مات تؤام روحي في يوم ولادتي ...

[ريم الحربي]

انتي ما تحبيني نفس قبل" ....قالها لي واهو يدلع علي وكأنه طفل ينتظر امه تراشيه....

ضحكت عليه وقلت له
"كيفك"
طالعني واهو يضحك.....بس كان في داخله يقول "يالله عاد انتظرك تدلعيني"
.
.
.

رميت نفسي على السرير يمه وحظنته بقوه وبسته " وقلت له "اشلون الحين احبك نفس أول ولا لا؟؟؟
ضحك...وخله عينه بعيني ،،وتبادلنا كلام العيون.....
..
...

كان يوم الاثنين،، رجعنا انا معاه من المجمع واحنا فرحانين لانه ما بقى شي على ولادتي الي كانت مقررة يوم السبت ،، كانت آخر ايام التجهيزات لغرفة "بنتي"..الفرحة مو شايلتنا
كانت الساعة 2,الفجر,،
واحنا نطالع التلفزيون قلت له حبيبي مو قاعده احس بتحرك البيبي عدل( طبعا كنت احس بس اخف من كل مره بس اتعرفون اول حمل وادلع ).... خاف علي،، "عمري قولي الصج لا تخوفيني.." قلت له حبيبي اشفيك ما اقدر اقول لك شي الا تخاف خلاص خلاص انا بنام...."
سويت روحي زعلانه وعطيته ظهري,, "عمري ما اقدر انام بدون ما احضنج" ضحكت..بس مابينت له كنت أبيه يتحايل فيني اكثر ...حاول مره ومرتين بس الثلاثة لفيت له وحضنته ..وبسته..ومسحت على راسه وعلى خده وكاني عارفة انها آخر مره انام بحضنه..وكأني عارفة انه الليله الي بعدها راح ينام بحضن القبر.. وكأني اعرف ان غذا سيكون اليوم الذي تسحب بساط السعادة من تحت إقدامي اليوم الذي سوف يقسم ظهري ويثقل كاهلي...

.
قلت له يالله حبيبي تصبح على خير باجر وراك دوام ،، قال لي ماعليه خليني احضنج اكثر انا باخذ إجازة وبقعد معاج الي بعد ولادتك نفس ما قلت لك ..ما راح اخيلج...هاذي اخر ثلثاء اداوم فيها,,,آآآآآآآآآآآآه يا حبيبي وكأنك تشوف باجر .. قلت له "بس انا بنام يالله عاد..."
خله راسه على بطني ومسح بيده" بابا..بابا..بابا انا احبك واييييييييييييييييد" قلت شفيك استخفيت وانا اضحك عليه!!
قال لي"ما يخصك واهو يضحك.. خلها تتعود على صوتي ,,خلها تسمعه..يقولون الطفل يسمع كل الي يصير،يسمع كل الاصوات ويميزها..لا تصرين انانيه تبينها بس تعرفك انتي".. ياليت هذه الليله ما طلع لها نهار ..ياليتها كانت اخر يوم بعمري ...

في يوم الثلثاء صحاني من النوم وقال لي حبيبتي اتصلي للدكتور وقولي له انك امس ما كنتي تحسين بتحرك البيبي عدل،، قلت له عمري انا تعبانه ابي انام خلها بعدين انت روح الدوام الحين ،، اصر علي فأتصلت للدكتور وقال لي الدكتور ماعليه انتي اكلي فطور واتصلي لي وقولي لي شنو يصير هذا عادي المفروض لانه موعد الولاده صار قريب وحجم الجنين صار كبير .. قلت زوجي "شفت اكو قال عادي يالله خلني أنام" وقال لي قومي خلنا نطلع نتفطر في اي كوفي شوب" وكانه عارف انه هذا اخر يوم يطلع معاي فيه " كان يراشيني وكأني بنته وخايفة من الامتحان وماابي اروح المدرسة ..
ركبنا السيارة واحنا محتارين وين نروح..قلت له مادري مو انت تبي اتوديني يالله على كيفك انا ما يخصني ...
اختار كوفي شوف كلش قريب من عيادة الدكتور "يقص علي" علشان اهوه يبي يوديني له واذا قالها لي من البدايه ما كنت بروح وياه...جني طفله ياخذها ابوها يشتري لها لعبه تفرح فيها وبعدين يوديها لموعد التطعيم.....

