بسم الله الرحمن الرحيم
حبيت افيدكم بقصتي وان شاءالله تستفيدون والباقي يارب تبشرونا بحملكم.. والحوامل ربي يثبت حملكم و تفرحون بشووفته معافا سليم
_قصه علاجها ؟
فبدايه علاجي ماكملت سنه من زواجي بديت بالاعشاب كنت اروح لحرمه كبيره تسوي تمريخ و اعطتني اعشاب اتبخر فيها وتحاميل
وعسل طعمه يجيب المرض..):
بعد استمراري عليه وقت الدوره وبعدها حسيت المبايض عندي متنفخه> <
مااقدر اجلس ماقدر اركع او اسجد عند الصلاه كنت ابكي من الالم واسهر طول الليل ووصلت لمرحله مااقدر اتحرك
رحت للمستشفئ الدكتور انصدم قال المبايض عندك ملتهبه ومتنفخه
واخذت الادويه والحمدلله رجعت لطبيعتي ..وحلفت ماروح لاي حرمه تعالج وتخبص علي>_<
وبعدها رحت لدكتور سويت تحاليل كامله ووكل شي سسليم عندي
وبديت فمرحله التنشيط جلست تقريبا مع هالدكتور 9اشهر اتعالج فقط تنشيط
يعني ..كلوميد ..ابره تفجير ...دافستون كانت المابيض تستجيب وحجمها ممتازه لكن بدون حمل...وعلئ هالحال لين مليت وتركته
بعدها قلت لزوجي وقتك الحين تحلل ..وحلل عند سليمان الحبيب وصار عنده تشوهات بسيطه وتعالج منها والححمدلله
في هالفتره قرر علي الطبيب المتابع لزوجي اسوي اشعه الصبغه
دخلت هالغرفه حقت الاشعه مدري وش السالفه) :
كانت مؤلمه مع اني قريت في المنتدئ العكس ..لكن الم تتحملينه والحمدلله سليمه
وانتظرت الحمل...انتظظررت لكن مافيه
جلست سنه كامله انتظر
في هالسنه قررت اسوي اعشاب وخلطات
سويت خلطه اسمها المساخن واشربها وقت الدوره
واشرب اناناس واخذ فيتامين
جربتها ثلاث شهور ورحت لدكتوره اشوف وقت التبويض الدكتوره هنا تسألني تاخذين ابر تنشيط قلت لا ..قالت طيب حبوب قلت لا.. قالت عندك بويضتين بحجم20وان شاءالله بيصير حمل
في هاللحظه كأنها قالت انتي حامل فررحت كثير وقلت لزوجي ولاامي كنت ضامنه الحمل100%
وجات الدوره قبل موعدها بيومين كانت صدمه وتعبت نفسياً وبعدها صار عندي بروود وتبلد
شلت فكرة الحمل وعشت حياتي بدون هالفكره ونسيت المستشفيات لفتره اهتميت بدراستي والسفر والطلعات وبحالي نسيت اني ابحث عن الحمل..كان زوجي يكلمني عن مستشفيات كنت اقول انسئ وامي تكلمني واقولها مابي احمل
وبيوم عصب زوجي وقال لازم تتعالجين ورحت المستشفئ بس عشان زوجي وامي او بداخلي ماكان يهمني
حللت وفحصت ونفس الشي سليمه وزوجي حلل وسليم
ورجعت الوضعي البرود الي حولي يحملون ويولدون ماكنت احس شعور الحزن مثل قبل
واخيرا قررنا الانابيب
كنت فرحانه بقرار زوجي ماكنت اعرف ليش ..بديت في الابر وبعدها سحب البويضات كان التعامل رائع ومتعاون في العمليه لبست لبس العمليه وانتظرت وقتي كان فيه تقريباً اربعه مثلي ولما جا دوري كنت خايفه واقرئ وادعي
حط لي الدكتور التخدير واشوف الممرضات والدكتور يدورون والعالم تدور قلت وش فيهم يدورون ...لين حل الضلام خخخخ
ماتذكر شي لكن صحيت وانا ف الغرفه والدمووع والشهقه وكنت ارجف وحالتي حاله وزوجي مرعوب جنبي هههههه شكلي قلبت صياح وقت العمليه
وتم سحب 10بويضات الحمدلله^_^
وبدينا مرحله انتظار الترجيع وجا وقت الترجيع وكانت سهله وخفيفه
وقالي عندي ثلاث بويضات ممتازه وكان بيرجع الثلاثه كلهم قلت لا ابي بس 2
عاد بيني وبينكم الواحد اللي بقي كاسر خاطري خخخ
وشفتهم قبل الترجيع حسيت دمووعي تنزل
كنت اتسائل بفرح بشوفتكم مخلوق كامل او بتتركوني بنص المشوار؟!
