يمكن كثير منكم عارف قصتي السابقه مع الانابيب وسبب مشاكل الانجاب عندي.. بس عشان اللي مايعرفني باختصار انا متزوجه لي اربع سنوات و لي فتره موجوده بكندا لغرض الدراسة.. المهم اني استخدمت حبوب منع حمل اول ست شهور فقط من الزواج وبعدها قعدنا فتره نمنع الحمل بشكل طبيعي وبعدها وقفنا وبدينا نحاول.. اكثر من سنه وما صار حمل.. رحنا طبيب كشف علي كشف فيزيائي بسيط وقال اني سليمه وطلبو تحليل من زوجي واقترح علينا اما تلقيح صناعي او انابيب وقالي ان الصناعي مو مضمون ويمكن تضطرين تعيدينه اكثر من مرة لكن الانابيب اسرع واضمن ولاننا كنا جدا مستعجلين (تعرفون المجتمع مايرحم وانا محد عارف بمشكلة الانجاب عندي ومابي ارجع من الغربه الا وانا معي طفل او حامل على الاقل عشان محد يزعجني) قررنا نسوي الانابيب..
لي موضوع كامل عن رحلة الانابيب وكيف كنت متأمله والدكتور دايم يحمسني ويقول انتي صغيره ونجاحها مضمون بالنسبه للي زي حالتكم.. بس اول الصدمات كانت بعد ما لقحو البويضات.. حصلو 14 بويضه ولقحوها.. كان الدكتور جدا مستغرب انه ما تكون الا جنينين من الدرجة الثانيه!! يقول اول مرة يمر علي كذا وحده بعمرك ووضعك ووضع زوجك وكذا يصير عموما رجعها لي والحمدلله غلى كل حال فشلت العمليه.. طبعا اكيد انصدمت بالبدايه وخفت مرة حسيت ان المشكله عويصه ومارح يكون حلها سهل.. لكن كان عندي امل كبيييييييير واحساس قوي ان ربي بيحقق لي مناي.. دعييت كثييير في اوقات الاجابه وكنت موقنه بالاجابه وحاسه ان ربي بيعوضني لكن متى وكيف ماعرف..
انا وزوجي ما ارتحنا لذاك الدكتور وذاك المختبر واصلا صرت اتشائم منه وبحثنا عن افضل الاطباء واخترنا اثنين ورحت لكل واحد منهم بموعد.. كل واحد كان ينصدم لما يعرف ايش اللي صار ويقول كيف 14 بويضه وما يتخصب الا اثنين رغم انكم صغار وصحتكم زينه!! واحد قالي باخذ خلايا من الرحم وازرعها بالمختبر ونحطها مع البويضات عشان تساعدها على النمو السليم (لان اللي عندي يعتبر زي قصور في نمو الاجنه) والثاني طلب مني تحاليل كثيرة وقالي يبيلي وقت افك شفرتكم ونحل اللغز اللي صاير معكم..