تفطرنا واحنا فرحانين ونخطط لمستقبل بنتنا وفرحة انه الموعد صار قريب.....أأأأأأأه
اتصل لي الدكتور وسالني وقلت له كل شي تمام ..
بس حبيبي ما رضى قال لي خلنا نروح له ونطمنن على بنتنا,, قلت له حبيبي ما يحتاج اليوم الثلثاء وانا عندي موعد معاه بكره الاربعاء "على اساس انه اخر موعد قبل الولاده الي كانت مقررة يوم السبت"،،بس مارضى وقال لي علشان خاطري انا خنلنا نروح بدل بكرة اليوم ابي اطمن اكثر على صحة البيبي..
ورحت معاه..والفرحة ماشالته لما سمع دقات قلبها وكأن اول مرة يسمعها مو كأنها للمرة الف يمكن ...
اجه صوبي ومسك يدي بقوه وقال انا فرحان اخيرا بشوفها وبشيلها ما بقى شي ..احبك بابا..بابا تسمعيني ..انا ابوك ..انا احبك واييد......متى بس اشيلها متى يارب؟؟

رجعنا البيت الساعة 1 الظهر وقال لي انا ما راح اتاخر عليك بخلص بسرعة وبجي لك اقعد معاج ..يالله حبيبتي انا بمشي"آآه وياليتني ماخليته يمشي ياليت رحت معاه او قلت له انا ابيك معاي الحين ياليت قلت له بطني يعورني لا تهدني تعال اقعد معاي "..
..
دخلت بيت ابوه وانا اضحك واقول لاخواته شكله بسويها فيكم وبولد،شكلها بنتي شيطانه وتبي تطلع للدنيا بسرعة..

دخلت الغرفة في بيت ابوه واتصلت له وكان اهوه في الشغل كنت اطمن عليه انه وصل وشنو بسوي ..قلت له حبيبي انا خايفة من الولاده.. "عمري لا تسوين جذي جذي لا تخليني اخاف عليج، مابصير شي بتجوفين ،انشالله خير لا تخافين،انا معاج" .. كانت الساعة 2 وربع ،فقال لي حبيبتي انتي نامي الحين لانك تعبانه لا تخافين انا وياج والله اموت فيك ما اقدر اشوفك جذي ،انا ساعة وراح اجي البيت ما راح اتاخر عليك ولا على بنتي..احبك ...باي( ما ابالغ اذا قلت انه ما كان يناديني بأسمي الا قليل ،،كان دايما يقول لي "عمري او "حبيبتي"...
نزلت التلفون وانا مرتاحه انه ما راح يتأخر ويرجع بسرعة لانه ما اقدر على بعده بس لازم انام الحين لانه لما يرجع لازم اكون مفرفشه وعلشان الوقت يمشي وما احس فيه.

في الساعة 4 حسيت وكأنه احد اخذ سكينه و غرسها في ظهري بدون اي شفقة.. اخذت تلفوني واتصلت فيه ابي اقوله وينك انت قلت لي بترد وانا قاعده انطرك ,,وحشتني ,,
بس ماجاوبني ..واتصلت مره ثانيه وثالثة..بس ماجاوب...لعنت ابليس وراح الالم ونمت مره ثانية لكن كانه شي يقول لي لالالالا قومي فاتصلت مرة ثانية وثالثة بس مافي جواب...الساعة 4و45دقيقة اتصلت لاحد الموظفين الي معاه وسالته عن زوجي فقال لي اهوه في مكتبه شوي و راح اشوفه واخبرك...

بعد لحظات الا باب الغرفة كان راح ينكسر ..فتحت الباب وانا خايقة ..قالت اخت زوجي الكبيرة جدي مات"والد امها لانه كان في العناية المركزة قبل ايام" تقول امي خرجت من البيت تصارخ ...

طلعت من البيت مع السايق"الله ستر انه مو انا الي كنت اسوق" كنت ابغي اروح المستشفى لجد زوجي وأكون معاهم في هذه المصيبة ،،،،بس لحظة... زوجي وين ليش ما يجاوبني صار له اكثر من ساعة....

