قصة حملي و ولادتي :)

[تركوآز]

السلام عليكم ورحمة الله وبركاته

كيفكم بنات

أنا حبيت أكتب قصتي كاملة لسبب مهم جدا جدا وهو إني أبغا أوصل معلومة مهمة

وهي

إنه مو كل شي نقرأه أو نسمعه يكون صحيح

يعني

كل وحدة جسمها يختلف عن التانية وكل وحدة قدرة تحملها غير

فحرام اقعد أخوف الناس وأكتب أشياء محبطة

حتفهمو قصدي من خلال القصة وان شالله تلاقو فيها اللي يفيدكم :)

انا الحمدلله ولدت من اسبوعين تقريبا وجبت عبدالعزيز أول بيبي ليا

بس قعدت قبلها 3 سنوات من غير حمل

اول سنة ونص كنت اخد حبوب ديان كتبلي هيا الدكتور لانه عندي تكيس وما كنت ابغا احمل بحكم دراستي انا وزوجي

بس بعد ما تركتها قعدت سنة ونص من غير حمل

دورتي كانت منتظمة الحمدلله ولا عمرها اتلخبطت

مشكلتي كانت في الهرمونات

كنت اروح للدكتور واسوي تحاليل ورجع اكسل كم شهر ما اتابع

الين خلاااص حسيت اني مرة ابغا احمل ولازم اشوف حل

رحت للدكتور عثمان سندي في عيادته

الله يسعده وينوله اللي بباله يارب

اول شي قلي لازم تنزلي وزنك لانه كيلو واحد يفرق مع اني مو دبة مرة

واداني كلمتين قدام زوجي

فكنت اخاف ارحله لو وزني مو نازل واشغلت نفسي بالرياضة والمشي وكنت اطلع شقتي بالدرج 3 ادوار

الحمدلله قي شهرين تقريبا نزلت 8 كيلو

وخلال الشهرين دي قلي اول شي لازم نسوي تحليل لزوجك عشان نحدد المشكلة مو نقعد نعالج فيكي ويكون العيب منه

والحمدلله طلعت تحاليل زوجي جدا ممتازة

قلي انتي مشكلتك الحالية ضعف المبايض بس قبل ما اعطيكي اي شي لازم تسوي أشعة صبغة

طبعا من كتر ما اقرأ وأسمع مرعوبة من فكرة الاشعة

بس سلمت امري لله واستخرت وسويت موعد في العيادات الأولى بعد الدورة بأسبوع قالولي ب 850

الدكتور كتبلي ملين ومسكن اخدو قبلها

جلست مرعوبة جدا منها ورحت الموعد شوية وابكي وسويتها الحمدلله والله مافي أسهل منها أخف من ألم الدورة

ولا على قد الكلام اللي نقرأه ونسمعه واللي تقلك ألم لا يحتمل واللي تقلك ألم الولادة

فالواحد لا يسمع للناس الين يجرب بنفسه يعني أنا اعرف كتير ما سووها خافو من تجارب الناس طيب ليش أضيع على نفسي !!

والحمدلله طلعت الأشعة سليمة بس في التواء بسيط في الأنبوب اليمين بس الدكتور قلي ما يأثر

وبدا يعطيني المنشطات ما فاد الكلوميد فبدانا بالابر

الحمدلله من اول شهر ابر حملت

وفي شي مهم.. انا لما يئست من الحمل قلت لازم اشغل نفسي وحتى ماما قالتلي اشغلي نفسك حتحملي

اتوظفت وبعدها ب 3 شهور حملت

لاني نسيت الموضوع النفسية لها دور كبير جددددددا

في الشهر الا حملت في سافرت دبي وانا مادري اني حامل الدكتور كان كاتبلي تحاميل مثبته كان كل شهر يكتبلي هيا وكنت يوم احطها وعشرة لا وكنت امشي كتييييير في الاسواق والفلف بس سبحان الله لما ربنا يريد مافي شي يعجزه

لما رجعت من دبي واتاخرت عليا الدورة 5 ايام رحت اشتريت التحليل بس كنت مستبعدة الفكرة ما صدقت لما طلعلي خطين كان رمضان والساعة 2 الفجر قلت لزوجي الا والا اروح اسوي تحليل دم قلي خليها لبكرة قلت لا

رحت مستوصف جمبي وفي اقل من ربع ساعة طلعت النتيجة

شعور لا يوصف الله لا يحرم احد منه

والحمدلله مرت شهور الحمل بصراحة ما تعبت كتير وكنت اداوم ودوامي كله حركة فكنت خايفة وكل شوية اروح الحمام اطمن ههههه بس الدكتور قلي امورك كلها تمام فعادي

