السلام عليكم ورحمة الله وبركاته
كيفكم كروشات ؟؟؟الله يسهل عليكم ولادتكم ...كنت اتابعكم من غير ما اشارك لكن لما شفت الاستفسارات كثيرة عن مستشفى الامير قلت خليني افيد اخواتي بفصة ولادتي فيه وبحكم تجربتي للمستشفيات الخاصة راح اقولكم رايي الشخصي فيهم ...يالله نبدا
هذا حملي السادس وبديت اراجع عندهم من اخر الشهر الثامن بسبب مواعيد وزحمة العسكري وبعد ماخوفوني وقالوا راس الجنين كبير ..المهم بديت مراجعتي عند دكتورة لمى وكانت ممتازة ونفسيتها حلوة وطلبت مني تحاليل وقالت ياتجيبيها من العسكري ياتسويها هنا لانها لازم تكون بالملف واذا كنت ابي اولد عندهم لازم يسوونها لي حتى لو كان يوم الولادة ؟؟......وكانت د لمى على وشك ولادة ..وبعدين حولت على د اكتمال وبصراحة رووووعة التعامل معها بالرغم من الزحمة اللي عندها فكنت ارسل زوجي ياخذ لي موعد واجيهم بعد ساعة ونص ولا اطول بالانتظار ...اما الاستقبال فحدث ولا حرج انواع التهريج واللخبطة واذا ماتابعتي اسمك وعرفتي رقمك فممكن يتغير ((حصلت لي لخبطة مرتين وشفت غيري ))بصراحة كثرة على غير سنع ..
المهم نجي للولادة فطبعا موعد ولادتي 3 فبراير ولظروف خاصة راجعتهم يوم السبت 5 - 3 عشان اكشف فقالت الدكتورة مفتوح ثلاث سانتي فقالت لي سوي جميع العمليات الانتحارية فرجعت الظهر وسويت حليب بالزعفران والقرفة والمسمار واكلت تمر ونظفت غرفتي وتحممت بماء دافي اقرب للحار وبعد العصر جهزت لي تمر وماء بالزعفران ورحت عالمستشفى وعلى طول رحت لعند دكتورة اكتمال وكشفت وقالت اربع سانتي يالله ولادة واخذتني الممرضة عند الاستقبال عشان احاسب ((هنا انصدمت طبعا ثلاث الاف مقدما ؟؟؟؟))وطبعا انا مامعي شي وزوجي راح وكلمته وجاء وسألهم حق ايش هالثلاث الاف يعني وش بنود مصاريفها طبعا ولارد الا ان هذا نظام المستشفى ولما طلع البطاقة قالت له مافيه شبكة ؟؟؟!!!!!!((كيف مستشفى كبير عريض وباسم الامير ومافيه شبكة ((مادري ليه حسيت ان فيه نصب)) المهم مع حوسة الدفع والاخذ الرد دخلت القسم قبل صلاة العشاء بشوي وكنت قبل هالفترة بس امشي ...
استقبلتني الممرضة روضة (الله يجزاها خير فعلا قمة في التعامل ))وقالت لي بسرعة بدلي ملابسك الرحم مفتوح 6 سانتي قلت لها الدكتورة تقول اربعة ردت علي ان الممرضة تقول لها 6 سانتي ؟؟!!
المهم بدلت ملابسي ((كانت غرفة الطلق نظيفة ومرتبة وريحتها حلوة )) وركبت ممرضة فلبينية اجهزة الطلق وكان الطلق بااارد جدااااوبعدها فحصتني الممرضة روضة وماحسيت بالفحص كانت يدها خفيفية وقالت بفتح الموية عشان يحمى الطلق كل هذا عالساعة 9 ...
وجت الدكتورة اكتمال وهات يافحص حسيت روحي طلعت معه وكنت اتنفس عشان اخفف الالم لك لاحياة لمن تنادي قالت مفتوح 6 سانتي هذا وانا ما احس بالطلق ابدا ...وبعدها بدأ يجي طلق خفيف وكنت ادفع معه عشان ينزل الرأس ...وكل شوي تطل على الممرضة وكنت اامنها اها ماتحط صناعي وكانت تقول من غير ماتقولي ماراح احط لك لاني جربت الصناعي يتعب بعد الولادة اكثر ..المهم راحت دكتورة اكتمال وجت دكتورة جيل ((قمه ))ماشاء الله عليها حنونه مرة ومبتسمة ..
طبعا لحد الساعة 11 والطلق خفيف الى وسط وبعدها خلاص حسيت اني بولد وكانت الدكتورة توها طالعة من عندي وكانت مستغربة من برودة الطلق ..وصرت انادي الممرضة اقولها بولد وانخبصت تقول توها الدكتورة تقول مافيك طلق قلت مو بكيفي هي بنتي تسوي حركات عليكم ..وغصبا عني اشد والدكتورة تقول خوذي نفس لين نوديك لغرفة الولادة ((بهذلتهم ))وبسرعة نقلوني لغرفة المخاض وحطت لي الكمام وعطتني ابرة بالفخذ وكل ماتجي الطلقة ادفع بس ماكان فيه الم وكلها ربع ساعة الا الحلوة شرفت ورفعتها لي الدكتورة وهي تضحك وبعدها رحت في نومه لين خلصت الخياط ...وودتني ممرضة فلبينية لغرفة التنويم وطلبتها تروشني ورفضت ..وبدا مسلسل الغثاثة من عناية بالحمام الى الاكل الى طلب الممرضات ..وكانت فيه ممرضة مستلمة ذيك الليلة غثيثة مرررررررة نفسها براس خشمها تخلي المغذية تخلص وهي ماقفلتها وكل ماطلبت شي تطنش بصراحة خدمة الغرف زفت مرررررررة ..احسن مافيها انها مايجيبوا النونو الا بطلب ..
وبس ان شاء الله افدتكم ايوة تذكرت طلع المبلغ 4500ريال كيف ووشلون مادري برضوة مافيه بنود تعرفين فيها الصرفية ؟؟؟!!!!