مشكلتي مع زوجي .. اتمنى تساعدوني وتنصحوني ..

[Water Lily]

السلام عليكم ..

خواتي انا في مشكلة كبيرة .. مشكلة بيني وبين زوجي وابغي مساعدتكم ..

حاولت اكثر من مرة اذكر المشكلة بس اتردد .. بس اليوم تشجعت لاني تعبت نفسيا

المشكلة هي زوجي .. وخيانته لي .. من تزوجنا ولاحظت عليه شي ... كان كثير السهر وفترات يسألني متى راح تنامين لاني انا من النوع الي ما اقدر اسهر اتعب وانعس بسرعه .. أحاول اسهر معاه لين احس بتعب وبعدها انام .. طبعا هو يتم جالس في الصالة يشوف التلفزيون او يلعب البلاي ستيشن وعلى الانترنت .. وكان اغلب الايام ينام في الصالة ولما اسأله ايش السبب يقولي كنت العب ونعست ونمت بدون ما احس بنفسي .. وهكذا .. واكثر من مرة بينت له ان هاي الشي يضايقني بس بدون فايدة يرجع كم يوم ينام في الغرفة وبعدها شوي شوي ينام في الصالة ويختلق الاعذار عشان ينام هناك .. مرة مش مرتاح في غرفة النوم ومرة ما ادري ايش .. والحين عذره ان يحتاج المكيف بارد وانا ماقدر احطه على الدرجة الي يبغيها عشان البيبي ..

الشي الثاني يابنات ... بعض الايام في الليل لما اقوم واروح الحمام وانتو بكرامة ادخل عليه الصالة .. اشوفه حاط سماعة التلفون في اذنه واذا شافني ادخل يصكر التلفون ويشيل السماعة .. حسيت انه يخون بس قلت بنتظر لين اتأكد .. وتميت اراقبه .. لدرجة اني صرت اسهر معاه واكون ميته من التعب حتى اقوم حق الدوام تعبانة ومو شبعانه نوم بس عشان اراقب .. تخيلوا ايش صار يسوي وهاذي الحركة فهمتها بعد فترة .. لما لاحظ اني اسهر معاه .. صار لما يرجع البيت قبل لاينام يطلع من الغرفة ربع ساعة مع التلفون ويرجع .. والمشكلة انا في بيت اهل زوجي .. ما قدر اتبعه .. بعدها صرت افتش في تلفونه واكتشفت تكرار رقم حفظته عندي وارسلته لاختي وهاذي الفترى كنت حامل فيها .. وقلت حق اختي كلمي هذا الرقم وخبريني اذا كان رجل ام مراة .. وطلعت وحدة وانا مت من القهر حتى حسيت بألم فظيع في بطني من الخبر .. ولما كلمته بالموضوع كذب وقالي هذا الرقم لواحد صديقه في الشغل كذبته وقلت له انا اعرف انها وحدة لين اعترف وقالي اي وحدة اعرفها في الشغل وعندها مشاكل مع زوجها وانا ااحاول اساعدها .. تخيلوا

المهم كانت الفترة كلها دموع بالنسبة لي وهو حاول يراضيني وقالي ما راح يعيدها ومادري ايش

سامحته بعد اسبوع وقلت له لايكرر هاي الشي

والاسبوع الي راح اكتشفت ان الرقم نفسه موجود في تلفونه ولما كلمته في الموضوع قالي هذا رقم غير وانتي مخربطة وانا متأكدة انه نفسه لاني مخزنته عندي في جوالي .. صار خلاف بيني وبينه هو مصر في النكران ومايعترف وقالي هاذي وحدة معاه في الشغل وكان يكلمها بخصوص وظيفة اخوه وكذا .. بس ماصدقته .. لدرجة اني من القهر رميت تلفونه في الدبليو سي .. وتميت مقهورة يومين وكله صياح وتركت البيت وخذت ولدي معاي بيت اهلي .. وانا الحين عندهم .. ارسل لي كاتب لي اني لازم ارجع قلت له مب راجعه وكذا وهو مصر اني ارجع .. قلت له اوكي برجع ولازم نتناقش في الموضوع بس بجلس عند اهلي يومين على الاقل .. ما رد علي .. بس شكله مقتنع ..

