قصة ولادتي بالتفصيل الممل

[احساس هالك]

صباح /مساء الخير
كيفكم كروشات؟
اليوم بكتب لكم قصة ولادتي بأحلى مشاري
يوم الولادة المتوقع كان 6/6/1432هـ
يوم الاربعاء 1/6/1432بعد الفجر عجزت انام قلت اقوم أمشي في البيت أحسن
مشيت ساعة وأخذت شور ونمت صحيت الساعة 7 صباحا لانو عندي موعد أشعة رحت للموعد وب وانا راجعة أحس بمغص خفيف ومو منتظم قلت يمكن من التعب والارهاق
نمت الى الساعة 2ونص وصحيت لانو عندي موعد مع الدكتورة
رحت للموعد وحكت عن الاشعة وكل شي تمام قالت لي ولادتك خلال الخمس الايام الجايه أي بوادر ولادة روحي للطوارئ على طول قلت انا ان شاء الله اليوم ولادتي ضحكت وقالت آمين

رجعت البيت وأخدت شور وأكلت ونمت وصحيت على مغص الساعة 6ونص الم اسفل بطني وظهري بس خفيف مره
طنشت ونمت وشوي احس الالم يروح ويرجع كل 5 دقايق الى الساعة 8 ونص بعدها صار كل 3 دقايق بس نفس الالم يعني مازاد
زوجي كان طالع وماقلت له لانو بيقول يللاه ع المستشفى وانا مابي اروح
انتظرت الى الساعه 10 ونص وبدا يزيد الالم بس اقدر اتحمله
جا زوجي وشافني وقال يللاه مشينا قلت ماابغى
طنشني وراح جهز الشنطة ودخل المطبخ جاب لي تمر ومويه مقري فيها ادعيه وايات تسهيل الولادة, أخذت تمرتين وشربت مويه ورحنا للمستشفى
وطول الوقت بالسياره اذا جاني الم ادعي واقرا قرأن


وصلت للطوارئ بعدين دخلت غرفة الكشف
وقالو لزوجي اطلع برا ,انا قلت لالالا خلوه معي قعددو يضحكون علي قالت خلاص 5 دقايق ويطلع
خذت تحاليل بول(الله يكرمكم)وتحاليل دم
وحطت بيدي ابرة المغذيه
ودخلت وحده قالت انا القابلة فوزيه ياحبيبتي انا هنا ضحكت لانو شكلها صغير يعني بنوته مثلنا
وقعدت تسولف معي وكانت مره حبوبه
خلصت الخمس دقايق وطلعو زوجي برا وجا وقت الكشف انا هنا جتني الصيحه وخفت
قالت لي لاتخافين مارح تحسين بشي اذا استرخيتي
كشفت علي وحسيت بألم بس خفيف مره وطلع مفتوح 3 سانتي
قالت بعد ساعه نوديك غرفة الولاده ,انتظرت ساعه والطلق نفس الشي كل 3 دقايق ونفس الالم

بعدها ودوني غرفة الولادة وحطت لي المغذي وجابت لي الاوكسجين والمخدر قالت لي اذا حسيتي بألم استخدميه ,انا طول الوقت أكابر واقول لالا اقدر اتحمل مارح استخدم المخدر هالحين اخاف اذا اشتد الالم ماعاد ينفعني
صبرت وبعدها بدا يشتد الالم الى الساعه وحده ونص بعدها بديت استخدم الاوكسجين والمخدر وفوزيه ياحبي لها طول الوقت تسولف معي عشان مااحس بالوقت
الالم بدا يزيد وبديت اشفط بالمخدر واروح بعالم ثاني واصحى وانا اقول لا اله الا الله ومرات استغفر ومرات اقرا قران
بس صوتي كان ينسمع بس مو صراخ كنت من شدة الالم ادعي بصوت مسموع من غير مااحس بحالي
مرت ساعه وساعتين وانا اتألم بس الحمدلله ربي كان معي

