بسم الله الرحمن الرحيم
آلسلآم عليكم ورحمة الله وبركآته
تأخرت على ما أكتب لكم قصة ولادتي بس ظروفي ما سمحت والحين فرغت نفسي ..
أكيد انتوا قريتوا اللي كتبته يوم السبت 30/6 عن نزول سدادة الرحم ..
بس قبلها ببدأ من يوم الثلاثاء بدأ فيني ألم في أسفل بطني وكنت مو متحملته وآخر الليل تروشت بمويه دافيه و حطيت زيت زيتون ساخن والحمدلله خف الألم و الأربعاء رجع الألم نفسه مره ثانيه كل ساعه تقريباً أو ساعتين يجيني نفس الألم في اسفل البطن ونفس الشي راح مع المويه الدافيه و زيت الزيتون والخميس و الجمعه خف الألم و كنت أمشي الخميس تقريباً نص ساعه و الجمعه بعد مشيت نص ساعه وكنت أمشي بخطوات واسعه وسريعه أبي أولد بأي طريقه لان راس الجنين ضاغط عليّ تحت ومو عارفه اجلس تعبت ويوم السبت نزلت اتغدى تحت مع أهل زوجي قلت بنزل عشان الدرج يمكن ينفع وتجيني الولاده وفعلاً لما نزلت حسيت بإفرازات سايله أكثر من اللي معتاده عليه ورجعت فوق الا الإفرازات لونها مايل على الأصفر مشيت شوي وبعدها بساعتين يعني 3 العصر حسيت بإفرازات ورحت الحمام ( وانتوا بكرامه ) ولما غسلت حسيت فيه شيء مو راضي ينزل لما مسحت بكلينكس لقيتها سدادة الرحم فررحت وخفت وطلعت بس مَ قلت لزوجي لأنه نايم ومشيت تقريباً نص ساعه ورتبت شقتي من إلى وغسلت ملابس زوجي كلها وجهزت آغراضي كلها وآهم شيء آلكآميرات عشآآن آلتصوير ولما صحى زوجي قلت له شكلي مقربه آنتبه لجوآلك يمكن آحتآجك وبدأ الألم من بعد آلمغرب وانا مطنشه آشتغل في شقتي واغسل الملابس ولما صارت آلساعه 11 رحت وكشفت عليّ قالت آلرحم مسكر .. وسوت لي تخطيط قالت فيه طلق خفيف بس عادي لان الرحم مسكر .. ورجعت البيت 1 في الليل ونمت .. وصحيت 3وربع الفجر من الألم ومشيت شوي وشفت الألم يزيد وماوقف تروشت وآكلت لي تمر وأمشي شوي واجلس شوي لما صار الساعه5 الاربع دقيت على أمي قلت لها مع أني ماكنت بقولها .. بعدهآ صحيت زوجي لاني ماقدرت اتحمل وجلس معآي وهو خآيف وجهه يتقلب ألوان ولمآ صارت الساعه 5ونص قلت لزوجي مو قآدره أتحمل أبي اروح المستشفى نزلت ع الدرج وانا حددي تعبانه لمآ رحت كشفت عليّ قالت 1 سانتي طلعت ع مسؤوليتي وقلت لزوجي بروح لأمي وهو راح الدوام ومن 6 وأنا أتألم الين 8 ونص سوت لي أمي حليب مع دارسين وحطيت رجلي بمويه دافيه وانا مو قادره أجلس منسدحه وكل شوي قمت أمشي والألم كل شوي يزيد ويذبببح بس بارد ومتقطع وكله في البطن وشوي في الظهر وبين كل انقباضه وانقباضه تغمض عيوني ويصحيني الألم واصيح واقول لأمي مو قادره أتحمل صارت 8 ونص قلت لأمي خلآآآآآآآص بروح وبطلب قيصريه وطبعاً زوجي كل شوي يدق عليّ يسأل ودقيت عليه ورحت كشفت عليّ وانا ضايق صدري أقول كم بتقولي الحين أكيد 2 أو 3 بس انصدمت لمأ شفت وجهها وهي تكشف لآنها آنصدمت لقته فآتح 6 وقآلت