قلت للسايق ما ابغي اروح المستشفى خلاص ارجع ،ابغي اروح لزوجي لانه ما يرد على مكالماتي ولا الموظف الي معاه جاوبي بعد!! عجزت وانا اتصل فيه... انا خايفة يقولون له جدك توفى يخاف او يطلع من الشغل ويمشي سرعة ويسوي حادث ابغي اكون معاه علشان اهديه....وطول الدرب وانا اتصل فيه بس مايجاوب صارت الساعة 5 وشوي بس زوجي ما يجاوب ولا الموظف اتصل لي مرة ثانيه ،،لا مو معقوله "انا براويك ليش ماترد علي ،،جذي اتخوفني عليك،،اكيد بسوي له مشكله كبيرة،،اكيد قاعد في إجتماع وتلفونه على المكتب مسويه صامت ،بس ماعليه هين بشوف" طول الدرب وانا اقول جذي وانا اتصل فيه.

ووصلت شغله ونزلت من السيارة ، بس حسيت انه الدنيا صارت سوده للحظة،،شفت الموظفين الي معاه يركبون سياراتهم بسرعة..شفت سيارةابوه أهناك مفتوحة,,قلت في خاطري لا مافي شي اكيد رايحين المستشفى لجد زوجي.... ولما شافوني نزلوا لي وقالوا لي لا تخافين اركبي السيارة زوجك مافيه شي بس تعب شويه واخذوه المستشفى...حسيت انه السماء انطبقت على الارض وانا بينها.. خليت ايدي على سيارته وانا اقول لالالا مافي شي انا ليش خايفة...انتوا تكذبون علي انا مابمشي من اهني ـبروح له مكتبه اكيد اهو اهناك بس انتوا ماتبوني اروح له,, جاني واحد من الموظفين ودخلني سيارة وقالي لا تخافين مو زين انتي حامل اهوه مافي شي صدقيني،، دخلت السيارة مع السايق وانا اصيح,, بس اقنع نفسي واقول لا ماعليه زوجي مافيه شي انا مكلمته قبل ساعتين وقال لي برجع لك بسرعه ، اكيد في احد قال له انه جدك مات فتأثر وتعب ...بس ليش سيارة ابوه اهني ؟؟؟خلني اكلمه واشوف اكيد اهوه معاه ,اكيد ،يمكن لما قالوا له جدك تعب شوي فجاه ابوه واخذه -اكيد جذي-بس خلي اشوف
"عمي اشفيه زوجي جاوب...بس لا حياة لمن تنادي ...قاعد يصيح ،،لالالا مافيه شي صح تكلم" سكر التلفون في وجهي ....

وصلت المستشفى وانا احس انه المستفشى صارت في اخر الدنيا ،صارت بعيده ، ما اوصل لها بسرعة ..

دخلت قاعة المستشفى وشفت ام زوجي في حاله مو طبيعيه "مسكينه "بس قلت مسكينه ابوها مات علشان جذي قاعده تصارخ،بس كلانها كانه عن ولدها....لا لا لا... دزيت الشرطة الي عند الباب ابي ادخل ..يقول لي ممنوع اختي........ "شنو يقول هذا انا زوجته وابو اشوفه ابي اطمن عليه اشفيك انت ما تفهم" دخلت بالقوه تقريبا ظربتهم ودخلت ...شفت منظر ما انساه ..شفت ابو زوجي واعمامه واقفين ينتظرون وابوه في حاله هستريه..اخذي من ايدي"ماعليه بابا انتي حامل لا تخافين قاعدين يعالجونه مافي شي"اخذني وطلعني بره ..كلامه ماهداني بس حاولت اقنع نفسي ...جلست على الارض عند رجل الشرطة وام زوجي ايضا ,,صارخت علي امه وقالت "صار احسن ؟؟ شفتيه؟؟ مغمى عليه يقولون !! صج؟؟ كنت اطالعها باستغراب ليش كل خوف عمي يقول مافيه شي الحين بصير زين.............شوي واخدوا ام زوجي ودخلوها غرفة الاستراحه علشان تنتظر وتهدء شويه,,حاولوا معاي بس انا ما رضيت " اشلون اروح داخل وزوجي اهني مااقدر...صرخت عليهم "لا احد يلمسني خلوني ..انا بنتظره اهني" .......صاحت امي زوجي وقالت خلوها قلبها يحرها على رجلها((ما انسى هلكلمات))....
كل شوي اطل عليهم واحاول ادخل بس ما يخلوني...

