السلام عليكم ورحمه الله وبركـأته ..
من فتره وانا مرات امرر على منتداكم وكان من منى نفسسي وخاطري اني انضم لكم .. لاني كنت متشفقه على الحمل .. وكل يوم ادعي ياارب احمل واسجل بمنتدى حووامل .. والحمد لله ربي استجاب دعووتي له الحمد والشكررر ..
ابي اقوولكم " قصتي مع الحمل " كبدايه تعريف لي ..
انا تزوجت وعمري صغير ولا كنت مهتمه للحمل وقتها بس مع مرور الوقت حسيت باحساس غرريب خفت افقد الامومه وماصير ام طوول عمري هالموضوع بدا يشغلني ويشغل زوجي ليل نهـأرر . وبحثنا عن شتى الاساليب مابقى دكتور او دكتوره مارحت لهم والكل يبصم ويشهد على مقووله " انتي سليمه وزوجك سليم " . " رحمك مهيـا للحمل " " تبويض زوجتك سليم " " تحليل زوجك كواليتي وسليم جدا " " المفروض تكونين حامل ليه نزلت لدوره " ... الخ وغيـرها وغيــرها
في فتره اصابني اليـأس .. والله مررت بي ايام كنت اقول بخاطري فلانه وفلانه وفلانه حملوا وش زودهم عني :( وارجع اقوول استغفر الله
كـأنت نفسيتي بالحضيض لو اقولكم كل شهر اتهاوش مع زوجي مرتين واجلس ببيت اهلي كم يوم والسبب الحمل :(
تعكرر جوي ومزاجي وبدال مااصير بالعشرين صار عمري بال 50 من الهم اللي بقلبـي
صررت افكر بالانابيب والتلقيح المجهرري وبيني وبين نفسي اقوول ياارب لاتوصلني لهالمرحله ..
دخلت بقروب متاخرات عن الحمل وكلهم من 10 سنوات وفوق جاني احبـأط لدرجه كنت ادعي لهم قبل ادعي لي ..
كل الاسباب فعلتها ..
ومابقى الا الجى للقران والطب النبوي والطب الشعبي ..
بعد الحاح على زوجي اقتنع وقال روحي شووفي
قررت اعمل تلقيح صناعي بعد مرور سنتين على زواجي قال زوجي يكفي التلقيح بدون شعبي وغيره قلت لاا ..
استمريت على سوره البقره مو بنيه الحمل بل بنيه ابعاد الشرر والبركه بالبيت .. صرت امسح على بطني ورحمي مع قراءه سوره الفاتحه 7 مررات .. على لسـاني اكثرر من دعااء " ربي لاتذرني فردا وانت خير الوارثين " " ربي هب لي من لدنك ذريه طيبه انك سميع الدعاء " " حسبي الله لا اله الاهو عليه توكلت وهو رب العرش العظيم " " لاحول ولا قوه الا بالله " " استغفر الله الذي لااله الا هو الحي القيوم واتوب اليه " " اللهم اني اشهدك انك انت الله لااله الا انت الواحد الاحد الفرد الصمد الذي لم يلد ولم يولد .. واطلب حاجتي " " ربي توكلت عليك وانبت اليك وتوسلت اليك وتوكلت عليك فلاتردني خاايبه وادعي بحاجتي " وغيـرررهـا ولله الحمد ...
نفسيتي تعدلت مع الادعيه ولله الحمد وقراءه القران وقررت اعمل حجامه وبنفس اليوم اعمل تلقيح ولم يكتب الحمل
تاخرت دورتي بعد التلقيح والحجامه بالشهر اللي بعده رحت للمحجمه مره ثانيه سالتني عن دورتي اللي فاتت باول جلسه لي " قلت : تاخرت كم يوم ونزلت ..
قالت : هي كذا الدوره الاولى تتلخبط واللي بعدها حمل باذن الله ..
انا كنت شايله فكره الحمل من راسي بتاتا من بدايه الشهرر لنهـايته ..
قبل اعرف اني حامل كان يوم خميس وباقي على البيريود تقريبا يومين .. كنت بزواج ومارست كل انواع الرقص ههههه .. بعدها ماقدرت انام من شده التعب قلت يمكن الم دوره طبيعي صبرت يوم يومين ثلاثه لحد ماصارت الدوره متاخره يوم واحد فقط .. ورحت للدكتوره بسبب مغص واسهال اكرمكم الله بعد ماكشفت علي قالت نزله معوويه قلت لها انقذيني بابره سالتني الدوره متاخره قلت لها اي يوم واحد بس قالت اسوي لك تحليل دم قلت يالله انا من الالم مافكررت بالحمل ابد ابي تطلع النتيجه واخذ العلاج المضبووط سويت التحيل ورجعت للبيت نص سااعه وانا اقول تخيلي تصيرين حامل وافكر بزوجي لانه كان مسـافر وقبل سفره قالي ياارب ارجع وتبشريني بحملك ...
بعدين اهز رراسي عشان انسى الموضوع اقوول لا يتهيـا لي مو حمل ومرات اقول اذا حامل وش بسووي واقول لا وش حامل ماراح اكون حامل ..
بعد ساعه رحت للدكتوره واخذت نتيجه التحليل رح يجيبها لي اخوي الصغير
جاني وقال انتي حامل قلت يالله ماابي استهبال بروح للدكتوره .. وانا امشي يلحقني يقوول والله حامل وانا ماابي اصدقه فجاءه كذا بوسط السيب صررخت : والله لو مو حاامل ياويللللك ونسيت نفسي وجلست اصيـح ..
دخلت على الدكتوره وانا بنقاابي وقالت مبروك ياحبيتي قلت وش قالت الاثنين انا مااستوعبت قلت وش الاثنين قالت حامل ونزله معووويه
انا جااني شعوووور غريب لايووصف حسيت اني بحلم كنت مووقفه حسيت رجولي مو شايلتني جلست على الكررسي وهي تتكلم وتنصحني وانا مو معها ابدد افكرر صدق انا حامل سالتها يمكن 10 مررات وهي تقوولي معلومات اقوول يعني التحليل اكيد يعني انا صدق حامل يعني مايحتاج اسووي تحليل من جديد <<ماغثيت الدكتوره ابد ههههه
بس الحمد لله حسيت بشعووووووور لايووصف وكل همي اقوول لزوجي ...
بالجزء الثاني اقوولكم وش صـار لي بالبيت ... :)
تعبت وانا اكتب عن اذنكم