ديوانية البحرين - دردشة حوامل البحرين - البحرينيات

[فلونة]

سلام علييكم.. ما تعودنا على الديوانية تصير هالشكل على قولة طفلوووو
شخبارركم بنات و وينكم محد يدش عالأقل الي تدخل تسلم واهي ماشية ...ادري انكم متابعين الديوانية بهدووء بس حركوا اصابكم الذهبية وكتبوا لنا اخباركم

اولا مأجوووورين بذكرى وفاة السيدة زينب عليها السلام

ثانياا مبروووك نجاح اعيالنا يوسف وقاسم --- آلاء و علي وعقبال التخرج من الجامعة و الوظيفة الله يفرح قلوووبكم

ثالثا.. الحمدلله على السلاااامة فتوووووت وها شنو خذيتي لي من اهناااك

شموووووس انا حسبالي تقولين سويت حق بنتج تاااج الا تقولين لي تعلمي ويني وين اتعلم انا لين ابي اخيط اتوهق حدي شلوون اسووي هالسوالف

ولكم الاعضاء اليدد روز البحرين والله يتمم لكم على خيرررر

سويت اليوم قيمات على طريقة رووز ام بنين عجنته بحليب كي دي دي و حطيت فيه آلوو وصاررررررر عجيييييييييييييييب حده لوونه ذهبي ومقرمش وخفييييف على المعدة خصوصا اني قليته بزيت العررربي

طف طف حياااتي وحشتيني عددل وامانه الي يوصل لها يسلم عليها خيرات الله سلام خص نص مني صخصيااا

ام بشاير بيعينا في السووووووق ولا تعصبين علشان بشووورة و ابو بشورة

بنقوم نبرز العشى امسوية طبخة جديدة اليوم بس شكلهاا فشلت لانه كل ماحط يدي فيهااا تصيح وردتي واحين بنشغل عليها الفرن وبخبركم بالنتيجة

[فلونة]

حنوووون .. اللهم صل على محمد و آل محمد الله يحفظه ويحرسه من كل عين جافته وماصلت على النبي عين الحسوووود فيها عوووود اينن العلي الله يخليه

ام فتووووم .. بشرينا عنش ان شاء الله صرتين احسن و ابدعي في الاكل حق فتووم علشاان تحب تاكل

يلا بررب محد بين للحين نسألكم الدعااء

[Um Amal]

شخباركم صديقاتي الأحباء ؟؟
لكم وحشة
ادري من زمان ما دخلت .. بس كان مخترب اللاب :)

[Um Amal]

المشاركة الأصلية كتبت بواسطة rose bh

هلوووووو

اول مرة اشارك وياكم ..شخباركم

انا حامل في بداية الشهر الخامس توني (بكرية)... يعني ولادتي في شهر 11

يا ريت انضم لكم .. يعني بصير ام بحرينية مثلكم :)

حياش معانا .. أحلى أخت وصديقة ..
الله يسهل لش وتكونين أحلى أم عما قريب ...

[Um Amal]

حنين ..
صديق ولدي كلش جميل .. الله يحفظه من العين

[الفتاة الذهبية]

هلا شخباركم؟
وا بويي تكسرت رجايلي
فلونه
مارحت تسوق للحين

[حنين للماضي]

السلام عليكم
شخباركم حبايبي؟؟
مأجورين وعسى ربي يرزقنا زيارتها في الدنيا وشفاعتها في الآخرة

فلونة طمنينا شخبار الطبخة؟؟
اني الليلة كنت بسوي طبخة بس زوجي الله هداه كلحين يقول قعدي وعقب شوي آخر شيء سوينا كفتة
صحيح ممكن تعطيني مقادير القيمات؟؟نفس وصف السيدة؟؟

صحيح السيدة ماعليش شر حبيبتي
اني بعد نزل علي دم في الاشهر الاولى
ان شاءالله مافي شيء
طمنينا باجر ضروري

ام موسى عيونش الحلوة حبيبتي
ولدي زعلان يقول اش هالصديق اله لحين ماجاف حتى صورته

حيالله بللي سافروا ومانسونه
شخبارش فتوت وشخبار لولو الصغيرة؟؟
تحملي فيها

يا هلا ومرحبا فيش اخت روز
ههههه عاد احنه عندنا روزتين غير بعد
الله يخليكم
عرفتي جنس البيبي؟؟
الله يقومش بالسلامة

ام حسين ترى عادي حركة البيبي تتغير بين فترة وفرتة لا تحاتين
تبينا طول الوقت يناقز هالنتفة وش قدره مسكين

بقوم اسوي سويت حق باجر لأن الصبح مايمديني

تصبحون على خير

[al sayedah]

هلا حبيباتي ،،
شكرا كل اللي ذكرني وسأل عني ..
رحت سويت التراساوند عشان اطمئن طلع كيس الحمل وحجمه اوكي بس ما بين الجنين وصار عندي هم ثاني .. سألت قالوا عادي ناس ما يبين الجنين داخل الكيس الا في الاسبوع الثامن او التاسع وما ادري هل هذا صحيح او لا ..

على العموم قالوا لي الاسبوع الجاي بعد لازم ارجع اسوي التراساوند عشان يجوفون ببين ولا لا والله كريم.

[وردة حبيبي]

السلام عليكم
بنات ديرتي شخباركم؟ عساكم طيبين

ارجوكم لا طنشوني

صراحة من جم يوم رحت العيادة موعدي وقالت لي الدكتورة ان البيبي صغير المفروض اكبر شووي و حدي خايفة و اوسوس مادري شسوي
بس تقول لي طبيعي مافي شي

طمنوني رحم الله والديكم

[أحلام أم]

سلااام عليكم
أعزيكم بوفاة الوديعة الحوراء زينب (ع)
السنه الماضية سافرت إليك ياكعبة المصائب يازينب والسنه في القلب حاجة إلى زيارتك فكنت في كل زيارة أتمنى أن اكون مسجله في دفتر زوارك كل سنه وكل عام وأن لايمحى إسمي فهل تتحقق أمنيتي بالزيارة لك هذا العام
(اللهم لاتجعله أخر العهد مني لزيارة السيدة زينب (ع) )


ولِّيتُ وجهى شطرَ قبلةِ الورى

ومن بها تشـرفتْ أُمُ القـرى

قطبُ محيـطِ عـالمِ الوجـودِ

في قوسيِ النـزولِ والصـعودِ

ففي النـزولِ كعبـةُ الرزايـا

وفي الصـعودِ قبـلةُ البرايـا

بل هيَ بـابُ حطـةِ الخطايـا

ومـوْئـلُ الهباتِ والعطـايـا

أمُ الكتابِ في جـوامـعِ العـلا

أمُ المصـابِ في مجامعِ البـلا

رضيـعةُ الوحىِ شقيقةُ الهـدى

ربيـبةُ الفضـلِ حليفةُ النـدى

ربـةُ خدرِ القـدسِ والطـهارة

في الصونِ والعفافِ والخـفارةِ

فإنـها تـمثـلُ الكنـزَ الخـفي

بالسـترِ والحيـاءِ والتعـفـُّفِ

تمثِّـلُ الغيـبَ المصونَ ذاتـها

تعـربُ عنْ صـفاتِهِ صـفاتها