ادعولي ’(

[Eth]

السلام عليكم ورحمة الله وبركاته ’)
بدخل على طول في الموضوع وبحكي لكم وياليت احد يكون جنبي مااعندي احد احكي له هالوقت واحس مخنوقة و كذا ..
انخطبت في شهر 8 لـ عام 1433 و ايام الخطوبة كنا نسال عن خطيبي واخلاقه وووألخ ..
بالرغم من انه يكون ولد عم ماما الكلام اللي وصلنا انه مغازلجي وانه احسن واحد في اخوانه وطيب مرة وفيه خير لاهله ..
فكرنا بالموضوع وتوكلنا على الله و على انه مغازلجي الا انه قلت بعد الزواج اسمع ان الرجال يتركون هالخرابيط لانهم في بداية حياة جديدة ..
المهم ملكتي كانت بيوم 15\11\1433 فترة ملكتي كنت اكره زوجي واسلوبه في الكلام معاي و عن الجنس *اسفه* يعني يحكيلي بشكل مقزز لدرجة كنت ابكي اوقات واحكي لماما عنه وتقول لي كل الرجال كذا والواحد عادي يقول لزوجته كلام وصخ وووآلخ
في نص فترة ملكتي اخذت البن حقه واعطيته صديقتي و كلمته عالبي بي واعطاها فيس وارسل لها صورته ويكلمها عاااادي بعدين كشفته وهزاته و رجع يكلمني يقول لي اصلا ادري انه انتي ارسلتيها < كذاب بس عشان يغطي على عيبته ..
المهم اليوم الثاني دقت اخته الكبير المتزوج العاقله اللي تدري بكل شيء عنه و راح ارمز لها بحرف *س* و قالت لامي انه اخوي الصغير اللي كلم البنت و زوج بنتك ماله دخل وقعدت ترفعه فوق السماء لمن صدّقناا و قلنا الحرمه كبيرة وماتكذب ..
بعدين تزوجت في تاريخ 5\5 و رحنا نتمشى للثلاث الايام الاولى و طول الوقت ابو زوجي يدق ويقول ارجعوا فيه واحد توه طالع من المستسفى و سوو له عزيمة واحضروها مع انه مايصير لنا مرة .. ومن ناحيتي مايقرب لي ابد ...
عصب زوجي ورجعنا على طولل للرياض و مرة نام وهو عنده جوالين وقلت يلا يابنت الناس طقطقي وشوفي مقاطع وكذا ونا والللله واللي يفقدني عيوني ماقصدي ولا شكيت فيه ولا لحظة انه يكلم بنات فتحت جوالاته انصدمت مرة ’(
بنات كثير ومقاطع سكس وصور اباحيه حسيت وقتها قلبي بيوقف و بموت من اللي شفته لان ماعندي اخوان كبار وماعمري قد فكرت افتش فون ولد او شاب ..
من يومتها ونا وهو هواش و كل اسبوع يقول لي اتوب وبعد اسبوع اكتشف إنه يكذب علي وينزلني لاهله ويهاوشوني ويمسحون فيني الارض ونا مااقدر اقول ولا حرف بحجه انهم اقوى مني واكبر مني وانا عمري 19 ولسسا مادخلت العشرين المهم في عيد ميلاده بشهر 7 اهديته لابتوب بكلفه غاليه و بعد اسبوع اكتشفت انه يدخل الشات ويتعرف على بنات و قلة ادب تصير مايدري فيها الا ربي نزل لابوه ويقول هي تنكد علي وهي تسوي لي وتسوي لي وتسوي لي و يقعد يتبلا و ابوه ينزلني ويقعد يهاوشني وزوجي يجلس يبتسم لي قدامه ..
