بسم الله الرحمن الرحيم
كيفكم ان شاءالله بخير.. انا اول مره اسجل بمنتدى حوامل ..
وعندي مشكله ابي اعرضها عليكم واخذ رايكم ومشورتكم لعل وعسى
ان شاءالله القا لها حل وان شاءالله ماراح تبخلون علي بنصايحكم ..
اعذروني لو طولت شوي بس انا جدا محتاجه مساعده..
السالفه ومافيها انا متزوجه من خمس سنوات وحياتي مع زوجي الحمدلله
ماشيه امورها مع بعض المشاكل اللي تصير بين اي زوجين**
وقبل سنه ربي رزقني ب بنت وانا وزوجي مبسوطين فيها والحين انا حامل لي شهرين..
في الفتره الاخير لاحظت ان المشاكل بينا زادت وغالبا مايكون السبب تافه
لان زوجي انسان مزاجي وعنيد.. والمشكله الاخيرره اللي صارت بينا جدا ماتستاهل
وهو انه كان يوم خميس وزوجي ماكان عنده دوام وزعل ليش صحيت اسوي الغداء
بوقت متاخر** تقريبا ع الساعه 1 الظهر وانا والله العظيم بالعاده اصحى بدري
ولا احب يشوفني نايمه اذا هو موجود بس لاني في بداية حملي صرت احس بخمول
وكسل وزياده شوي في النوم .. وقتها عصب وقام يسمعني كلام جارح بس انا سكتت
ومارديت عليه..وجلسنا اسبوعين متزاعلين ما يكلمني ولا شي بس كل شوي يسمعني
كلام يابقره يا عاجزه ياكسوله يامدري ايه واكثر كلمه كان يرددها يابقره يابقره ..
اسبوعين على ذا الحال وانا ساكته ماحبيت ارد عليها وتكبر السالفه اكثر وكل يوم
اقول ان شاءالله تهدى الامور ويحس بغلطه ..وفيه وحده جارة أمي وتقريبا صديقتها
تتعامل في العقاررات والبيع والشراء ومتعوده تكلم الرجال وتسالهم عن هالامور
وبما ان زوجي موظف في البنك ..استاذنت من امي انها تدق على زوجي وتساله
عن موضوع يخص شغلها ودقت ذاك اليوم على زوجي في الدوام وصارت تستشيره
في موضوعها .. بس زوجي حط في باله اني رحت اشتكيت لها عن مشكلتنا بما اني
كمان اعرفها وقام يقول لها لا انتي مادقيتي عشان موضوع شغلك قولي يلا وش عندك
وش تبين تقولين ..والحرمه ماتدري عن شي اصلا وانا بعد ماادري عن شي..
بس هو كذا حط في راسه اني رحت اشتكيت للحرمه وهي دقت عليه تبي تعرف السالفه..
كذا كان تفكيره .. ورجع من الدوام معصب ويصارخ ويقول يابقره رحتي تشتكي لأم فلان
وتطلعي اسرارنا ومدري ايه ..قلت له حرام عليك والله العظيم ماشكيت لاحد حتى اهلي
مايدرون عن شي .. ولو ابي اشتكي كان شكيت لامي الله يحفظها .. عيب عليك تتهمني
.. بس ماصدقني وصار يسمعني كلام وقال يلا بيت اهلك واخذني لبيت اهلي ..
ومن يومها ماعاد شفت وجهه والحين كملت شهر ونص في بيت اهلي لا يسال ولا يتصل
ولا شي وحتى بنته ماجاء يشوفها الامرتين بس ولا عطاني مصروف ولا شي..
وهذا كل اللي صار .. والله العظيم كل يوم ابكي وكل يوم دموعي على خدي لانه اتهمني
ظلم وطنشته طول هالفتره مع اني قلبي محروق وكل لنفسي ماراح اكلمه ولا ارسل له
ولا شي لانه جرحني وقهرني .. بس لاحظت ان فترة شهرين ونص ماحركت فيه شي **
ولا حتى فكر يقول لي كيف حالك برساله ..والبارح ماقدرت اتحمل راسلته ع الواتس اب
وقلت له حرام عليك اللي تسويه فيه تراك ظلمتني وانا ما سويت لك شي ترا عندك خوات
متزوجات خاف ربك .. رد علي وقال انا كذا مرتاح وانتي خليك في بيت اهلك ومصروفك
بيجيك انتي وبنتك .. قلت له حسبي الله ونعم الوكيل .. وماعاد رد **
واهلي قالوا خليه وطنشيه الين يجي عندنا بعدها حنا نتصرف معاه ..
بس انا مقهوره وقلبي محروق لاني احب زوجي وكلما طولت احس اني بموت من القهر
لانه مطنشني بمعنى الكلمه وانا حامل ونفسيتي تعبانه وكل يوم ابكي ..
بليز انصحوني وشورو علي لاني تعبت ونفسيتي جدا منهاره**