طبعا انا طول الوقت استخير واصلي وادعي وكنا جدا متخوفين من المصاريف.. في كندا المختبرات مصارفيها جدا عاليه وعمليه الانابيب اللي فاتت استنزفتنا.. المهم فجأة الدكتور الاول لما رحت له قالي انتي جايه بعد الدورة ولو بنعطيك اي دوا لازم نستنا لين الدورة الجايه.. بس انا بقترح عليك اقتراح بما ان الوقت رايح رايح هالشهر.. خليني اليوم اسوي لك اشعه صبغه.. واتابع معاك التبويض واذا صار سويت لك تلقيح صناعي.. قلتله يا دكتور تلقيح بدون منشطات ولا شي؟؟! قالي خلصت دورتك مايمدي نعطيك منشطات بس انا اقول ليه نقعد نستنا لين الدورة الجايه بدون ما نسوي شي خلينا نجرب بهالوقت اللي عندنا واذا ما نجحت الدورة الجايه تبين تلقيح صناعي ثاني ولا انابيب على كيفك.. سويت الصبغه بنفس اليوم وكان اخر يوم مناسب لعمل الصبغه (لاحظو الصدفه يوم الموعد اللي رحت فيه طلع هو اليوم المناسب في الشهر لعمل الصبغه) بعدين تابعو معاي التبويض وتأخر التبويض ما صار يوم 14 زي ما توقعو وطبعا بديت اتخوف واتحطم انه فيه شي غلط.. وانا كان عندي سفره مهمه لزوجي اخر الاسبوع وحاجزين ودافعين من شهور.. المخطط انه نسافر يوم الخميس ورحت الاثنين للموعد وقالو مافيه تبويض تعالي بكرا.. وبديت اتحطم ومليت وقلت لزوجي خلاص مايمدي هالشهر.. قمت الثلاثاء الصباح وكان عندي احباط وملل وقلت منب رايحه وطنشت الموعد مع اني من بديت العلاج ما طنشت ولا يوم.. فجأه قمت الاربعا الصبح ودقو علي قالو ليش ما جيتي قلت كنت تعبانه قالو تعالي اليوم!! قالي زوجي خلينا نروح.. قلت على ايش؟؟ بكرا بنسافر ما يمدي قالي امشي.. رحنا سوولي الترا ساوند وقالو انتي جاهزه!! بكرا الصباح تعالي نسوي التلقيح.. قلتلهم اني بمشي الساعه 11 الصبح قالو مو مشكله تعالي 9 الصباح (الصدفه الثانيه لحقت على التقيح قبل السفر بساعتين).. قلتلهم طيب عادي ما ارتاح واسافر على طول واتحرك قالو ايه.. رحت سويته وسافرنا بعدها على طول ونصحونا نسوي لقائات زوجيه بعدها بيوم او يومين عشان نساعد على حصول الحمل وطبعا مشينا على كلامهم..
بعد ما جيت من السفر ابدا ما كان على بالي.. شبه يائسه وبالعكس قاعدين نفكر اي دكتور بنكمل معاه ووش بنسوي.. بس كان فيه شي بداخلي يقولي كل هالصدف ماهي من فراغ هذي تساهيل من رب العالمين!! معقوله احمل!! و بعدها احاول انسي نفسي عشان ما اتأمل واتحطم..
الصدفه الثالثه: طلعت مع صديقاتي نتعشا في مطعم وكان قبل موعد الدورة وكانت الطاولة اللي جمبهم عندهم بنت صغيره سنه ونص كل شوي تجيني وتناظرني وتضحك لي واقعد العبها شوي بعدين اطنشها بعدين ترجع لي قامت صديقتي قالت هذي ترا علامه!! قلت علامة ايش؟ قالت يمكن حامل او بتحملي!! طبعا انا اعرف ان هالكلام خرافات بس سبحان الله رجع لي الامل في داخلي رغم اني وقتها كنت بالمرة ناسيه الموضوع وقاعده انتظر الدورة تنزل.. لما جا اليوم اللي المفروض تنزل فيه الدورة سويت اختبار وطلع خط خفيف جدا جدا يكاد لا يرى ومادري يعتبر حمل ولا لا ووريته زوجي وقالي لا مو واضح انسي.. قلت ابي احلل دم قالي لا بدري مرة انتظري كم يوم لو ما نزلت تحللين!! ونزلت موضوع وقتها وحمسوني البنات اجيب جهاز ديجيتال..
جبت جهاز ديجتال وقمت الفجر ماقدرت انتظر وسويته وقعدت انتظر في الحمام.. اقسم بالله ان الثواني كانت طويله اول مرة احس الجهاز مرة يطول وفجأة طلعت كلمه وخايفه مرة اني اشوفها لما طالعت كانت كلمه "حامل" ظاهره على الجهاز.. طبعا ماقدرت انااااام صليت الفجر ودعييييت وقعدت اصيييح بين يدين ربي وبعدها ظليتني صاحيه على النت اسوي سيرتش عن اختبارات الحمل ونسبه نجاحها وما قلت لزوجي شي..