يعني مريت باشياء وحده ربي الاعلم فيها بعدين اخوي اللي اصغر مني على طول جاني هنا لان كان بينه وبين بابا مشاكل وخايف منه و وقت رجعته لاهلي قلت بروح معاك على اساس احل الموضوع وارجع يومها في الصباح على اخر شهر 8 قلت له اعطيني جوالك بكلم بابا عن اخوي عشان يسامحه قال طيب واعطاني اياه و دقيت مايرد ودخلت المسن لمن شفته مفتوح ولقيت له محادثه مع بنت وفيها كلام وصصصصصصصصصصصخ و وقح وكلام واللله العظيم ماينقال حتى الا لوحده *عاهره* ..
بعدها نزل زوجيوقعد يتبلا علي كالعاده ونزلني ابوه وووآلخ وعلى اساس تصالحنا وطلعت بيتي شوي الا يبدا زوجي يتحكم ويتشرط ويسب ويتكلم علي وقتها دعيت عليه *حسبي الله عليك الله ينتقم منك يافلان الله ينتقم منك يافلان الله ينتقم منك يافلان يارب توريني فيه الويلل* ونزلت تحت وانهرت بكاء ولاولل مرة ابكي كذا في حياتي حسيت طلعت كل شيء فيني وقعدت اصرخ واقول كل بلاويه اللي يسويها فيني وتدرون وش سوا وقتها ابو زوجي ؟
متكي رجل على رجل و يشرب قهوته ومايناظر فيني وبس خلصت قال لولده ياولدي ليه تسوي طذا الله يهديك زوجتك عند خلاص لاتناظربرا < بكككللل هدووووووووووووءء
وقتها حلفت لاسافر بيني و بين نفسي و رحت ترجيت زوجي وقلت راح ارجع وصرت اتقرب له واضمه وكذا جوراح دوامه بعد ماوافق بعدها سافرت مع اخوي عند اهلي وقلت لهم كل شيء يعني بداية شهر رمضان ونا عندهم ..
اختبرته بعد على الايميل واعطاني وجه وارسل لي صورته واعطاني رقمه وارسل لي صورة *ذكره* اسفه بس ابغى احكي لكم كل شيء ’’’(
بهدها دقيت عليه وهزاته وقلت تبغاني تعال خذني بنفسك وقفلت بوجهه ..
جلست عند اهلي شهرين واللله العظيم لانوم ولا راحه وكل شوي ابكي وكل شوي احلم بكوابيس بسببهم و صاورا يدقون يهددون و يقولون رجعوهاا وكان اكثر طريقهم على امي لانه ولد عمها ذا ..
اخر شهر 10 ابو زوجي دق على ابوي وقال له انت امر والمكان اللي تبغاه نجيك فيه وماراح نرد لكم ولا طلب و قال بابا ان شاء الله كل خير كل اللي ابغاه تروح في بيت مستقل لها ولزوجها و محد يتدخل فيهم قام ابو زوجي قال يكون بعلمك هي عندها غغرفتين ومانظفتهاا بتنظف شقه كاملةة ؟؟
لكن لكم اللي تبغونه والصلا ادري ان كل البلا من امها الا محمد مايسوي شيء واتفقوا انهم يتقابلون في الطايف ..
دق ابو زوجي على ماما اليوم الثاني وقعد يتلفظ عليها وقال لو ماترجعين البنت والله لاسوي واسوي و ماما حطت السبيكر و بابا موجود وقالت لابو زوجي طيب ليه تدخلني بينك انت وحسن مو اتفقتم انكم تتقابلون في الطايف ؟
