··السلام عليكم··
دائما كنت اقرأ قصصكم واقول ان شاءالله لما اولد واقوم بالسلامة راح اكتب لكم قصتي، لان بجد انبسط لما افتح على القسم واحصل قصة اي وحده فيكم، لاني بكرية وما اعرف الولادة بس يجيني شعور حلو وانا اقرأ قصصكم.
اخواتي..
اتمنى اللي صار معايا مايصير معاكم وانا ممكن من اللي صار لي لو حملت ثاني الله يعينني على النفسيه اللي تجيني..
اول شي يمكن الغلط مني لاني بكرية ما اعرف ايش يعني طلق
بدأ الطلق عندي الاربعاء المغرب كان كل خمس دقايق المهم انا استبعدت انه طلق لان قرأت كثير يقولو اول شي يبدا كل نص ساعة بعدين بيزيد لما يوصل كل خمس دقايق.
المهم انا بدا كل خمس دقايق بس كان الالم متحمل وكنت انام عادي ولما ارجع اصحى يرجع الطلق.
صحيت الخميس نزل عليا دم قليل بسيط وكان عندي موعد مع دكتورتي والتصوير التلفزيوني
سويت التصوير التلفزيوني مع دكتورة غير دكتورتي ولاكن فاجاءتني لما قالت انتي مو بالثامن انتي بالشهر السابع واقول لها دكتورة انا مريضه فيا الم اسفل بطني مع تحجر وظهري واليوم نزل الدم " انا ما اعرف انو هذا طلق " قالت لالا طبيعي جدا بيصير مع الحوامل كلهم المهم قلت لها ماشي ومشيت رحت لدكتورتي ومعايا التقرير حق التصوير التلفزيوني وقالت كل شي تمام بس شكلنا غلطنا بحساب الحمل قلت لها دكتورة فيا الم اسفل بطني وظهري ومع تحجر بالبطن واليوم نزل دم كميه بسيطه قالت اكتب لكي حبوب للدم والباقي عادي بيصير للبنات خرجت من عندها وانا اتالم رحت بيت اهلي جلسه وسوالف وانا كمان ما احسبه طلق كل ما اتالم اروح ادور بالبيت وارجع اخر شي جاء زوجي رحنا للطوارئ قالت معاكي طلق وقالت بتولدني وانا رفضت قلت لها ابغى ابرة توقف الطلق حبوب لا تولديني لان الطلق كان جدا بارد واتحمله حتى اذا نومت انسى انو معايا طلق رفضت وطلعنا انا وزوجي رحت بيتي طبعا الجمعه مافي دكتورتي ماتداوم صبرت الجمعه مع الالم وجاء السبت رحت لدكتورتي الساعه 5 العصر قلت لها فجر الجمعة كنت بالطوارئ وقالو معاكي طلق وينزل مني دم للان ماوقف قالت لا ياريم انتي ماراح تولدين ذاحين وانا شويا وابكي والطلق صار اقوى اقولها اتالم كثير قالت هذا طبيعي رجعت بيتي لما جات الساعه 1 بالليل خلاص احس شي بيطيح ابكي اقول لزوجي اه ما اقدر وديني طوارئ بسرعه ورحنا انا وزوجي واختي طوارئ مستشفى "سليمان فقيه" حصلنا دكتورة مناوبه تخيلو مادخلوني غرفة الملاحظة دخلوني بغرفة ثانيه وجات دكتورة وقلت لها انا باولد قالت انتي المشكله بتولدي ذاحين ولادة مبكرة وماعندنا حضانه حتى كشف ماكشفت ولا تخطيط ماسوت قالت روحي ياماما بيتك والشهر التاسع تعالي على بالها انا امزح طلعنا من المستشفى ورحنا مستشفى "الطب الدولي" قالوا مافيه حضانه رحنا "الاطباء المتحدون" قالو مافيه حضانه رحنا "بقشان" "السعودي الالماني " "ومستشفى الجامعه الخاص والحكومي " مستشفى الوﻻدة "وعرفان" كلهم قالو لنا مافيه حضانه انا ماعاد اتحمل بالسيارة احسه بينزل الجنين وجاء اخوي وزوجته يدورون بمستشفيات ثانيه جنوب جده واحنا بشمال جده تخيلو ماااافيه ابدا حضانه مستشفيات جده كلهم كذا
الساعه 6 الصباح حسيت بدف وابكي بالسيارة اقولهم طلع 6 ونص اخويا اتصل حصل حضانه في مستشفى "حي الجامعة" وبسرعة وصلنا وجابو ليا كرسي والله يابنات مو قادرة اقوم على الكرسي شي بيطيح مني بس ربي ساعدني الحمدلله ودخلوني طوارئ جات تكشف الدكتورة قالت ماشاءالله مفتوح 9 سانتي واقولها ولدوني خلاااااص تعبت وفتحت موية الجنين واحس انو الالم بدا يخف سبحان الله وبعد بحس ببنتي وهيا تدف وانا ابكي طلعت وكل هذا بالطوارئ مادخلوني بغرفة الولادة والدكتورة تركتني وراحت قالت لاختي وزوجة اخوي لالا انا ما اقدر اولدها الجنين طالع يده وراسه مع بعض وانا بالغرفة ابكي حرام عليكم تعالو وانادي شويا دخلوني غرفة الولاده جات دكتورة عسل الله يحفظها قالت دفي ساعديني وانا ادف اتذكر الليل كلو ماحد يبغى يولدني واجلس ادف واتذكر الليل ومافي حضانه والسيارة والحمدلله ربي اعطاني قوة ودفيت طلعت بنتي اسمعها تبكي وانا اجلس ابكي يقولو خلاص بنتك طلعت ابكي من الالم والتعب والعذاب طلعوني غرفتي بس ابكي اعطوني مهدئ ونومت شويا الحمدلله
بنتي مره صغيره بالمرة وزنها قليل وهي ذاحين بالحضانه كل يوم اروح اشوفها واجلس ابكي كيف تعامل معاها كيف راح تكبر ادعولها احتمال تطول بالحضانه الله يخليكم ادعولها خايفه افقدها
انا مو قادرة لليوم انسى اللي صار بس الحمدلله الحمدلله الحمدلله
سامحوني كان نفسي اكتب لكم قصه حلوه بالمغامرات مو قصة مؤلمه ورعب فيها الليل كلو
كنت اتمنى اطلع من المستشفى وانا وبنتي مع بعض انام جنبها واشم ريحتها وابوسها والعبها ويباركولنا الناس واسوي استقبال حلو زينه حلاوة وكل شي لاكن الحمدلله على كل حال
ادعوا لبنتي يارب انا تعبت وتحملت الالم وصبرت اجرني في تعبي واشفيلي بنتي وقومها بالسلامة ياكبير يارحيم يارب العالمين انك على كل شي قدير
اتمنى لجميع الكروشات الله يقومكم بالسلامة ويتمم فرحتكم يارب♡
واشكر بجد تجمع حوامل جماد ثاني الله يسعدكم يارب والله اني احبكم والله يقومكم بالسلامة ♡
03-13-2013, 10:07 AM
الحمدلله على كل حال " قصة ولآآآآدتي "
ريمو& 
جديد منتدى إستفسارات مرحلة الولادة
العرض العادي