وتم الترجيع ورجعت الغرفه كانت العنايه فيني مشدده المهم بعد العمليه كان لازم المثانه مليانه وحسيت بنفجر وتحملت وبعدها ررركض
وانتو بكرامه للحمام...وبعدها وقت انتظار النتيجه
فداخلي ماكنت متفائله كانت نفسيتي0صفر
كنت استودع اجنتي..واتصدق واستغفر وابكي
كنت ارتب بيتي بشكل خفيف واتحرك وكثر وقتي منسدحه
واصلي واقفه حللت قبل الموعد ب5ايام طلع خطين
وحللت في الموعد طلعت حامل والحمدلله فرحت فرررحه يارب يجربها كل من يتمنئ
وبعدها باسبوعين نزل دم):
في اول يوم من العيد وبدينا صيااح كان كثير واحمر
قلت خلاص ماتو اجنتي ورحت لمستشفئ العام
وكان وجهي متنفخ دموع وصياح الدكتوره شفقت علئ حالتي ههههه
ومن حطت الجهاز علئ بطني بين الاجنه ماشاءالله علئ ثلاث اسابيع قالت
هذا هم كويسين وكل شي تمام وفرححت حسيت الدنيا توسسعت
واصرفت لي ابر تثبيت وبعدها انقطع الدم وكان من بدايه الترجيع ينزل علئ خفيف..لكن بعد الابره وووقف نهائيا والحمدلله
واستمر الحمل وفي الشهر الثاني بدا التعب والدوخه
ماكنت امشي خطوتين وللحين علئ هالحال والحمدلله
_ كم مده الزواج ؟
ثلاث سنوات
_سبب تأخر الحمل (الزوج _الزوجه )؟
بدووون سبب
_في اي مركز او مستشفى تم العلاج وعند اي دكتور ؟
مستشفئ سليمان الحبيب في بريده ..مادري اسمه لكن دكتور سوري
_كم جنين تم ارجاعه ؟
2
_كم تكلفه العمليه ؟
تقريبا12الف
_ماهي الاعراض التي شعرتي بها خلال فتره الترجيع ؟
تيبس الظهر من كثر ماكنت مرتاحه
نزول دم استمر لفتره الحمل توقف بعد اخذ ابر التثبيت
او كل مايخص هالفتره من ناحيه الادويه والراحه او نصيحه تقدمينها من خلال تجربتك ...........الخ
انصح كل مقبله علئ هالفتره القناعه التامه والرضئ بالقدر
والتصدق والاستغفار وتستودع الجنين
ماتبذل مجهود كبير وتستمر علئ الادويه اللي وصفها الدكتور
تكثر من شرب المويه وعصير التفاح والخس
تناجي ربها ليلاً وتحاكيه بعاناتها وتعبها وانه يعوض صبرها
وتفرح انها وصلت للمرحله هذي غيرها ماقدر يكمل
لان بويضاته ماستجابت.لتنشيط..او بويضاته درجاتها غير صالحه لترجيع
او تكون مشاكل عند زوجها
فالحمدلله علئ كل حال
وربي يفرح كل منتظره...ويتمم لكل حامل ..ويعوض كل من ماكتب لها الله الحمل
وتذكري ان ماخذ منك الله شي ...الا لانه بيعوض لك اجمل منه
واتمنئ التوفيق للكل ودمتم
11-10-2014, 07:42 AM
رد: هـناتباشـير الحمل بأطفال الانابيب والحــــــــقن المجــــــهـري
رمان 
جديد منتدى منتدى أطفال الأنابيب
العرض المتطور