الحين انا مب عارفة ايش اسوي .. خيانته واضحه .. وانا مب عارفه ايش السبب لانها من بداية الزواج .. حتى ما عطاني فرصه اثبت نفسي له وحاولت المستحيل يابنات .. اجهز له ملابسه .. مارست الرياضه عشان اضعف بعد الحمل .. واشتري ملابس عشان التغيير .. بس صرت متحطمة .. يعني متحطمة لان ادري كل محاولاتي بتكون فاشلة لانه شكله من البداية مب مقتنع فيني او يحب البنت الي يكلمها ..

حتى صارمن حملي يخفف من الجماع وكنت اعرف لانه خايف على البيبي .. وخف الجماع بعد الولادة بعد بشكل غير طبيعي ... يمكن مرة كل اسبوعين او 3 .. اعذاره ان مافي وقت وان البيبي مايخلينا ناخذ راحتنا وان وان ولما بينت له اني متضايقه راح يجامعني اسبوعيا كانه مجبور .. وكانه جدول نمشي عليه !


الله يخليكم لكم ازوجاكم يا بنات .. بس ابي نصايحكم في هاي الموضوع .. شتنصحون فيه شاسوي الحين .. ما اقدر اعيش وشاكه في طول الوقت ..

الشي الي دايما يردعني انه يحب ولده بشكل غير طبيعي .. ويحاول دايما يلبي طلباتي وطيب معاي ولا مرة ضربني وكل ما اقوله اني محتاجة لشي يلبيه لي اذا قادر عليه .. يعني انا مب عارفة كيف يكون متناقض بهاي الشكل ..

[محبة الرحمن]

السلام عليكم

اول شيء الله يكون بعونك والله اني حاسه فيكي .. لكن عليكي بالدعاء وصلاة الليل وادعي ان الله يهديه ويصلحة ...
الشيء الثاني والله يااختي انصحك انك تمسيكنه وتصارحيه وقولي انا ايش مقصره بحقك .. وبيني له انك انتي تسوي المستحيل عشان ترضيه .. وقولي له انت كسرتني واهنتني بحركتك..
واذا تبغاني اسامحك جوالك كأنه جوالي ومابينكم اي خصوصيات..وخليه يحلف بالله انه يتوب من هالشيء .. وانا لو منك صراحة اكلم هذي البنت بنفسي مو تتهاوشيء معها بالعكس كلميها بكل ادب وقولي لها حرام عليكي تخربي علي زوجي واعطيها من الكلام الي يأنب ضميرها ..
وانت حبيبتي حاولي انك ماتخليه ينفرد لوحدة ويدور ونيس خليكي معاه واسهري حتى لو ماتحبي اسهري معاه خليه يتعود عليكي .. ويفقدتكي ..
وبالنسبه للجماع انتي حاولي تناديه كم مره وحاولي تسوين له حفلات رومنسيه وهدايا وبيني له انت اغلى شخص بحياتي ......... الخ

اسأل الله الكريم رب العرش العظيم انه يهدي زوجك

[حنوونة]

اهم شيء تعرفي البنت هاي مين؟
من متى يعرفها؟
شو نوع العلاقة اللي بينهم؟
اذا بحبها او ما بيحبها؟
طيب اذا بيحبها ليش اتزوجك؟
لازم تلاقي جواب لكل هل أسئلة بأي شكل

اختي اهم شيء تعرفي شيء
***انه هل مشكلة لاتعني نهاية العالم .......
امانة اتطمنينا عنك واي شيء بيصير خبرينا
قصتك قهرتني وازعجتني

[wooow!]

