أرهق نفسي بشغل البيت هل فيه ضرر على الجنين؟؟

[حبيبه]

بسم الله الرحمن الرحيم

السلام عليكم ورحمة الله وبركاته

خواتي .... حبيباتي ...اعضاء منتديات حوامل نسائيه ( منتداي الغالي )
لا تبخلون علي ولو بكلمه تنفعني او تخفف عني

لكل من يقراء موضوعي عليه ان يكتب شي ولو كلمه بسيطه تكسب بها اجر لعلى وعسى هالكلمه هذي هي التي تغيرني للافضل
فلا تبخلو علي

قصتي يا اخوات اني انتظر الحمل من اول ما تزوجت والحمد لله بعد ما كملت السنتين من الزواج حملت

بس المشكله اني وحده ما اعرف ارتاح واجلس ....كله شاغله روحي ومتعبه جسمي مره بزحم الكنبات ومره بغسل الارضيات ومره برتب المطبخ من والى وكله ابغي اطلع واذا طلعت تعرفون اني بكون جالسه فتره طويله وغير طلعة السوق اللي انبسط حيل ومشي
وغير جلست النت

نفسيتي اتعبت حيل ابغي احافظ على البيبي وابغي ادلع نفسي ما اشتغل وابغي ارتاح بس مين يساعدني في شغل البيت (الشقه) زوجي يكره شي اسمه يرتب الشقه او ينظف ومن هالقبيل
وانا اكره اني اجلس مكان فوضى ولا كأني احس واقوم ارتب وانظف
والبيبي في الطريق الله اعلم كيف اهو متحمل هالتعب اللي انا معيشته فيه

تخيلوا احيانا احس اني ابغي اصيح ...اصيح ابقوه ... احس عندي مسؤليات اكثيره ....ولا اعرف اديرها ....وخاصة هالبيبي ابغي اهتم فيه اشوي ابغي ارتاح ولو هالاربع الشهور الجايه

احيانا تجيني افكار ان البيبي بيصير له شي والسبب انا
ولما افكر هيك يجيني أرق واتعب نفسيا

اللي ابغي اعرفه هل طبيعي هالشغل اللي اشتغله ،،،ما في ضرر على البيبي

ثاني شغله شنو اسوي علشان ارتاح
بالعلم اني لما اكون مرتاحة عرفو أن الشقه راح تنقلب فوق تحت اغبار ووسخ وغيرو يعني لازم كل شي اول بأول والا الدنيا تصير دمار

بنااااااااااااات بليييييييييييز ساعدوني
هل في خطر على البيبي
وكيف اتعلم ارتاح ولا افكر بالشغل واللي ذابحني اكثر اتزحم الكنبات اذا ظليت ازحم وغير اماكنهم

[الفتاة الذهبية]

المفروض انج تنتبهين ولا تعبين روحج وايد

انا اشتغل في البيت بس اسوي شغلة وارتاح شوي وجذي لمن اخلص الشغل كامل

يعني سوي لج شغلة او شغلتين وارتاحي شوي وان شاء الله ما في خطر على البيبي

بس مب زين انج تشيلين شي ثقيل يعني الكنبات لا تغيرين اماكنهم لانه هذا يمكن يشكل خطورة على البيبي

تقبلي مروري البسيط

[نبض قلب حمني]

هلا يالغاليه
شوفي كلنا مرينا بمثلك
يعني انا زوجي مايحب يشوف شئ بالشقه لازم تكون نظيفه
ويدقق مره
المهم انا من حملت والين اليوم وانا ماشيه على نظام ومرتاحه فيه

عندي وقت انظف واشتغل فيه طبعا بدون جهد ومااسوي كل شئ بيوم واحد

طبعا المطبخ انا على طول من ناكل شئ غسلته عشان مايتراكم علي الغسيل

وكل يوم اسوي شئ يعني اقسم الشغل اللي اول كنت اشتغله بيوم صار بيومين بثلاثه
مو كل شئ بيوم واحد كان اموت من التعب
انتي سوي كذا كل يوم سوي نص الشغل اللي عندك
يعني الاشياء المهمه
في اشياء مالها داعي كل يوم
حاولي تنظمين لك جدول كيف تهتمين ببيتك
والوقت الباقي ريحي حالك لانه لازززم واهم شئ بدايه الحمل الراحه وبعدين بيجيك التعب
ولاانتي قادره تشتغلين اصلا