وبالعكس الحركة تسهل وقت الولادة

داومت الين نص الشهر التاسع ماشاء الله بعدين اخدت اجازة

تابعت مع الدكتور عثمان للشهر السادس كنت مرة مرتاحة معاه بس زوجي قلي الولادة لازم عند حرمة فغيرت للدكتورة سوسن في الطبي الدولي ما عجبتني رحت للدكتورة ايمان زححححمة ولطعة وانا ماحب اتوتر من الانتظار فرحت للدكتورة سوزان الكافي في المشفى

بصراحة دكتورة جدا ممتازة ومريحة والمستشفى فاضية لانه مافيها تأمين

وصلت للاسبوع الثالت من التاسع وكان يوم اربعاء وقالتلي لسة الرحم مقفل بس الجنين نزل في الحوض

قالتلي شكلك حتاخدي اسبوع من العاشر

بس قررت اني اولد بسرعة وسرت امشي في البحر نص ساعة كل يوم واسوي رياضة الكرسي

جا يوم السبت حسيت بضيقة وطفش وقلت لزوجي طفشانة شكلي مطولة محا اولد قلي خلينا نمشي قلتلو لا مابغا قلي الا حترتاحي شوية

ومشيت 45 دقيقة وما حسيت بشي ورحت اتعشيت في فدركرز ورجعت البيت نمت وانا نايمة احس بشي حار ينزل عليا

بس احس كاني في حلم واحسها تزيد

قمت وقفت الا احس شلالات موية نازلة هههههه

صحيت زوجي اقله قوم شوف وهو مسكين مو فاهم ههههه ماعرفت ايش اسوي ادق على امي ما ترد اخواتي ما يردو

اروح الحمام اقول دحين توقف وتزيد تزيد

قلتلو خلاص خلينا نروح المستشفى اتروشت وجبت معايا كتاب ورد الولادة وسرت أقرأ في السيارة المستشفى بعيدة عني شوية

وصلت وانزل من السيارة عبايتي كلللها موية وامشي ورايا كله موية دخلت الطوارىء الحمدلله ما كان فيه احد هههههه المكان كله موية مني بسرعة جوني 4 ممرضات وطلعوني الغرفة

لبسوني لبس المستشفى وجاتني وحدة كشفت عليا قالتلي مفتوح ب 2 سم ومافي طلق

كلمو دكتورتي قالت خلاص اعطوها الابرة لاني كنت طالبتها ابرة الضهر عشان يعطوني طلق صناعي قبل ما تخلص الموية خطر ع الجنين

بالنسبة لابرة الضهر انا استخرت قبل ما اخدها وقت ما يحطوها في ألم بسيط بعدين خلاص

اللي حطتلي الابرة ايطالية يدها خفيفة ماشالله قالتلي اهممم شي ما تتحركي وانا احطها لو اتالمتي قوليلي اوقف

بصراحة يدها خفيفة وقالتلي اول ما تحسي مفعولها بيخف ناديني ازدلك الجرعة

بدا الطلق وانا مني حاسة بشي قاعدة عالواتس اب واتصل على ماما ماترد وانا متوترة

وافهم زوجي ايش يجيب من البيت ويكلم محل الحلاوة ومحل المعجنات وهو يكتب عشان لا ينسا ههههه

اليين اذن الفجر جات ماما مسكينة مفجوعة وهنا بدأ الألم ناديتهم قلتلهم في الم قالولي طيب بس هيا في عملية تخلص وتجيكي

كل ساعة ونص تجي تكشف عليا قالتلي سار 3 سم بعدين 3 ونص

جات زودتلي جرعة المخدر

برضو احس بالالم سرت امسك السرير وادف برجلي مع كل طلقة

واقلهم نادوها واتاخرت

جات كشفت عليا قالتلي ماشالله 8 سم وهنا سرت ابغا ابكي من الالم كل ما تجي الطلقة اقول يارب وادعي للي في بالي

وصلت دكتورة سوزان وزودولي جرعة المخدر وقالتلي خلاص 10 سم ماشالله

رفعولي رجولي وانا مني حاسة بشي ابدددا

قالتلي كل ما اقلك يلا تحزقي باقوى ماعندك .. كل ما تجي طلقة يقولولي وانا احزق بقوووة وماني حاسة بشي

ماشالله تبارك الله في 5 دقايق خرج عزوزي وحطو على صدري

شعووور لا يوووووووصف صراحة

الحمدلله

يعني ولادتي كلها كانت من 3ونص اول ما نزلت موية الجنين الييين 10 ونص الصباح خرج النونو

وبدات تخيطلي قالتلي طلعتلك باسورة وحدة من الحزق حعطيكي لها ادوية وان شالله خلال اسبوع تروح