قال ابو زوجي *للا ماقلت له كذا هو اللي قال من راسه وقلت له لا البنت ترسلونها لنا في الطيارة* و بابا مصددددددددددددوم منه معقولة شايب وباخر عمره يكذبني او يكذب يالله حسن الخاتمه !!
وقتها صدق بابا انه كذاب بكل شيء قاله عني ..
وانا ان كذبت بشيء الله لايسامحني والله العظيم اقوم من احلى نومة عشاان اطبخ مع العلم اني اسهر الليل كله عشاان اخاف انام لوحدي وزوجي دوامه من 10 الليل لما 7 الصباح و اقوم اسوي غداء عشان ماتصير مشاكل و انزلل عند اهل زوجي يومياا مع العلم ان زوجات اولادهم مسسستحيلل يجون الا كل اسبوعين وبالتحديد يوم الخميس ..
و اتعب تعب مايدري فيه الا ربي لدرجة صرت احط حرتي بالاكل و بس اكل لما زاد وزني وصرت بشعه وحاولت كثير اسوي دايت ماقدرت احس مافيني ’(
المهم بنص الليل بداية شهر 11 دق خالي على ماما وقال لها ان اهل زوجي نص ساعه او ساعه وهم عندناا عشاان ياخذوني وبنص الليل تخيلوا المهم وصلوا واستقبلهم بابا من عز نومه احسن استقبال و جلسوا يتكلمون كثير ولمن اتفقوا على كل شيء قال لي بابا خلاص اي شيء يصير معاك كلميني وجلست ابكي لمن طحت وقمت وسافرنا على طولل من يومهاا كل شيء تمام وزوجي صار يحترمني وصرت بخير ومرتاحه ومححد صار يدخل علي في بيتي فجاة ولا صار يجبرني انزلل لاهله زي اول ..
بعد مارجعت باسبوع ويومها كنت تعبانه من القولون وكنت راحيه للمستسفى بنص الليل قاللي حبيبتي ابغى اقولك سر بس اوعديني ماتزعلين قلت قول قال لي انا كنت اكلم وحده واحبها مرة كنت اكلمها من يوم عمري 17 *وعمره الحين تقريبا 25* وتركت التفحيط عشانهاا وقعد يتكلم ويتكلم ويمدح ونا ساكته من صدمتي ماادري وش اقول بلعت ريقي وقلت طيب ليه ماتزوجتهاا انقلب وجهه وتنهّددد بققققققققوةوقال اهلي رفضوا وقلت طيب وين هي قال في خميس مشيط قلت اهااه بعيده مره قال ايه وصلت المستشفى وتعالجت ورجعنا البيت وجلست ابكي وقعد يهديني ويقول هي شيء ماضي وانتهت وماادري ايش من هالكلام ..
و قلت بقفل الموضوع مع اني كنت ابكي حتى من وراه مايهمني الكلام اللي قاله نظرته فيها حزن بشكل مو طبيعي لمن جاب سيرتها يعني جد يحبهاا للحين ..
اخر شهر 12 هجري لقيت معاه جوال غير جواله اللي اعرفه وسالته لمين قال لي ومالك دخلل ووآلخ وطلبته اياه عشان افتشه مالقيت فيه شيء قلت له اعطيني جوالك الاول وفتشته ولقيت مسجات من وحده انا حافظه رقمهاا من بدايه زواجي وكانت دايم تكلمه قلت هذا رقم مين قال خويي في الدوام قلت لاتكذب علي وقعدت اهاوشه لما اعترف وقال ايه رقم بنت اخذت رقمها وقلت راح اسالها ولو بينكم شيء راح تطلقني والله مااعديها لك وجلست ابكي طول العصر بعدين قال لي اتصالاتي لها عشان ابغى اكلمهاا واقول لها ابعدي عني انا انسان متزوج ...آلأخ وصدقته وطلعنا نتمشى