على طول فوق ولاده ( ونسيت كاميراتي في السياره وزوجي راح الدوام انقههرررت ) دقيت عليه قال هاه وش الأخبار قلت له خلاص ولاده ودقيت ع أمي وجات على طول لأن بيتنا قريب من المستشفى وسبتقتني فوق لان زوجي كان في الدوام على ماجا يخلص الأوراق .. وودوني فوق الا ألقى أمي قبلي وطبعاً ماخلوها تدخل وحطوني ع سرير ( المعاناه ) وحطت لي التخطيط في البدايه كان اوكي بس مع كل طلقه كان يضعف نبضها وجات الدكتوره ( القصاب ) قلت لها أبي مسكن قالت لازم اكشف قبل قلت لها خلاص مو لازم مفتوح 6 قالت لا لازم عشان اشوف إذا اعطيك مسكن أو لا وعطتني الأوكسجين بس دووخني وجآت كشفت ( المجرمه ) الساعه 9 ونص تقريباً لقته 7 واسمعها تقولهم خلاص جهزوا ال?اكيوم وراحت شوي الا النيرس تناديها تقولها دكتوره النبض ضعف مره ثانيه انا هنا خلاص مَ قدرت اتحمل قعدت اصيح جات وحطت يدها قمت أصررررخ عليها أقولها حرام عليك ارحميني قالت خلاص انا بريحك قلت يعني بتفتحين المويه قالت ايه وفعلاً فتحتها وحسيت فيها وهي تنزل وخلت يدها داخل وتقولي ادفعي وانا أصررخ عليها اقولها. طلعي يدك لانها توجعني قالت لا ادفعي ابغى اشوف الراس ودفعت قالت هذا الراس نازل ادفعي مره ثانيه والألم شيء فضيع عساكم ماتجربونه لأن يدها داخل شيء يوجع ومو راضيه تطلع يدها الا لما تأكدت ان الراس نزل وااجد . وانا كنت ماسكه جوالي بيدي وطاح مني وجات نيرس حسبي الله عليها مدري سودانيه أو من اهل مكه قالت الحين شلون اجيب لك الجوال لازم تحطينه في الامانات قلت لها لا خليه عندي وفعلاً خليته عندي ولما التفتت عليّ لقت الدم على السرير قامت تهاوش وتحركني عشان ألف على جنب وتقول هذي لخبطت لنا الدنيا وقامت تصرخ عليّ انا شذنبي هم اللي وسعوا الرحم وافتحوا المويه شيء أكيد بينزل دم وماي قهرتني وهي تهاوش . المهم ودوني ع غرفة الولاده وانا أصيح آآآآه شيء يخووووف وقالوا لي يلا قومي من هالسرير وروحي ع السرير الثاني قلت لها مقدر دايخه ، من الاوكسجين مدوخني راحت من الجهه الثانيه ومسكت يدي وقالت يلا تعالي ورحت بس مدري شلون عرفت اتحرك وقالت لي نزلي جسمك شوي وارفعي رجلك قلت لها مقدر انتظري لان فيني انقباضه وهي تهاوش مستعجله ولما خفت الطلقه نزلت جسمي ورفعت رجلي ورشت عليّ بنج وبعدها عطتني أبر حوالين المهبل حسيت بالأبر شوي وكل ماحسيت بطلقه ادفع والممرضه تقولي لا والدكتوره تقولهاا خليها تدفع افضل ، لان الراس كان نازل خلاص واحسه بيطلع وخفت الطلقه وقفت دفع وكنت اصيح واقول يارب ارحمني قالت النيرس هذا احسن شيء تقولينه ولما ارجعت الطلقه دفعت مره ثانيه الحمدلله عرفت ادفع وعرفت متى ادفع ومتى اوقف دفع . قالت لي الدكتوره إذا جات طلقه ادفعي قلت اوكي ولما حسيت فيها قلت دكتوره ادفع قالت إذا فيه ادفعي لمست النيرس بطني قالت لا مافيها طلق .