الحمدلله خرجت من غرفة الولادة بعد نص ساعة كنت صاحية بس رجولي مخدرة

تفك شوية شوية وجبت كوفيرا سوتلي شعري ومنكير هههه فاضية

في الليل ع الساعة 11 فك البنج تماما وبدات احس بالم البواسير والخياطة اعطوني مسكن ومراهم ومغطس

بصراحة مستشفى المشفى خدمتها جدددا ممتازة .. ممرضاتهم طيبين واخلاقهم حلوة واول ما تضغطي تجيكي من غير تأخير

الولادة جدا مريحة وغرفة الولادة واسعة ومرتبة

والحمدلله رب العالمين .. وعقبال كل متمنية يارب

الا ابغا اوصلكم هو من قصتي الطويلة دي

انه اولا:

اشعة الصبغة مرة مهي مؤلمة ومرة مفيدة وتساعد ع الحمل بشكل كبير .. حتى لو كان كل شي سليم

ثانيا:

الكشف اللي قبل الولادة عشان يقيسو كم فتح الرحم مررة مهو مؤلم واحساس عادي جدا.. انا كنت مرة خايفه منه

ثالثا:

ابرة الضهر مرررة مريحة ونعمة من الله وكل الدكاترة نصحوني فيها والحمدلله ما حسيت باي اعراض بعد الولادة بالعكس

رابعا:

الدعااااء.. والله ربنا كريم انا كنت ادعي كل يوم في السجود انه ربي يرزقني ولد سليم معافى

والحمدلله ربنا حققلي حملت وجبت ولد الله يحميه ويحفظه

سادسا:

الحركة مرة مفيدة.. مو يعني حامل خلاص اقعد.. لو حملك سليم وكل شي تمام الحركة تمنع تعسر الولادة.. انا كنت اداوم 6 ساعات واطلع درج وكل شي وارجع اشتغل في البيت.. وكنت اروح اسواق وامشي وكل شي.. والحمدلل فادني وقت الولادة


ومعليش طولت عليكم .. عقبال كل وحدة متمنية الخلفة.. وعقبال كل وحدة حامل تولد بالسلامة وتفرح بشوفة ضناها

:)

[لؤلؤه بيضاء]

ما شاء الله عليكي وألف مبروك سلامتك وسلامة النونو ربي يجعله من أبناء السلامة ويقر عينك وعين والده فيه

[سنيوريتا آني]

الف حمدالله على سلامتك وسلامة عزوز يتربى بعزكم ربي يجعله من مواليد السعاده ان شاءالله

[أم بندر الحلو]

ما شاء الله
ألف ألف مبروووووك
الله يحفظه ويخليه لك
والحمد لله على سلامتك وسلامة البيبي
عقبالنا ياارب

[ريحانة الجنة]

ألف الحمد لله على سلامتك
وألف مبرووك يارب يتربى بعزكم ان شاء الله
وشكرا على سردك لقصة ولادتك ..عقبال كل الحوامل
الله يقومهم بالسلامة..

[ام ميمو وسوسو]

الف الف الف مبرووك تركواز الله يحفظه لك ويجعله من عباده الصالحين

[حنين الوجدان]

ماشاء الله .. الف مبروك ويتربى النونو بعزكم
قصتك شجعتني خصوصا انا بكرية ومره خايفه
الله يعطيك.العافيه

[مآيشبهونك]

ثانيا:

الكشف اللي قبل الولادة عشان يقيسو كم فتح الرحم مررة مهو مؤلم واحساس عادي جدا.. انا كنت مرة خايفه منه


الله يطمن قلبك ويسعد ايامك انا جدا مؤرقني هالموضوع

[تركوآز]

الله يبارك فيكم حبايبي

ويقوم الحوامل بالف سلامة

:)

[يارحيم]

كلامك عين الصح.. انا كنت في كندا وقررو لي اشعة صبغه والحمدلله اني مافهمت وشي بالضبط قالو اسمها بالانقليزي لاني لو عرفت كنت بموت خوف من كثر ما تكلمو عنها البنات بالمنتدى.. والله مافيه اي الم انبوب يدخل من تحت طبعا نحيف مرة فما يؤلم اكيد اغلبنا سوا مسحه من عنق الرحم او اي كشف من تحت ما يقارن بانبوب اشعة الصبغه.. وبعد ما يحطون المادة تحسين بمغصة بسيييطة وبس!

اعرف ان كل بنت تختلف عن الثانية بس صراحه قريت عنها وصف مو طبيعي واحس اننا جواااارين ومانبي احد يقربنا.. والله هونيها وتهون والريلاكس يقلل الم كل شي..