الحياة بين أمي وأبي أصبحت مستحيلة !!

[المحتارة=(]

السلام عليكم

أخواتي أنا صاحبة هالموضوع إذا تذكروني

http://forum.hwaml.com/t267657.html

وشرحت لكم عن علاقة أمي بأبوي .. وكيف انهم على خلاف دائم من يوم وانا صغيرة

واني للأسف علاقتي بأخواني سيئة

الآن عندي مشكلة أمي وأبوي ...

لهم 3 شهور وهم بين فترة والثانية مشاكل بمشاكل

وبصراحة ..يكون الوالد هو البادي والسبب فيها

وأحيانا تكون المشاكل تاااااااااااااااافهة

تخيلوا .. قبل أسبوع أبوي تهاوش ويا أمي عشان تذكر موضوع تهاوشوا فيه له سنيييين !!

وآخرها قبل كم يوم تهاوشوا عشاني ( لأني لا موظفة ولا تزوجت ) !! وبكذا أكون انسانة فاشلة وأمي ما ربتني ولا علمتني ووووو .... الخ ( على الرغم من اني متعلمة ومعي شهادة بكالورويوس كيمياء لي 5 سنين ..لكن تأخر الوظائف الشاغرة في السعودية تجبرني اني انتظر الوظيفة )


أبوي دايم يذل أمي بأبشع التهم ... وكيف .. قدامي !!

دايم ينعتها انها فاشلة .. ومغرورة .. وكذابة .. وانانية .. وجاهلة ( مع انها متعلمة ومعها بكالورويس إدارةأعمال جامعة الكويت ) ووووو الخ

وإذا يناديها يقولها يا حيوانه .. يا بقرة ... كل ذا وقدامي

وإذا شافها قاعده بالتلفزويون ولا بالصالة .. قومي انقلعي غرفتك ما ابي اشوف وجهك .. ( كذا بدون سبب يذكر )
ودايم يهددها بالطلاق بكل الأمور ضغيرة ولا كبيرة كانت !!

والمشكلة كل ذا يصير قدامي .. واذا دافعت عن أمي تهاوشت معه .. وبصراحة .. ما اقدر أمسك أعصابي وأصارخ عليه ( الله يسامحني )

أنا مو راضيه عن هالشيء .. بس أسلوب أبوي وهواشه مع أمي ينرفز .. ما فيه أي احترام شخصي حتى !!

وليته على أمي بس

ألا حتى خوالي وأجدادي ما اسلموا منه

دايم يتكلم عليهم .. وانهم ناس مب كفو .. ومب رجاجيل .. ومب عيال حمايل ( طبعا كل ذا والله العكس .. كل الكويت هناك تشهد لهم وتشهد بأخلاقهم )

ويوم سألته ليش تتزوج منهم إذا هم جذي .. يقول لي : انغشيت بهم وتورطت !! ( ما أدري وش التفسير لا تسألوني ) واصلا أنا أكره أمج .. ولو ما انت كان ما خليتها بالبيت دقيقة وحده !!

المهم ..

أمس أمي كلمتني بموضوع تقول لي :

أنا تحملت وصبرت 29 سنة عشانج .. تحملت مشاكل أبوج ولسانه العفن عشانج ... ولا أبيج تعيشين مع مرت أبو .. وتربيج وحده غيري وتعذبج .. لكن أنا كبرت وصرت مريضة ومب قادره أتحمل من جذي ... شرايج أتطلق منه .. وعهدا علي .. اني أجيك كل ليلة الساعة 12 أنام عندج لين الصبح وأطلع ( طبعا من دون أبوي ما يدري ) وأشري لج ثياب وأكل وكل احتاجاتك وأصرف عليك .. وأظل هني بالرياض ولا أرجع للكويت
أنا كنت أنتظر لين تتزوجين وعقبها أتطلق من أبوج وخلاص .. لكن أنا أشوف محد خطبج لين الحين !! وأنا ما أقدر أتحمل أبوج خلاص طفح الكيل


بصراحة ...

أنا ما تحملت كل الكلام اللي قالته .. ردة فعلي قدامها هي : السكوت !!

ما أعرف وش أرد عليها ؟؟

لأن لو أمي تطلقت .. معد أشوفها .. تعرفون وش معنى معد أشوفها ! أبوي بيحرمني منها العمر كله !!
وأنا وحيدتها .. يعني هي مو بس أمي .. هي أمي وأختي وصديقتي وكل شيء !!