الله يكون بعونك ويبرد قلبك عن قريب يارب
مثل ما قالت الاخت لازم تعرفي تفاصيل علاقته بها الى اي مدى وكيف تعرف عليها وليه يدور غيرك..لازم تتبيني كلللل شي قبل اي قرار
وياريت تجلسو سوا تتصارحو هذا اهم شي بالموضوع وتبيني انك بتحبيه وانه هو ليكي
وانك مابتسمحي لاحد يقرب منه غيرك
فهميه هالشي بس وانتي قوية ما يشوفك منهارة
حدثيه بالعقل ويارب تتقربو وتتفاهمو عشان
ابنك..يخليه لكم يارب..

[غادة9]

الله يكون معك
بس نصيحه لا تخربي بيتك مشان وحده ما اتستاهل
اسمعي مني واتصلي انتي عليها بهدليها حاولي اوصلي ل اهلها او ل امها واحكي ل امها القصه كامله .. هددي البنت انك رح تفضحيها ورح تخربي بيتها

بس نصيحه لا تخربي بيتك
الرجل اكيد شو ما عمل بس بالنهايه ما اله الا بيته
والحمدلله انه في بيبي بينكم يعني في رابط قوي لحتى يرجعلك

**

[Water Lily]

مشكورين حبيباتي على ردودكم وقلقكم علي ..
بخصوص البنت اتصلت على رقمها اكثر من مرة بس ماردت علي ..

وصارحت زوجي بالي صار .. وخبرني انه بس مرة وهي اول مرة كان يكلمها بعدها قالي ما كلمتها ابد وراح يثبت لي بعد اسبوع لان عنده امتحانات .. قالي بعد اسبوع راح يجيب فاتورة التلفون وقالي تأكدي بنفسج اذا الرقم نفسه ولا لاء .. وان شاء الله خير ..

اتمنى من كل قلبي يكون رقم مختلف واكون انا الغلطانة .. بعتذر له وبكون في قمة الفرح ..

[مشاعل الدوسري]

الحين انا مب عارفة ايش اسوي .. خيانته واضحه .. (( الصبر ثم الصبر))
انا مب عارفه ايش السبب لانها من بداية الزواج ..
حتى ما عطاني فرصه اثبت نفسي له .. (( لا تخربين بيتك بيدك ولا تتنازلين عنه لانه مالك لك هذي خويته مو زوجته انتي ملكه و هو ملكك و فوق كل هذا عندك عيال منه لو حتى واحد))

مارست الرياضه عشان اضعف بعد الحمل ..
واشتري ملابس عشان التغيير ..
بس صرت متحطمة ..
يعني متحطمة لان ادري كل محاولاتي بتكون فاشلة
لانه شكله من البداية مب مقتنع فيني او يحب البنت الي يكلمها ..
(( هذا اللي مااحبه في البنات اضعف على شان زوجي صحيح جزء من رغبتك في النحف علشانه لكن لما تكشخين اكشخي لنفسك وله و اضعفي عشان صحتك و مظهرك مو بس على شانه ليه متحطمه كملي و واصلي بلي تبينه ادري الموضوع صعب و يقهر اللي ماينقهر
انتي محطمه نفسك بنفسك و مو واثقه بحالك كيف تبينه هو يقتنع فيك حاولي مررره ثانيه ))


حتى صارمن حملي يخفف من الجماع وكنت اعرف لانه خايف على البيبي .. وخف الجماع بعد الولادة بعد بشكل غير طبيعي ... يمكن مرة كل اسبوعين او 3 .. اعذاره ان مافي وقت وان البيبي مايخلينا ناخذ راحتنا وان وان ولما بينت له اني متضايقه راح يجامعني اسبوعيا كانه مجبور .. وكانه جدول نمشي عليه !

((موضوع الجماع هذا نسبيا و جاء يمكن صدفه مع هذا الموضوع ..))


اذا تبين ترتاحين أقعدي معاه و كلمي بكل هدوء ..