في يوم 12 نوفمبر م*يلادي* دق علي واحد قال لي كيفك اخبارك قلت نعم مين !!
قال لي اوه معليش بالغلط قلت اوكي باي و رجع دق على رقم لي جديد محد يعرفه غير زوجي واهلي وبعض صديقاتي المقربات جدا و انصدمت شلون نفس الرقم يدق علي !!!
وقتها قعد يرسل لي مسجات زوجك خاين وزوجك خروف وكلام كثير واعطيت الرقم زوجي وتهاوشوا
شوي الا ويرسل لي هالرجال *تعرفين الهام* وقتها تذكرت مرة تهاوشت في رمضان مع وحده عندي في البي بي اسمها الهام وتصير صديقة صديقتي دقيت على زوجي وحكيت له و قعد يسالني وين هي وكل المعلومات اعطيته اياهاا عنها ..
طول ليلناا مكالمات ومسجات مع هالرجال ونا حسبالي الذكيه في القروب وقلك محد قدي وانو اعرف ان الهام صديقتي والرجال يقول ان الهام صديقة زوجك وزوجك مايستاهلك وكلام كثير ..
جاء الصباح زوجي وتهاوشنا وقال لي المفروض ماتضيفين اي احد وجوالك راح ابيعه وشريحتك باكسرها اشتريت لك رقم ثاني عشان .. قاطعت كلامه قلت قصدك انا اكلم شباب !!!!!
هز كتفينه بمعنى ماادري عنك ..
عصبت وكتمت نفسي وانفاسي اختنقت وقمت بنام وطلع برا البيت ويصك الابواب بقوة ومسوي قلق بالبيت ونا ماسكه على راسي وابكي المهم التهب قولوني ودقيت عليه مقفل على طولل ورجع دق علي بعد نص ساعه وقال لي شفيك قلت بطني يعورني بس خلاص قال لي طيب احبك وقفلت منه ..
رجع من برا مبسوط محد قده ماادري وش الطاري
جاء يوريني مسجات الرجال له وهو يقول له الهام تنتظرك والهام مدري وش ونا اضحك مع زوجي على اساس انها الهام صديقتي تبغى تخرب بيننا ..
دخل على رساله مرسلله بالغلط مكتوب فيها *الهام ردي انا محمد* وقتها انصدمت جلست سااااااااااكته وهو يحاول يصرف مع انه قراها بالغلط قلت ارجع للمسج الاول قال اي مسج وانكر وسوالي قلق لما رفعت صوتي عليه وقلت له ارجع المسج بسرعه قال لي قديم من زمان قلت لا مو قديم لما فتشت اول ماكان موجود !
قال واللله قديم وجلس يحلف قلت افتح على التاريخ !
فتح طلع يوم 13 نوفمبر يعني اليوم وجلست اضحك لمدة نص سااااااعه وامسك على راسي وهو مصدوم من حالتي اللي انا فيها قدامه واقول له يالله طول الوقت كنت مخدوعععه !!!!!
يعني الهام صدق انت خويهاا وانا جالسه اكذب الرجالل !!!
ياربي وش ذا اللي انا فيه !
وقلت له انا بخليك وبروح والمهر بيوصلك جلس يترجاني انا والله احبك ومااحبها ومن هالكلام اللي مليان كذب ..
قال مو هنا بعد تطمني هي في الجنوب في خميس مشيط قلللللت اييييييييييييش !!!!