فوق كل ذا .. بأصير خدامة حق مرت أبوي .. وأخواني .. والله ابوي ما يرحمني .. يقولي اخدميهم


يا بنات من أمس لين اليوم وأنا أتقطع بكاء .. بانفجر من أبوي وعمايله

ودي الحين أروح له وأقوله انت سبب كل المشاكل .. انت فيك وفيك وفيك وفيك وأتهاوش وأصارخ وأطلع كل الحرة اللي فيني .. كل العذاب اللي فيني وفي أمي أطلعه عليه .. أصير قليلة أدب .. اصير عاقه .. اصير حيوانه .. بس آخذ حق أمي .. حق الذل والهوان

ليه ابوي يسوي كذا ما أدري !!

ليه يكره أمي ويكرهني .. ما أدري !!

مب معقول كل ذا أطماع فلوس ( حسب كلام أمي طبعا )

بس المشاكل اللي يسويها أبوي ما له معنى !!!

والله ما لها معنى !!

يعني مثل ما صار مثل هوشة قبل كم يوم ... وين العيب إذا توني ما تزوجت ... وين الفشل اللي أنا فيه ؟؟ أروح أخطب لنفسي مثلا ؟؟

وين العيب إذا أنا عاطله !! نص بنات السعودية عاطلين !! لا .. يوم تجيني فرص وظيفية بقطاع خاص يتشرط بالراتب .. يقول الراتب قليل ما يسوى .. زين أنا اللي أشتغل مب انت !! وما يخليني أشتغل لهالسبب .. فانتظر الحين وظيفة الحكومة


هم بعد مصدومة من كلام أمي .. مب عارفة وش أرد عليها !!

أقولها بكيفج .. تطلقي وارتاحي وعيشي باقي عمرج وانت مرتاحة من المشاكل .. أرجع أفكر بنفسي .. أقول وانا وين أروح .. اصير شغالة حق مرت أبوي وأخواني .. ويمكن بعد أبوي يصير دايم يتهاوش معي .. وانحرم بعد من شوفة أمي !!

ولا اقولها لا .. وتظل تعاني من المشاكل معه !!

يا بنات أنا بانفجر .. أنا محتارة .. أنا شوي وأموت

ما أعرف شلون أتعامل مع أمي وابوي وهم كلهم يكرهون بعض ولا يطيقون بعض

ودي أهدي الوضع بينهم وأقول لكل واحد منهم ان الثاني يحبه .. لكن كله كذب

تدرون أحيانا يوم أتهاوش مع أبوي عشان أمي واصارخ عليه أحس اني عاقه !!! وأقعد ألوم نفسي .. بس ما حاولت قد اعتذر لأبوي لأني صارخت عليه .. لأنه قاعد يظلم عينك عينك وأنا أدافع عن نفسي وعن أمي

** للمعلومية : أبوي لا يشرب .. ولا يسكر .. ولا يتعاطى مخدرات ( الحمد لله ) ولا مريض نفسيا .. لأن أحيانا يوم اشتكي عن هالشيء يقولون الناس ان أبوي مب صاحي ... لا .. صاحي وبكامل قواه العقلية بعد !! بس ليه يسوي كذا ما أدري

بالله نصحوني .. لو وحده لا سمح الله يصير بها جذي .. وش تسوي ؟؟

[المحتارة=(]

يا مسلمين

38 مشاهدة بدون رد ؟؟!!!!

[إنبثاقة أمل]

الله يعينك ياقلبي

والله موقفك صعب جدا

اصعب شي انك تكوني حاضره بهذي المواقف :(

بس ليه مافكرتي تقعدي مع والدك قعده بعيده عن جو البيت وتحكي مع والدك بكل رواقه

حسسيه بالحنيه باحتياجك اله ك اب حنون

مهما والدك وصل بشي بدايقك بس لازم ماترفعي صوتك عليه اولا هذا من العقوق حتى لو والدك ظالم

ثاني الصوت العالي عمره ماجاب نتيجه او حل .... بالعكس بزيد العناد والكره

شوفي ياقلبي من الصعب تغيري في والدك او والدتك بهذا العمر

بس هالفتره غيري انت بالتعامل قربي من ابوك

حسسيه بالاهتمام بالمحبه بالاحترام

شوفي الاشياء الي فاقدها من اخوانك وحاولي انت تقدميه وتعوضيه


اما موقف امك لسه اصعب من موقفك لانها عم تتبهدل قدامك

صح صعب الطلاق بهذا الوقت والعمر

وبالذات انك بتحكي ماراح تقدري تشوفيها وتنحرمي منها

فكري انت وامك بالاستغفار والدعاء

والله انه شفاء للقلوب

مابتعرفي يمكن الحال يتبدل باحسن من هالحال

ربي قادر ع كل شي

الله يفرج همك ويهدي ابوك واخوانك

ويرزقك الزوج الصالح الي يسعدك

[عطر الربيع]

والله تقطع قلبي عليكم حبيبتي بس ماباليد حيلة!!!