وانا حاسه فيه وطنشت ودفعت قالت لها الدكتوره هي حاسه فيه ولما دفعت قالت الدكتوره احسنتي ادفعي ولاتوقفين الراس واضح هذا انا اشوفه قالت النيرس فعلاً الراس واضح ادفعي بقوه ودفعت بأقوى مافيني وطولت بالدفع عشان أبي ارتاح وراحت الطلقه وقفت وأخذت نفس وأصيح اقول يارب رحمتك لما جات الطلقه اللي بعدها قلت دكتوره بدفع قالت يلا ودفعععت بقوووه وقالت لي استمري واشوفها ماسكه مقص وسوت لي التوسعه وجابت ال?اكيوم وحطته وقالت ادفعي دفعت وفي لحظه حسيت بشي يطلع وطلعت مني صرخه غصب ورفعت راسي عشان اشوف وشفت بنتي والدكتوره المساعده تسحبها الساعه 10:59ص و صرت أكرر الحمدلله الحمدلله، أبي اشوف بنتي قالت رح تشوفيها بس ينظفونها وعلى طول المشيمه طلعت وضغطت شوي ع بطني وقالت الحمدلله بس شفتها مرتبكه قلت لها شفيك لا يكون فيني نزيف قالت مافيه نزيف ولاحاجه بس قولي الحمدلله انك ولدتي طبيعي البنت نبضها ضعيف ومتبرزه في رحمك انا خفت وقلت طيب خلوني اشوفها لانها اول ماطلعت ماصاحت خفت عليها بس بعد ماقاسوا وزنها صاحت ، المهم بدت الدكتوره تخيط وماكنت احس بألم الا نغزات خفيفه بس كنت خايفه وشاده جسمي وبعدين أرخي أخاف تخترب الخياطه وبعدين أشد غصب لأني خايفه ، وجلست تخيطني من 11 الى 12 الا ربع تقول سويت لك كبس خياطه تجميليه بس الين اليوم لي 20 يوم وهي تألمني ومخوفتني لانها طويله واللي بالفخذ صايره كأنها مفتوحه حمرا واللي داخل تحرقني ما أدري من الخياطه أو التهابات بس أنظف عدل وهي قالت لي أهم شيء الماي و الملح بس ان شاء الله الله يسهل . المهم كنت طول الوقت التفت واقولها جيبوا بنتي أبي اشوفها قالوا انتظري بس نخلص ولما خلصوا جابوها لي قالوا شوفيها وشفتها كانت تجنن وصغيره بس ماخلتني امسكها قالت خلاص بوديها قلت لها وين قالت الحضانه قلت طيب ببوسها وبستها آآآآه تجنن ربي يحفظها ، ودوها الحضانه حد يقولي متبرزه في البطن وأحد يقول لا المويه كان لونها أصفر يمكن وسخه وثاني يوم جاها صفار وحطوا لها الإضاءه وغطوا عيونها تعووور القلب وخلوها 7 أيام قالوا بنعطيها مضاد عشان يمكن تكون انتقلت لها جرثومه منك بس ماأدري بالضبط وش اللي فيها وما أدري وش هالجرثومه اللي يتكلمون عنها .. بعدين قالوا السبب اني كنت آخذ علاج لحصى الكلى مع إني تاركته قبل الحمل بشهرين . بس للحين ماعرفت شاللي فيها بالضبط . آخر شيء قالت دكتورة الأطفال انها عطتها المضاد احتياط عشان لون المويه اللي في بطني كان متغيّر .. بس الحمدلله الحين بنوتتي بحضني طيبه وبخير واليوم دخلنا 21 يوم الله يحفظها لي يارب ويعطيها الصحه والعافيه ويقر عيني وعين ابوها فيها ..
واسمحوا لي ع الإطاله ودعواتكم لبنوتتي
07-21-2012, 02:54 AM
11 شعبان ولادتي 1يوليو
أم نجلاء 87 
جديد منتدى إستفسارات مرحلة الولادة
العرض العادي