يعني اللي كنت تحبهاا !!!
ياربي وش اسوي ’’(
ومابكيت ابد في هاليوم واليوم الثاني انهرت جد انام ساعه واقوم ابكي وهو في دوامه مو عندي والله العظيم ذي حالتي اناا اللي مجنني كيف وصل رقمي الجديد للرجال الغريب !
و اخته الكبيره *س* واقفه ضدي بكل الاحوالل وهي كانت بين محمد زوجي وخويته الهام وتوسطوا اخوانه عشاان يتزوجهاا قبلي بس ابوه رفض وكل هالمعلومات اخذتها من اخت محمد الثانية وقتهاا قررت اتركه شلون اعيش مع واحد كذا !
مو مريحني ابد و غير كذا للحين يحبها والدليل مايدافع كثير عنه لما اقول هالشيء !
انا ماحملت ويارب مااحمل وماادري وش اسوي ابغى اتطلق يعني شوفوا كيف حياتي ونا لسا مادخلت العشرين !
الحمدلله على كل حال بس تعبت كثير انا اعشقه بشكل مو طبيعي بس هو مو مقدر حبي له ولا التضحيات اللي اسويها عشانه صار لي 3 ايام لانوم ولا اكل ولا راحه وكله احلم باشياء تعور القلب وهو مرتاح وماهمه شيء ’’(
امس دقيت على الهام خويته وهزاتها وقفلت و رجعت دقت علي وقالت لي واللع العظيم هو اللي يدق علي هو اللي يرسل لي في الفتره الاخيره اقول له ماابغى اكلمك خلاص ويرجع يكلمني و صار لي شهرين متزوجه وحاسه فيك وماابغى بيتك يخرب بسببي صحيح صار بيننا علاقة حب بس مافيه نصيب وانا قنتنوعه زوجك هو اللي يكلمني مو انا ..
وانا واثقه بكلامها لاني شفت بعيني هو اللي يدق عليها مو هي وسجلت كل كلامها عشان يكون دليل ضد زوجي لو حاول ينكر مثل اول ..
بعدين رجع كلمني بعد ماكلمتها قال لي بوديك لبيت اهلك < وهو معصب قلت له ليش قال من غير لييش
قلت طيب قمت جهزت اغراضي ودقيت على الهام على اساس بشوف هي قالت له شيء ماردت ومرة مقفل ورجعت هي دقت علي وقلتها لها كلمتيها واحلفيلي وووألخ قالت ليه وش صار بينكم قلت لها كل السالفه ..
رجع دق على قبل الفجر قال لي هللللاااا حبيبي كيفك اخبارك < كانه ماقال لي شيء وعاتبته عالكلام اللي صار وقال لي كنت امزح ..
ماابغى اظلمه واظلمهاا بس انا متاكده هي رجعت كلمته لوقالت له لاتخرب بيتك وروّق واستانس ورجع يراضيني لعيونهاا ..
وفيه اشياء تثبت هالشيء بس مافيني اكتب تعبت ..
وش تنصحوني فيه الله يخليك كل اللي في بالكم قولوه جد حالتي مرة تعبانه ’’( ابغى اتركه خلاص حتى لو احبه الحب مو لوحده يكفي ..
باذن واحد احد اتركه ..
والله العظيم ماعمري ضريت احد من اهله وحتى لو احد ضرني او يدقني من تحت لتحت اسكت وابتسم اللللللله لايسامحني لو كذبت باي كلمه كتبتهاا في هالموضوع وربي على كل شيء اعلم ..
وهذا كله جزء بسيط من اللي يصير بالتفصيلل ..
و خللص ’’(

