تكفووووون لاتبخلون علي نصحوني

[عَ ـشٌقً]

السلام عليكم ورحمة الله وبركاته
بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
كيف حالكم إن شاء الله دائما بخير ؟
انا عندي اسئله واتمنى منكم الافاده بخصوص اطفال الانابيب
بقولكم قصتي من الاول وانتو عطوني رايكم بما ان عندكم خبره
القــصه:
انا فتاه عمري 18 سنه متزوجه من شاب عمره25 سنه وتقريبا صار لي سنه ونص من زواجنا ولسى الله مارزقنا بالذريه وفي بدايه زواجنا يعني تقربا 5 شهور الاولى قرر زوجي ان نروح نسوي فحص بالمستوصف نشوف اذا عندنا مشكله مع اني كنت رافضه نهائيا لان لسى بكير علينا وبالفعل الدكتور قال لنا يفترض ماتجون الا لما تاخذون ع الاقل سنه ..زوجي طبعا مو مقتنع بس سمع كلام الدكتور ورجعنا
وبعد 4 شهور برضو ماكتب ربي يكون حمل وزوجي كأن قلبه حاس انه فيه شي صمم ع الدكتور لازم يسوي تحاليل المهم سوينا التحاليل طبعا بديت انا اول وسويت كل التحايليل الازمه والاشعه وتعذبت كثيير بالاشعه خصوصا المهم طلعت سليمه الحمدالله <<وحرمت ادخل مستشفى مره ثانيه خلااص لاني بجدد انا خواااافه وحساااسه......بعدها زوجي سوا تحليل المني اول مره قال الدكتور انه المني فيه 0 حيوانات منويه وكان الدكتور كثير مستغرب انه شاب بعمر 25 ومافيه حيامن الموهم سوها تقريبا مرتين ونفس الشي سوو له تصوير وشافو انه عنده انسداد في الخصيه ومايعرف مكان الانسداد وين ..الدكتور انصحه بأطفال الانانبيب
ومن ذاك اليوم خلاص ماعدنا رحنا للدكتور لحد مامرت علينا الحين سنه و6 اشهر
وطبعا تعرفون الناس وكلامهم والاهل طبعا الشباب كلو وجه زوجي بالاسئله وانا كمان اهلي ماقصرو اخر مره كلمتني جدتي وقالت لي روحي فحصي ومدري كيف
طبعا الموضوع ماحد يدري فيه الا امي وام زوجي ... وبعدها قررت اني اسويها نهايه هالسنه لاني احس اني حنيت للاطفال وخصوصا ان اي كلام يجيني من اي شخص من ناحيه هالموضوع يضايقني ...ووبسس هاذي معانتي واتمنى تسااعدوني !!؟

هل تنصحوني اني اسويها وانا بهالعمر او انتظر لعمر معين وهل لها تأثير بالعمر ؟؟؟
وهل نسبه الانجاب بتؤام كثيره ولا قليله ؟؟!

اتمنى الرد بأسرررررررع وقــــــــــت ولا تحرموني من خبرتكم

[سكـره]

حبيبتي أنت نفس حالي ولنا نفس فترة الزواج
بس أنا الحمدلله زجي نسبة الحيوانات 50,000وفوق كذا تشوه وضعف بالحركة
والدكتور نصحنا بأطفال الأنابيب بس نسبة نجاحها ضعيفه قال:(
أنا عني انصحك تسوينها مبكر ياقلبي عشان لومانجحت لاقدر الله تعدينها مبكر..
الله يرزقك بالذرية الصالحة عاجلا غير اجل.

[عَ ـشٌقً]

تسلمين ياقلبي ع الرد السريع ويارب يرزقك الذريه الصالحه ويرزق كل محروومه بأسررع وقت ممكن

واتمنى بعد تفيدوني اكثر وكثر وبكون شاكره لكم...{

[القلب الباكي]

استخيري الله وشوفي شو ربي بهديك له وكل ماعملتيه بدري افضل وفقك الله

[الهنوووف]

سويها وتوكلي على الله

مدام قالج الدكتور ... او روحي لدكتور ثاني شاطر

وشوفي شنو يقول لج .. اذا قالج نفس كلام الدكتور الاولي

خلاص توكلي على الله وسويها وان شاء الله خير يالغلا

ويارب تبشرينا بحملج

**

تقبلي ودي

ووردي

[دمعة حرمان]

من رأيي تتوكلي على الله وتسويها
ترا والله علاج الزوج متعب وياخذ وقت وسنوات ولا فيه فايدة
والدليل زوجي عنده قلة في العدد والحركة السريعة صفر
صار له ست سنوات في علاج ولا جاب نتيجة
امس قررت لنا الدكتورة حقن مجهري وان شاء الله من الشهر الجاي بدخل كورس علاج

[عَ ـشٌقً]

يسلموو حباايبي ع مروركم الحلو
بس ابغى اعرف نسبه حمل التؤام كم بالميه ؟

[smhaa]

حبيبتي انتي صغيرة جدا
وزوجك كمان صغير بالسن
انا رح انصحك وانا تقريبا بضعف عمرك
انتي روحي لدكتورة شاطرة جدا واسئليها هل ينفع تعمليها الان ام تنتظري سنتين على الاقل بعمر العشرين
لو هما خبروك بأنك تعمليها الان اعمليها ومافي مشكل
لو خبروك تنتظري بردو مو مشكلة حبيتي انتي استمتعي بالسنتين دول وروحي اتفسحي انتي وزوجك وتمتعي بكل لحظة ورح تمر السنتين بسهولة
وانصحك لا تنظري لكلام الناس لانهم ماعندهم شغلة الا الحكي والاحباط

ربي يحفظك ويرزقك باحلى الذرية اللهم امييين اجمعين

[همس المعاني]

هلا اختي
انا انصحك تبدي تعملي اي شي في هالموضوع وتحاولي لان كل ما بديتي بدري افضل
ولولاسمح الله فشلت محاوله تحاولي مره ثانيه والعمر قدامك
وصدقيني ان راح تتعبين نفسيا لو ظليتي بدون ماتحاولي من كلام الي حولك
بس لازم تتوكلي على الله وتكثري استغفار وصدقه وربي رح يكرمك
وبالنسبه للتوائم اعتقد انه تحصل في الانابيب بس على حسب حالتكم
والله يوفقك

[مقهوره يارب]

حبيبتي عشق طالما زوجك عنده مشاكل والطبيب نصحكم بالعمليه توكلي على الله وسويها لأن نسب نجاحها تزيد كل ماكان عمر المرأة أصغر وتقل فرص النجاح مع تقدم العمر وكل شي راجع لإرادة رب العالمين ، أما بالنسبه للتوائم فهذا على حسب عدد الأجنه اللي يرجعها الدكتور ممكن يرجع لك 2 أو 3 أو 4 بس مو شرط تثبت كلها ممكن يرجع أربعه ومايثبت غير واحد ، أنا الدكتور رجعلي 3 وماثبت ولاواحد ، الله يرزقك حبيبتي وتنجح عمليتك من أول مره .