فقالوا لي قاعدين يعالجونه والحين بصير زين ... اكثر من ساعة من المحاولات ....لحظات واخت زوجي دزت الباب ودخلت عندهم... وسمعت صرختها واهي تقول "اخوي مااااااااااااااااااااااااااااااااااااااااااات"
نعم مات.. سكته قلبية... نعم ورنت أجراس الرحيل
الرحيل الأبدي الرحيل بلا عودة....

دخلت عنده وانا اضحك عليهم"" دخلت عنده في الغرفة شفته وكأنه نايم وينتظرني اصحيه...ابتسمت له وقلت له "حبيبي قوم..عمري قوم..اليوم ما بعقدك نفس كل يوم ..رحت عند قدمه..وحبيتها ..رحت عند راسه وحضنت راسه وبست شفايفة..شفايفه دافيه نفس كل مره...طالعته وقلت له حبيبي قوم عاد تاخرت علي،،الحين الساعة 7 وانت قايل لي ساعة وترجع شلون تتأخر هلقد...
بس مايرد علي!!!!ليش؟؟؟ليش؟؟؟ليش ؟؟؟انا ما زعلته ولا ضايقته !!
فتحت عينه ..كان يطالعني ،،كانت عينه في عيني ..سمعته يقول خليني يا حبيبه اشوفج لاخر مره..خليني احس بدفا حضنك للمرة الاخيره....
"حبيبي..عمري...فديتك..يقولون انك مت بس يجذبون.. انا ادري ..انت ما تسويها وتخون العهد..انت وعدتني انك دايم تكون معاي..انت وعدني انك تحميني وتسعدني ..اكيد يجذبون"

وقفت الدنيا واسودة عندي وصار الزمن ما يمشي " كنا متوقعين الجد المريض هو الي مات مو الشاب الي ما كمل 29 سنه"...

اجه ابوه وطلعني من عنده واهوه منهار وانا اطالعه،،ليش جذي ....طلعني بره القاعة واهو يرجف وانا اطالع جدام مصعوقه بدون اي دمعة.....شوي وعباتي تنجر ..طالعت مين هذا ؟؟هذه امه.."اشفيه كلمك؟؟صار احسن؟؟اكيد كلمج!! جاوبي ليش ما تتكلمين؟؟؟صار احسن ؟؟ بس انا ما اجاوبها ..مسكها عمي من ايده الثانيه وقال لها تعالي قعدي اهني الحين بصير احسن انشالله..((مادري يا رب اهوه قاعد يكذب عليها ولا فعلا بعالجونه الحين وبيصحه))
يارب ليش ما اصيح؟؟ ليش الدمعة مو قاعده تطلع ؟؟يمكن ما احبه!!!!!!

بعد حالي 10 دقايق اجه عم زوجي واخذ ام زوجي وقال لها تعالي شوفيه...
"يارب صار زين يعني ؟ تعالج اكيد؟ بس انا ما اقدر اقوم واروح معاها فيني الم!! بس لازم استحمل ما ابين لاحد اني اتالم علشان ما يرجعوني البيت وزوجي موجود بالمستشفى..
لالالالالالالالالالالالالالالالالالالالالالا
لالالالالالالالالالالالالالالالالالالالا
قوم قوم قوم
"عمتي تصرخ" أخذوها وطلعوها وركبوها السيارة ورجعوها البيت...
بس انا للحين بالمستشفى ...انا وحيده ..انا خايفة.. بس انا انتظره بقوم الحين وبجي يوصلني ،ما راح يخليني ،انا اتألم اكيد بوديني المستشفى...
رجعت عند الباب بس ما دخلوني" الله يخليك خلني اشوفه ،اجب ايدك خلني اروح له، حرام عليك علشان خاطر بنتي، احب ايدك" بس الشرطي ما خلاني وقال لي"خلاص اختي انتي جذي قاعده اطولين الاجراءات"..
شافني زوج خالته -اجه جمبي- واهو يصيح وقال لي" بابا تعالي اهني ليش ما رحتي معاهم البيت؟؟ قلت له لا عمي انا زوجي بوديني الحين!!!
اخذني معاه وقال لي انا بوديك البيت الحين واهو راح يجيبوه اهناك ،تعالي"