[املي بلله]

الله يكون بعونك ياختي.والقرارقرارك بِــ??سّ من ناحيه زوجك غلطان مليون بلميه واهله برضوه غلطانين لانهم مازوجوه الي يحبهامع احترامي لك لان وش ذنبك انتي تقهرين كذاكلميه وقوليله اناخلاص حتى لوكلام ماعدلي قعده معاك تعبت من كثرمتحملك لوانت متحملتنيي وش ذنبك يتزوجك وقلبه مع وحده ثانيه حرااام. الله يعينك وطمنيناعنك

[om yosof]

رأيي لو كملتي حياتك معاه راح تتعذبين لانو واضح انو يحب هالبنت مرره ..استخيري كثير وادعي ربي واتخذي قرارك وتوكلي على رب العالمين..اصعب شيء في الحياة من وجهة نظري الحب من طرف واحد..

[روعة النسيان]

اسمحيلي اقولك حبك له مو حب هبال دوسي عليه وعلى قلبك هذا ذالك وش تنتظرين منه
ليه معذبه حالك مع واحد مايستاهل في رجال يحبون حريم ومالله كتب لهم نصيب وتزوجو غيرهن وعاشو حياتهم بما يرضي الله يعني مو مبرر له حبه لوحده قبل مايخاف الله هذا يغازل معصيه ذي يرسل صور عورته معصيه حتى لو مو صور له ماله شخصيه او تدري مو رجل كل مشكله بينكم يروح لبوه ويشكيك عنده وابوه من المراجل ينزلك ويهزئك وانتي ساكته وراضيه واهلك مثلك اصحي لنفسك جلوسك معه بيدمرك كيف ترضين عليه وانتي تدرين انه يراضيك علشانها او كيف حتى تكلمينها وتشكين لوحده ماصانت عمرها وماخافت ربها تكلم رجال والله اعلم باللي بينهم
كيف ماطاح من عينك كيف للحين عايشه معه بصراحه قهرتيني بسلبيتك شافك ضعيفه كلمه توديك وكلمه تجيبك مالومه تدرين اخرتك معه شيئين ياتنفصلون ياتنجنين هذا مجننك لا محاله إلا إذا الله كتب له توبه ومافي شي بعيد عن الله

يمكن ردي قاسي عليك بس جد مقهورة منك وعليك ومنعت نفسي لاكتب كلام اكثر
الله يهون عليك ويخلصك منه إذا انتي انسانه سويه ماعندك مشاكل او عند اهلك شي يعني يخليك تنجبرين تعيشين مع واحد مثل هذا شوفي حياتك بعيد عنه توك صغيره بس معه بتشيبين ويمكن تصيبك امراض نفسيه

والغلطى في الاول والاخير منك انتي واهلك كنتي صغيره يوم خطبك والمستقبل قدامك رضيتي به وانتي تدرين انه مغازلجي (مغازلجي تحمل معاني كثيره مو بس مكالمات ) على اساس انتي بتصلحينه إذا ماترك هالخرابيط خوفا من الله مو تاركها على شانك
الله يرشدك للطريق السليم ويهديك لاتستبعدين انه يتهمك تطلين مع شباب لان الشك بيدخل قلبه كلا يرى الناس بعين طبعه

استغفر الله العظيم من كل ذنب عظيم

[lody]

لا حول ولا قوة الا بالله العلي العظيم ،،
أسأل الله العظيم أن يفرج كربتك ويهديك للخيآر السليم ،،

حبيبتي اسمعي مني الكفآر يسلمون ،، مو صعب إن العآصي يتوب ..
لكن كيف تعرفين اذا ممكن يتوب ولا لا !! .. أكيد (( بالإستخاره ))

انتي استخيري ربي ومحد يعرف الايآم اش ممكن تقدم لك ،،
يمكن ربي يهديه ،، وبعدها يحطك في عيونه عشآنك صبرتي عليه ..

انا ما انكر انتي في مصيبه لانه رآعي بنات ،، طيب الي يكون زوجها رآعي اولاد فهي في مصيبتين ،، والله العظيم اعرف وحده زوجها رآعي اولاد ولا يقرب منها الا نادرا ويدخل فلبينيين عندها في بيتها ، ويقفل عليه المجلس ، وتتسحب لين عندهم وتشوفهم من تحت البآب << يعني تخيلي حجم الكارثه الي فيها هالانسانه ..
والله العظيم انها صبرت واحتسبت ،، وليتك تشوفي حالها الحين كيف محترمها ومقدر صبرها عليه ..

انا ما اقولك انتي اصبري واحتسبي لأنك في النهآيه ما تملكين ضمآن ان حاله بيتصلح وانتي توك صغيره ،، انا اقولك ربي عآرف الخير وين عشآن كذا استخيريه مره واثنين وعشره لين ما تتخذين قرآرك وانتي مرتاحه ،،

[ابتسامه رغم الالم]

حبيبتي انا اقولك هالكللام مو لاجل اخرب بيتك بس اللي جالس يصير لك شي لا يطاق بصراحه مستغربه من بدايت قصتك الين الحين
اولا سألتو وقالولك انو مغزلجي ليه وافقتي حتى لو كان ملك الاخلاق ما قالو لك كان مغزلجي وتاب جعلوها لك انها من صفاته انو مغزلجي والله حتى اهلك ضحو فيك بدري كان استنيتي طالما انك صغيره لحد ما يجي اللي يستاهلك طبعا هذا الكلام ماعاد ينفع الحين