بعدها بكم يوم طلبت منه اسوي تحليل دم وقالي انه مشغول وكان عندنا زيارات بالويك اند ما تتأجل وهو حاس ان الدورة بتنزل واني عايشه بخيال (رغم انه دااائما متفائل ودايم يعصب علي يقول انتي متشائمه بس بسبب اللي صار بعملية الانابيب يقول حسيت ان مشكلتنا عويصه مرة حلها مو بتلقيح صناعي وغيره حلها يبيلها وقت طويل).. المهم جا يوم الاثنين واخيرا ورحت حللت دم والمفاجأة كلموني وقالو انه ايجابي.. طبعا انا طرت طرت من الفرح وعلى طول طلعت للسوق اشتريت كتاب للحمل حق الام وحق الاب واشتريت علبه حلوة حطيت فيها كتاب الاب مع كرت فيه كلام على لسان البيبي ولزقت اختبار الديجتال اللي ماعلمته اني سويته على الكرت وسكرتها وجيت وحطيتها له على الطاوله وهو يدرس.. فتحها وما صدق.. قالي كلموووك خلاص؟؟ قلت ايه.. بغا ينجن من الفرحه وكلنا صلينا ركعتين شكر ومن يومها طول الوقت نحمد ربي ونشكره على نعمته العظيمه..
اللي ابي اوصله من خلال موضوعي انه لا تبأسو من رحمه الله ابدا ابدا.. وانا دااااااايم كنت ادعي اقول ياربي انت القوي القادر وحنا عبيدك الضعفاء.. ربي ارحم ضعفي وقلة حيلتي وارزقني يا اكرم الاكرمين مالي غيرك ياربي حنا عبيدك اللي وعدتنا تستجيب دعاوينا وخصيتنا برحمه خاصه..
طبعا الاستغفاااااار انا وزوجي من 700 الى 1000 مرة باليوم.. سورة البقره انا وزوجي قرينها اكثر من شهر بشكل يومي وقريت في مويه وكنا نشرب منها انا وزوجي.. ذبحنا بالسعوديه ذبيحة ووزعناها على الفقرا.. تصدقنا.. ومارح تصدقون انه حتى فيه اقارب ما كلمناهم منزمان كلمناهم وتصالحنا معهم.. اي شي غلط في حياتنا حاولنا نعدله.. حتى صلاة الفجر كنت اصليها لما اقوم الصباح صرت احط المنبه واقوم الفجر.. كل هذا بدأ اثناء عمليه الانابيب ولما فشلت ايقنت انه ربي رايد لي الخير والافضل ولم اجزع.. دائما اقول في داخلي ربي مستجيب كل دعواتي ولكن مأجلها لخير لي.. سبحان الله ما جتني الدورة بعدها وحملت بنفس الشهر "وعسا ان تكرهو شيئا وهو خير لكم"..
الدعاء لازم يكون مع الايقان بالاجابه والالحاح.. ربي يسمعنا يا جماعه ويرحمنا.. رحمة ربي اشد من رحمة الام بطفلها الرضيع!! تتوقعين ربي يبي يضرك ولا رايد لك الاذيه؟؟ لا دايم خليكي موقنه ان ربي رايد لك الخير وانتي مؤمنه والمؤمن امره كله خير.. ياما رددت اني راضيه بقضائك وراضيه بحكمك ياربي اكتبني عندك من الصابرين الراضين وبعد فشل الانابيب صليت ركعتين وقلت لربي اني اشهدك واشهد ملائكة عرشك اني راضيه بكل ما تقضيه علي ربي لا تكتبني عندك من الجازعين الكافرين.. وسبحانه اغرقني بكرمه وحملت بعدها باقل من شهر!! بعد محاولات لحوالي السنتين!! كل شي بايد الرحمن سبحانه القادر على كل شئ..
اتمنى انكم استفدتو من قصتي والحمدلله رب العالمين حمدا كثيرا طيبا مباركا فيه حمدا يليق بجلال وجهه وعظيم سلطانه.. والصلاة والسلام على افضل الانبياء والمرسلين..
05-01-2012, 09:24 AM
قصة حملي الغريبه.. "فان مع العسر يسرا*ان مع العسر يسرا"
يارحيم 
جديد منتدى منتدى أعراض الحمل والوحام
العرض المتطور
