مجرد فضفضة !!

[المحتارة=(]

السلام عليكم ورحمة الله وبركاته

صار اليوم شيء .. وأحس اني مخنوقة والبكاء ما كفاني .. أبي أفضفض وأتكلم .. طبعا ما عندي خوات .. والصديقات ما أقدر أقولهم .. فمالي بعد الله غيركم .. لعل وعسى يطيح الهم اللي بقلبي .. أو ممكن تساعدوني وتواسوني ..

اللي صار اليوم .. وحده من قريباتي تزوجت .. وهي أصغر مني في العمر بكثييييييييييييير .. وطبعا اللي تزوجته أكبر مني أو كبري ..

أنا بحكم ان عمري 27 ولا تزوجت .. ولا حتى انخطبت .. أو حتى أحد قالي عطينا رقم أمك نكلمها بخصوصك .. صرت حساسة جدا جدا جدا من هالموضوع ..

كل فكري يقول اني عانس .. ولا مني أمل في الزواج .. طبعا فيه أسبابه العائلية اللي للأسف خلتني على هالحال ( العنصرية القبلية هي الأساس)

كل ما صار زواج وحده من قريباتي وتكون أصغر مني أتهرب .. أتهرب .. ما ابي أحضر الزواج

أكره نفسي كلي .. أحس نفسي حقيره .. مستحقره .. محد يحبني .. يكرهوني .. كل الناس يكرهوني ..

محد فكر في يوم من الزواجات لا الاجتماعات العائلية اللي أروح لها وقالي بنخطبك .. محد فكر يقول لي عطيني رقم أمك أكلمها عشانك .. محد !! محد فكر حتى يقولي انت جميلة مثلا لو من باب المجاملة يعني !!

زين ليه ؟؟ وش فيني ؟؟ وش ناقصني ؟! لهالدرجة كل اللي تزوجوا جميلات وحلوات وطوال وأجسام .. وأنا شينة ؟!!

لهالدرجة اللي تزوجوا أصحاب علم ومناصب !! وأنا الجاهله الحقيرة !!

كل ما أروح زواج وحده وأصغر مني أحس أختنق .. قسما بالله أختنق .. ما أقدر أتنفس .. كل الأكسجين اللي حولي ناقص .. معدوم !!

أروح الحمام بين فترة والثانية أبكي .. أبكي بحرقة .. وأرجع وأعدل مكياجي وكحلي اللي خربته دموعي ..

ولا وقت الزفة .. هذا موال لحاله !!

أحس اني أشوف العروس حللللللللوة جدا جدا جدا وأنا أقبح خلق الله !!

وأحيان أشوفها قبيحة وما تستاهل المكان اللي هي فيه !!

ودي أقوم عليها بالكوشة وأقولها قومي هذا مكاني مب مكانك .. هذا المفروض زوجي مب زوجك

أحيانا أدعي عليها ( بدون قصد والله العظيم )

أنا مب سيئة .. ولا شريرة .. ولا أكره الناس .. ولا أحقد عليهم .. لا والله .. بس ما أدري كل هالأحاسيس تجيني إذا حضرت الزواج ؟!!

نفس هالاحساس جاني بزواج أخوي ( أخوي كان عمره 32 وزوجته عمرها 18 سنة ) .. جتني كتمه وضيق بالتنفس مو طبيعية .. أحس بدوار فظيع ومب حاسه باللي حولي .. رحت الغرفة قعدت لحالي أصيح ,, وأمي تقرا علي تحسبه عين .. وهو مب عين .. الا لهالسبب مب قادرة أتنفس

تخيلوا حتى الزفة ما قدرت أحضرها الا من بعيد !! و أنا أشوف أخوي ينزف هو وزوجته .. كان منظر ودي أحرقه

ولا بالمناسبات الاجتماعية والاعياد ... وشفت هاللي تزوجوا أصغر مني حوامل .. يجيني شعور ودي أطيحها عشان تجهض !! ولا إذا شفت عندها عيال خلاص .. ودي أذبحهم ..!!

أنا مب مجرمة والله .. ولا اني أكره الأطفال .. لا .. بس هذا الاحساس داخلي يكون !!

أحس اني أتعذب .. أتعذب .. أتعذب وانا أشوف هالأفكار تجيني وأنا مب كذا .. تخليني انسانة ثانية

لذلك .. قررت اني أبتعد عن هالزواجات والتجمعات عشان ما أفكر بهالأفكار الخارجة عن ارادتي

لكن اليوم يوم قررت أبتعد .. يجيني اتصال من كبيرة العائلة عندنا .. تقولي اني مغرورة . شايفه نفسي .. واني غبية ما أعرف أتكلم وأتعامل مع الناس وووووو ..... كلام مدري من وين جابته

مب داريه ان بعدي عشان أرتاح من العذاب النفسي اللي بداخلي .. واللي كل أثناء وعقب رجعتي من الزواج والمناسبات أقعد أبكي وأبكي وأبكي وأبكي بالحمام ولا قبل لا أنام

أحس اني صرت أكره نفسي .. ودي أبتعد وأهاجر وأعيش بدنيا ثانية غير دنيتي بس كيف ؟!!

وش أسوي بالله ساعدوني

هل أنا مريضة نفسيا بهالحالة ؟؟

للمعلومية .. عشان لا تقولون اني صغيرة ومب عانس .. حنا في عائلتنا أقصى سن للزواج 23 .. كل اللي تزوجوا وأتكلم عنهم بين 17 - 20 سنة .. والرجال لا أكبر طبعا يوصلون 30 سنة .. يعني اللي بعمري 27 ذي عانس فاتها القطار .. وفوق ذا ما انخطبت أبدا !!