حبيبتي خذي الامر بكل جديه لان زوجك كمان صغير ولسى ما انتهت رحلته المراهقه عنده ولانه مو متحمل المسؤليه ابدا كل اعتماده الكلي على اهله فلازم انتي تكونين صارمه وجاده خياناته المتكرره لك لازم اهلك يعرفون فيها وتحلينها روحي لهم وقولي كل شي وانك موراجعه له لحد ما يصير رجال ويعرف انو صار رجال متزوج والبنت اللي كان يكلمها ايضا متزوجه وهي كانت حبيبه وخلاص انتهئ الامر وماهو ذنبي تتزوجني وتعيش انت في غرامياتك اللي ماتخلص واعيش انا في الهم والنكد طول حياتي انتى لين الحين ما عندك اطفال لو صار عندك راح يقولون اصبري عشان اولادك ومن هالكلام لكن طالما انك على بدايه الامر فكوني انتي صاحبه القرار
واذا اهله طلعوك غلطانه قولي امسكو ولدكم وربوه من جديد او خلوه لحد ما يكبر لان بنات الناس مو لعبه ومشاعرنا ليست تباع وتنشرى انا انسانه عندي احساس ومشاعر تركت بيت اهلي لكي القي زوج و اهل يحتضنوني واكون وحده من بناتهم موجايه لسجن اتعذب فيه وبدون سبب وبعدين لا تجلسين تصدقينه في كل مره يختلق فيها الاعذار وانه ماراح يرجع لهالحركات خليه يحس انك فقدتي الثقه فيه حتى لو من داخلك صدقتيه ولكن ليسترجع ثقتك فيه من جديد
هذي مشكله بعض الاهالي اللي يزوجون اولادهم وهما ليسو بأهل للمسؤليه والله حررررررررررررررررررام
ربي يسعدك ويوفقك وتعيشين بحياه سعيده وهنيه يارب

[siham-it]

و الله قلب توجع عليك حسبي الله و نعمه الوكيل باين فيكي بنت ناس لصبرك عليه لهده الدرجه و هو ما مقدر، الله يعينك يا رب و تبت قلبك عل قرار الصحيح ، رغم أنك صغيره جداً إلاً أن صبرك أكبر منك بكثيييييييير ، الله يعينك الله يعينك الله يعينك، صلي صلاة ٱستخاره ونا أنصحك عدم تفكير في الحمل حاليا حتى تجدي حل مع زوجك الله يهديه يا رب وما يضيع من إيده بنت ناس زيك و الله نعم صبر و نعم تربيه ربي معك

[Eth]