وصلت البيت وانا في صمت ...دخلت بيت ابوه..كانت امه على الارض وتصارخ والناس يهدونها..كانت تقول "تعبي 29 سنه وين راح" تعالي حبيبتي في حضني ..تعالي حبيبتي" رميت نفسي في حضنها بس معقوله يارب الي قاعدين يقولونه ..لا اكيد يجذبون....
زاد الالم ...
زاد.. اخذتني امي وخالاتي وبعض ربعي ووقفوني علشان اركب السيارة واروح المستشفى..بس امه تصارخ علي وتقول"لا تروحين ..لا تروحين واتولدين ..الحين بجي ولدي واهو بدويك..لا تروجين بدونه"..

بعد 3 ساعت فقط طلت ابنتي على الدنيا ..الساعة 10 ونص جاءت ،وهي تصرخ وين والدي الي كان يكلمني وانا في بطنك وين ذاك الي كان راح يهز المهد...تصرخ واهي تقول بوجع ..
مات ورحل..

من دون ضمة بالصدر

آآآآآآآآآآآآه وشلون يضمك من توسد باللحد؟


لا لا تقولي سافر بيوم الولادة

وما قدر يحضني ويقبلني أو يرسل سلامه

وما سمعته يناغي روحي الوالهه بهمسة كلامي

وما مسح راسي ولا قبل جبيني

وما سمعت بإذني منه..

لا أذان..

ولا إقامة..

آآآآآآآآآآآآه يادنيا وكاني احكي لكم قصة مسلسل غير واقعي ...

[حبيبة بنتها]

ربنا يصبرك حبيبتي والله دمعتي بعيني

[أخت السحاب]

لاحول ولاقوة الابالله
انالله وانا اليه لراجعوووون
عظم الله اجركم وجبر مصااابكم
والله حزنتني وبكيت مع كلماتها يالله ماصعب الفرااااق
اللهم انا نسالك حسن الخاتمه

[أول فرحه]

الله يعوضك خير والحمد لله على كل حال
والملتقى الجنه الله يرحمه

[ام تميم 66]

لاحول ولاقوة الا با الله ,,,
ويعطيك العاافية,,,

[بنت الريف]

الصرااااااااحة قصة محزنة الله يصبرهااااا
مشكووووورة حبيبتي ع النقل

[..نبض قلبه ..]

والله ماادري شقول
بكيت بكي ماعمري بكيته
لاحول ولاقوة الا بالله العظيم
انا لله وانا اليه رجعون
الله يثبت قلبك ويعطيك الصبر
دنيا وسخه ماتستاهل اي شي من جد

الكلمات تخونيني

[أمـ وسامـ ..]

لا اله الا الله محمد رسول الله

البقاء لله وحده

انا لله وانا اليه راجعون

نسأل الله لكم الجنه

صبركم الله ..

[ريم الحربي]

آمين الله يصبرها ان شاء الله...
حبيبة بنتها حياتي لاااااااااااااااااااا مو انا هاذي قصه انا نقلتها ؟؟؟
الله يخليلي حبيبي زوجي ويطووول بعمره يارب ياكريم ويطول بعمر ازواجكم ...

[*قلب(H)حبيبي*]

الله يصبرها إن شاء الله و يسكنه فسيح جناته ..
و الله دمعتي سالت على خدي القصة مرررررررره مؤثرة
و أنا بعد والله فكرتك انتي المقصوده بالقصه بعيد الشر عنك و عن زوجك على إني لسه شايفه مشاركه لك و انتي ما وصلتي التاسع ..
و الله من جد طاح قلبي ..
و مشكووره ع النقل ..