افطم بنتي او لا نصحوني فديتكم

[مرهفة]

السلام عليكم
كيفكم وشخباركم

بنتي عمرها سنة وثلاث شهور وماترضع الا طبيعي ماترضع صناعي
يعني معتمدة على صدري وحتى الاكل قليل جدا
قالوا لي ناس فطميها وتاكل عدل
بس انا خايفة افطمها ولاترضى تاكل شسوي مادري
قالوا لي علميها عالرضاعة قلت لمن شاب ودوه الكتاب ماتبي رضاعة ولاتتقبلها ابدا
وحدة تقول علمت بنتها عالرضاعة واهي عمرها سنة ونص بس بنتي ماتخيل ماتبي كلشش

طيب شسوي افطمها الحين والا انتظر لين يصير عمرهت سنة وست شهور

[أم فروحة]

أختي كانت نفس مشكتك, بنتها متعلقة فيها وماتبي إلا حليبها ولاترضى تاكل أي شي ثاني
وبعد سنة وكم شهر قالت لها أمي ابدي افطميها ووكليها أكل عادي لأن البنت ما تشبع من حليب أمها , وأمها تعبت مرة من رضاعتها لدرجة انها تشتكي من الالم تقول احس انها تسحب عروقي
طبعا اختي بدت تفطمها والبنت رافضة بس الجوع كافر ههههههه وكانت اذا نامت بنتها بالليل تعطيها صدرها علشان يخفف عنها الالم
وبعد كم شهر فطمتها بشكل كامل وعوضت بنتها بالحليب البقري والبيض وما شالله البنت زي العسل
كلشي يبيله تعب والفطام جاييك جاييك, الله يعينك يارب

[مرهفة]

يعني تنصحوني افطمها واجرب معاها الاكل

[ام اسكندر]

انا فطمت ابني بالزبط في عمر سنة و3شهور لاني حملت
بس قبلها كنت ما ارضعه الا ساعة نومه بس
وماكنت ارضعه اطلاقآ بالنهار وهو صاحي

ويوم فطمته حاولت اعطيه الرضاعة ورفض
وقعد يبكي ونام من كثر البكاء
ولما صحى يبكي اعطيته الرضاعة ورفض
ومارضى يمسكها الا الفجر
حتى كان يرضعها بطريقة غلط يقعد يعضها
والحمدلله مسكها بعدما اتعبني اول ليلتين

وحتى الرضاعة ما اعطيه الا مع نومة الليل
خلال النهار اعطيه بالكوب او أكل

وربي يحفظها لك

[مي &]

انشالله البنات افاادوكي اكثر

وربي يخليلك بنوتك

[Miss YoYo]

ليه تفطمينها بالمره
حرام عليك هذارزقها من ربي
قال سنتين ماقال على كيفكم او على حسب اكلها
قللي رضعاتها بس لاتفطمينها حرام
والله مافيه اكل بالدنيا افضل من حليب الأم
بدل ماترضعينها من صدرك ... اشفطي الحليب وحطيه لها بكاس
كذاماتعود تقرب من صدرك وهم تكونين غيرتي نظام اكلها بس بدل ماتعطينها حليب بقري تعطينها حليبك
والله الرضاعه شي حلو ... هذا غير الإحساس الي يحسه البيبي وهو في حضن امه
ليه نحرمهم .. لاحقين ع الاكل
آخرتك بتفطمينها ، كلها كم شهر وتمكل سنتين
لاتحرمينها من حليبك حاولي تعطينها لو رضعه وحده باليوم
ربي يحفظ لك البنوته