بس قبل لا تكلمينه حطي في بالك ممكن كلامه يجرح مشاعرك
ممكن يصدمك بأشياء ماتخطر على بالك ..
يمكن هو بجد متضايق منك ..
و في شي انتي مو حاسه فيه ..

روحي له و اساليه حبيبي ممكن اتكلم معاك بموضوع يخصني و يخصك يعني يخص مستقبلنا .. و ابي نتكلم بصراحه حتى لو الصراحه هذي بتجرحنا لازم الأمور تتوضح لي و لك؟
اذا ممكن نحكي الحين وله اختارالوقت المناسب .. اللي يريحك ..

ممكن تتكلمون وقتها و ممكن يقولك بعدين و يقعد يأجل
الله و اعلم اذا شفتيه يأجل و مااختار وقت معين اجبريه
انه يقعد معاك بس بهدؤ و بسياسه ..المهم

لا تتكلمين معاه و تقولين له انت و انت و انت و فيك..

أقعدي معاه بكل هدؤء و ابتسامه زعل و قولي له..
أبيك تسمعني للاخر و بعدها أحكي..
ادري صارت بعلاقتنا فتور من بعد الحمل
و و ادري اني كنت مقصره معاك لكن هلشي مكان بيدي و لا هو بيدك..
و الأمور اللي صارت و عرفتها و تكلمنا فيها يمكن اكون انا غلطانه فيها لكن
خيانتك لي لا تتعذر بأغلاطي
عموما انا الحين قاعده معاك و أبي أسمع منك
ابيك تفتح لي قلبك .. يمكن اني مافهمتك و ماعرفت كيف اتصرف معاك
ابي اعرف وشو اللي يضايقك مني بلتصرفات بشخصيتي بأخلاقي بلجنس معاك..
أنا مستعده اسمعك و ابي أحاول و ابيك تحاول معاي نفتح صفحه جديده
اذا مو عشاني و لا على شانك علشان عيالنا
مانبي لا اكبرو يشفونا مو متفاهمين مانبي يتربون في بيئه كلها مشاحنات
مافي واحد منا كامل الأوصاف كلنا نغلط
الاهم من أن نتعترف بلغلط الاهم منه أنه نصلح الغلط
اذا فيني عيوب و اغلاط اذكرها لي .. و انا شخصيا مستعده أحاول و ابذل جهد اني اتغير..
لكن السؤال اللي يطرح نفسه و ماأبيك تجاوبني الحين..
هل انت مستعد تتغير معاي و تحافظ على بيتك و تحاول تفتح صفحه جديده؟
و ياليت تكفر بهذا السؤال و بكلامي و بعدها ترد ...
و ياليت تقولي الحين اللي بخاطرك ..
انا خلصت كلامي و اذا ماتبي ترد الحين تبي تفكر انا ماعندي اي مانع فكر بكلامي و استخير ربك و شوف وين الصح و ابدي فيه..

يكون انتي سويتي اللي عليك و كلمتيه و ذيك الساعهمنتظره رده هو ...


و أعيد أقولك لا تتخلين عن زوجك .. بسبب وحده..

و تعاملي معاه بما يرضي الله لا تهملين في نفسك و في زوجك و في بيتك

لانك لواهملتي نفسك بتزيدي الشكوك لنفسك و ممكن يتزيدي الاعذار لزوجك ..

بلعكس اهتمي اكثر و اكثرر.. و الله يهدي زوجك و يصلحه و يهدي البنت و توخر عنه..

[مشاعل الدوسري]

http://forum.hwaml.com/t85181.html

هذا الموضوع ممكن انه بيفيدك..

[فوق مستواااك]

الله يعينك ممكن تكووووووون مجرد شكوك تتاكدي من زوجك ومن الفاتوره وحنا بنتظارك

[رووتا]

حبيبتي عليك بالدعاء والاستغفار والله يفرج همي وهمك وهم كل مهموم يارب