
خفت مررره من شكله ورجعت راسي
خفت اشوفهم وهم يقطعونه ارتعب اكثر
وعلى طول جلست اتحسس بطني المنفوخه قبل خلاص صارت فاضيه الآن
وبعدها بدقيقه جابوا لي بنوتتي سارونه المزيونه وحطوها على صدري
وبعدها اخذوها وجاب لي وجبه خفيفه ساندوتش جبنه وكاس حليب وخلوني انام وارتاح
طبعا طول فترة الولاده كانت في ممرضه معاي بالغرفه ماتطلع ابد من عندي
وكان جميع الطاقم الطبي اخلاقهم روعه
والمستشفى بشكل عام ممتاز من جميع النواحي
والحمدلله ولادتي كانت سهله جدا وماتعبت ابد
ونصيحة يابنات ابرة الظهر ترا كلمة رووووعه قلياة بحقها
وهذا انا لي اسبوع لا صداع مثل مايقولون ولا الم
وياااارب يسهل للجميع ولاداتهم ويرزق كل محروم يااااارب
وبودع هالقسم وبنتقل لمنتدى فترة النفاس
ادري اني ( قرقر ) بس العذر متحمسه
مع السلاااامه