الله يهديهم ويهدي سرهم ويجمع بينهم في خير يااا رب

كل اللي لازم تعمليه هو انك تدعيلهم كتييير وخصوصا في صلاة الفجر واعملي رقية وخلي القران على طول بالبيت عسا الله يهديهم ويدخل الفرح لبيتكم هو القادر على كل شيء

استودعكم الله الدي لاتضيع ودائعه

موفقة قلبي

[المحتارة=(]

المشاركة الأصلية كتبت بواسطة عطر الربيع

والله تقطع قلبي عليكم حبيبتي بس ماباليد حيلة!!!

الله يهديهم ويهدي سرهم ويجمع بينهم في خير يااا رب

كل اللي لازم تعمليه هو انك تدعيلهم كتييير وخصوصا في صلاة الفجر واعملي رقية وخلي القران على طول بالبيت عسا الله يهديهم ويدخل الفرح لبيتكم هو القادر على كل شيء

استودعكم الله الدي لاتضيع ودائعه

موفقة قلبي

يزاج الله خير اختي

مشكورة على تنبيه الرقية غابت عن بالي

[المحتارة=(]

أختي انبثاقة أمل . يزاج الله خير عل كلامج

بس ليه مافكرتي تقعدي مع والدك قعده بعيده عن جو البيت وتحكي مع والدك بكل رواقه

حسسيه بالحنيه باحتياجك اله ك اب حنون

بصراحة أبوي ما يحب يطلع معنا ... يمكن كان يوم انا صغيرة يطلع مرة مرتين .. بس الحين لا خلاص .. يطلع هو يروح لأصدقاؤه .. جماعتنا .. بس .. وباقي اليوم بالبيت

وأساسا بعد .. ما أعرف وش أقوله ولا وش أتكلم معاه !!

أبوي جاف جدا .. يعني لو كلمته يمكن يهاوشني .. ما أدري

بس شنو تقترحين وش اقول من ناحية هالنقطة مثلا ؟؟

أتمنى توضحين لي أكثر

مهما والدك وصل بشي بدايقك بس لازم ماترفعي صوتك عليه اولا هذا من العقوق حتى لو والدك ظالم

ثاني الصوت العالي عمره ماجاب نتيجه او حل .... بالعكس بزيد العناد والكره

للأسف .. أدري =(

بس ردة فعلي تجي عنيفة وعصبية

وعقبها أبكي وأندم وأقول أنا اللي قاعده أسويه غلط

بس يوم أشوف أمي تنهان .. أقول ما أقدر أسكت عن الغلط !!

زين وش أسوي يوم يصير لي موقف مثل تجي جدامي ؟؟

شوفي الاشياء الي فاقدها من اخوانك وحاولي انت تقدميه وتعوضيه

بصراحة علاقة أخواني بأبوي عادية ..

يعني فيه مشاكل بينهم بسيطة .. زي اختلاف وجهات النظر يعني

بس هم متزوجين وعندهم عيال وساكنين برا البيت .. ويجون بس وقت الويك اند ... يعني ما أعرف مثل ما تقولين وش اللي فاقد منهم ؟!!

اما موقف امك لسه اصعب من موقفك لانها عم تتبهدل قدامك

صح صعب الطلاق بهذا الوقت والعمر

وبالذات انك بتحكي ماراح تقدري تشوفيها وتنحرمي منها

يعني شورك أقولها : لا .. لا تتطلقين ؟؟ أو أترك الموضوع لها وبكيفها وأسكت ؟؟

ما أدري وش أقولها .. صج محتارة =(

[الأمورة سوس]

دعواتي لك حبيبتي
و الله مابعرف انصحك في امرك
بس رب يفرج عليك

[المحتارة=(]

المشاركة الأصلية كتبت بواسطة الأمورة سوس

دعواتي لك حبيبتي
و الله مابعرف انصحك في امرك
بس رب يفرج عليك

يزاج الله خير

[Reemi]

صلي لك ركعتين اخر الليل

واطلبي الله يفرج لك همك
وينصرك انتي وامك ع من ظلمك

صلاة اخر الليل

والالحاح ب الدعاء

[المحتارة=(]

المشاركة الأصلية كتبت بواسطة Reemi

صلي لك ركعتين اخر الليل

واطلبي الله يفرج لك همك
وينصرك انتي وامك ع من ظلمك

صلاة اخر الليل

والالحاح ب الدعاء

يزاج الله خير