جزاكم الله الف خير والله ريحتوني بكلامكم حتى لو نقد ياااررب تدخخللون الجنه ’(
انا ادري اني غلطت ولازم اتحمل غلطي لما وافقت عليه لكن الحمدلله على كل حال وش اقول اكثر من كذا و انان فيني عيب اعتبره عيب جد جد اصبر فوق طاقتي صبورة لابعد حد انا ماانكر انه هو يحبني يحبني زوجي بس برضه يحب هالاشياء الوصخه ومن ضمنهاا الاخت الهام لكن ماراح اسامحه و بيجي اليوم اللي اتركه فيه ..
خل احكي لكم اليوم الصباح رجع من الدوام معصب و يضرب في الابواب و اطارد وراه شفيك وش صار وسكتني يقول مافيني شيء قلت اوكي كيفك ورحت اشوف التي في افلام كرتون عشان انسى اللي انا فيه < فيلم كوميدي ><"
جاء جلس جنبي و لمن شافني مااعطيته وجه قام راح لغرفة النوم بينام بعد ربع ساعه لحقته قلت انت تبغاني ولا لا !!!!
ناظر فيني باستحقار وقال اسالي نفسك هالسؤال !
و للاسف مااخذت منه رد و قال انه زعلان لان ابوه مسكه عالفجر وهو راجع من دوامه و جلسوا يهاوشونه اهله عشان المكالمات والهام و لعنوا خامسه يقول اسرار بيتنا ليه تطلعينهاا وليه تقولينها لامك وامك تدق على ابوي < مع العلم ان مو امي اللي حكت بس حطوها في امي عشان يشيلون الشبهه عن بنتهم اللي حكيت لها كل شيء وهي بدورها خانتني وقالت لاهلهاا !
لكن عادي اتوقع اي شيء ..
و نزلت لابوه بكل شجاعه واول مرة اسوي كذا و رحت بهاوش ليه يدخلون امي في الموضوع وووآلخ
المهم نزل وراي زوجي و جلس يتصنت علينا وانا حكيت كل شيء لابوه و دخل فجاة وجلسنا نتهاوش وقت طويلل وقال لي ماعليك مني < بمعنى مالك دخل فيني ...
رفعت يديني وقلت هذا هو سمعت وش قال !!
انا هنا انتهى دوري وجيت بطلع بيتي ويوقف قدامي ويضمني و يقعد يمزح ويتكلم وكان ولاشيء صار
اقول لكم ليه !
لمن شافني جاده وباتركه قام يبغى يصرف واعترف بغلطه قدام ابوه وانا اخر كلمتين قلتهم لزوجي وابو زوجي اول شيء : مو اول مرة يسوي هالشيء ويعتذر ويرجع يكرر الغلط !
ثاني شيء : انا ماراح اسامحه ..
و طلعت فوق لا انا اللي قلت رضيت ولا انا اللي قلت زعلانه ..
وكلمت بابا وبيجيني ويتفاهم معاهم وياخذني لاني تحملت الكثير والكلام بين رجال كان اخر مرة يعني هالمرة بابا يتفاهم معاهم مو انا وانا انتظر وصوله ..
مااقول الا الله يعوضنيي وانا متاكده راح نفترق لان مو بس مشكلتي الهام حبيبته بنات غيرهاا كثير ..
حسبي الله وكفى ..

[Eth]

اسفه عالردود المختصره بس والله مايمديني امسك اللاب لاني مشغولة اعذروني حتى بالقوة انام ..

وتاكدوا ماراح انساكم من دعائي =’’(

[Eth]

انا كلل مااقول له باتركك واعزّم واكون قد كلمتي يجيني يبكي ويترجاني ويبوس رجليني ويديني ويحلف لي بالله مايضرني ولايجرحني يعني بالعربي يسويلي فيلم هندي بس خلاص انا والله لهنا وبس احس بعد ماعرفت بسالفة حبيبته واهله يدرون بكل شيء !!!!
نفسي عافته ولو ان له شوي بقلبي بس وش ينفع دايم اقول لو انا الهام اكيد بيعيّشها احسن عيشه و بيونسها وبترك اهله عشانهاا دامه يحبها !!
ياربي بس ابغى ارتاح واهلي واخواتي الكبار مؤيدين فكرة طلاقي لان هالشيء مستحيل يتعدل والله ادري باللي بيصير اليوم فرضنا نقول بسامحه بعد اسبوع ولا اسبوعين اشوف منه شيء يعفس حياتي فوق تحت !!
و دايم يهددني لاني باتركه يقول لي لو رحتي تزوجتي غيري والله لاجي اضربه لما يطيح وخليني ادخل فيه قسم الشرطه مايهمني واقوم اهاوشه اقول له لو افترقنا كل واحد يعيش حياته ويعني حسبالك باسكت عنك !!
بارفع عليك قضية و بخليك تتشرشح حتى بعد مارحت عنك وابغى ارتاح تضايقني ؟؟
قال والله مافكرت فيك ولا فيه ولو تزوجتي باضربه ومن هالكلام قال ايش قال ليه يتزوج زوجتي !!
ذا كلام رجُل عاقل !!