عشان كذا اهتمي براحتك ياقلبي ومثل ماقلت لك مولازم كل شئ تنظفينه بيوم
اهم شئ الاشياء المهمه بس
مثلي طبعا مريحه حالي ههههههه

يلا ان شاء الله تشوفين البيبي بالسلامه يارب ويكون سليم معافى تام الخلق يارب
وانا وياك بعد

[يارب ترزقني بطفل أضمه]

ياقلبي الله يتمم حملك ويحفظ جنينك انشالله بس هذا حمل عزيز يالغلا حافظي عليه
اشتغلي شغل خفيف لكن تسحيب الكنب وغيرة ليش كل نهاية اسبوع جيبي العاملات الاجار بالساعات وخليها تسحب لاتتعبين نفسك نصيحة يالغلا حتى لو مو حامل لاتشيلين شي ثقيل يتعب الرحم الظهر والله يسعدك ويريح بالك

[Mقمة البرااااائهM]

أختي......

بنت عمي بس شااالت صينية القهوه والشاااااي وأجهضت وأهي في الخاااامس....فماااا باااالج أنتي والمجهووود إللي تجتهدينه.....حراااااام.....بعدين محد في البيت غير أنتي وزوجج....يعني محد يخرب....ليش كل يوووووم تنظيف وجر وسحب....حرااااام هذاااا البيبي شووووذنبه......
أختي محد بينفعج غير ضنااااج.....وأنتي وضميييييرج.........

[« خ ـجل »]

حبيبتي لازم ترتاحيييين

اذا انتي تنتظرين الحمل من سنتينن والحمد الله حصل

انتبهي عليه فديتك لا يصير شي وتندمين عليه لاسمح الله

شغل البيت لاحقه عليه واذا اشتغلتي حاولي يكون شغل خفييف

الاشهر الاولى مرررا حساسه وخطيره لازم تنتبهين لنفسك يآقلبي

[روزا ليندا]

اختي انا زيك منتظره الحمل من وقت طويل والدكتوره حذرتني من شغل البيت الثقيل
قالت لا تشتغلي في البيت كثير ولا توقفي كثير ولا تمشي وانا في اشهر الخامس قالت هذا طفل عزيز وقالت اذا حسيتي بتعب نامي على ضهرك وارفعي رجلك ومن يومها وانا جالسه في البيت ولا خرجه وجبت شغاله طيب انتي في الشهر التاني يعني لازم راحه

[يارب عفوك]

ماايبغى له سؤال هالشي

اكيد يبغي لك راحه وعاد زوجك كيفه خليه يساعدك والإ يسكت..

انا بس وقفت يوم كثير ونزل علي دم كثير.. وتنومت

بس الحمدالله عده الحمل ع خير

[حبيبه]

حبيباتي
ألف شكر لكم على كل كلمه دخلت في قلبي ولا طلعت
تدرون جالسه واتحسف على الشهور اللي مضت ليش ما ارتحت بس جد
ما راح اضيع الفرصه عندي اربع شهور قدام ما راح اتعب نفسي وبدلع روحي برتاح وبنسى شي اسمه شغل بس بفكر بالبيبي
ندمانه حيل حيل ..... بس ما ينفه الندم الحين لازم اتغير والله يتمم لي على خير
انا بس ابغي اعرف شغله وحده ليش انا سويت كذا هذا المحيرني؟

[نور عيني]

الله يسهل عليك يااااارب
شوفي قسمي شغل البيت على حسب قدرتك يعني اذا حسيتي بتعب ولو خفيف اتركيه لبكره وكذا مثلا غسيل الثياب مو مره وحده والمطبخ غسلي اول باول ورتبي ومايتراكم عليك وارحمي نفسك والي في بطنك وكل شي بعدها لاحقين عليه