الساعه3 وشوي ماقدرت اتحمل وقلت لها اعطيني مسكن قالت طيب بس لازم اشوف الرحم كم سانتي وافتح لك موية الراس
طبعا كل هالاشياء توجع بس الله يخلي المخدر ,صح تحسين بألم بس يهون وربي
قالت مفتوح 5 سانتي وفتحت موية الراس وعطتني مسكن (ابرة في الورك )
سكن الالم بس مو مره يمكن نص ساعه ورجع الالم القوي , من هنا بديت اتألم مررررره واشفط بالمخدر واصحى وانا اقول عطشانه ,طبعا معاية المويه المقري فيها وكل ماسمعتني فوزيه جت وشربتني موية ومرات اصحى واقول حر حر وفوزيه ماقصرت وربي كانت تجيب مناديل فيها موية بارده وتمسح على راسي وبطني ووجهي
وتقولي حبيبتي خلاص باقي كم ساعة ويجي البيبي
بعدها زاد الالم بشكل فضيع وبديت اذكر الله بصوت عالي واتنفس من خشمي زفير من فمي , جت كشفت علي كان مفتوح 8 سانتي
وربي مر وقت من شدة الالم ماادري ويني فيه ,صلحت لي تنظيف من البراز والبول (الله يكرمكم)
وسوت لي كشف قالت ولادة , والالم كان مررررررررررررره قوي بس طول الوقت اقول اقدر اتحمل وقالت لي اذا حسيتي كأنو تبغين الحمام ادفعي على طول اقعدت على هالموال 10 دقايق بعدها جت سوت لي توسعه وربي ماحسيت فيها لانو ألم الطلق كان قوي, رفعت رجليني وقالت لي اذا جا الطلق دفي ولا توقفين خدي نفس سريع وكملي
سويت هالشي مرتين وشرف حبيب ماما مشاري يوم الخميس 2/6/1432 الساعه 5:55 وحسيت بطلعت راسه بس ماكانت توجع مرره
اخذوه وحطوه بسرير بجنبي ونظفوه وفحصه دكتور الاطفال ,وربي يابنات انو طول الوقت اناظر فيه وهو يناظر فيني واقول الحمدلله, شوي وقعد يبكي واطالع فيه واقول ياحياتي انا حبيبي انت وكلهم يطالعون فيني ويضحكون
طلعت المشيمه وجا وقت الخياطه قلت لها ابغى 10 ابر مخدر مابي احس بشي قالت طيب مارح تحسين بشي وكان المخدر معي ومن الخوف قعدت اشفط فيه لين خلصت ماحسيت بألم بس كنت احس بألابره وهي تدخل وتطلع
نظفتني وعقمت الخياطه وسلمت علي وراحت
جابو لي حبيبي مشاري وبوسته ودخل زوجي ودموعه في عينه يقول طولتي وخفت عليك وكان يرجف طول الوقت قلتله خلاص مافيني شي وربي اللي يشوفه يقول هو اللي كان يتألم مو انا
بعدها طلعو زوجي برا واخذوا مشاري للحضانه
وجت وحده سوت لي مساج لبطني وكان يوجع مرره وكنت احس بالدم وهو يطلع مني
جابت لي فطور وفيتامينات ومسكن ,خلتني شوي بعدها دخلوني الحمام وشطفت جسمي
لبسوني ملابسي وحطوني على الكرسي وودنوني غرفة التنويم
والحمدلله بس اخدت مشاري بحضني نسيت الالم

الحمدلله هذا ميشو نايم وانا قاعده اكتب قصة ولادتي
طبعا خلصنا من الولادة وبدا مشوار الترضيع الايام الاولى كانت مره صعبه لدرجة كنت ابكي من الالم وكان صدري متحجر بس كنت اضغط على حالي واحاول والحمدلله هالحين كل شي تمام
لا أوصيكم كروشات لاتنسون الادعيه و طريقة التنفس وربي انها تخفف كثير من الالم
وبس هذي قصة ولادتي وأسفه ع الاطاله

[جامعية]

الحمدلله على سلامتك
وألف مبروووووووووووك يتربى فعزكم يااارب

ماقصرتي شرحتي قصتك بأمــــــــــــانة الله يسعدك

[ورد الشمال]

الحمدلله على سلامتك ومبروووك مشاري الصغيرون
الله يحفظه و يخليه لكم
تعبك على اجر و ما يضيع عند ربي
عشان كذا الجنة تحت اقدام الأمهات و عقبالنا يارب

[joumana]

الحمد الله عللى سلامتك يا رب و عنجد كلشيي بيهون بس الوحدة تشوف ابنها او بنتها
الله يحفظلك ابنك يا رب

[مملوحة الوصآيف]

ياويلي وربي اني اتخيل نفسي في هالموقف

يارب ترزقني واخواتي الكروشات بولاده ميسره وسهله وتقر عيونآ بشوفتهم سلمين معافين

الحمدلله على سلامتك خيتووووو

ويتربى في عزكم ان شاءالله

[أم رنيم وسديم]

الف مبرووووووووووووك,,,,,
يتربى في عزك ,,,,,,
والحمدلله ع سلامتك ,,,,,

[حاملة قيمي]

الحمدالله ع سلامتك ..ويجعله من البارين
وربي بكيت وانا اقراء القصه
من فين انتي ؟ وباي مستشفى والدتي ؟
ربي يسهل علي وباقي الكروشات

[منايل]

مبروووووووك ويتربى بعزكم

والف الحمد لله على السلالالالالامه

[أم لطيفه]

مبرووك عليكي مشاري ويتربي بعركم
وعجبالنا بولاده ميسره إن شاء الله

[طبيبة القلوب]

تعرفي خيتو ,,حبيت شخصيتك ... بشكل لا تتصوريه ...
اول شي انت من النوع الجاد ., وانسانة عملية ... قليل نلقى بنات بنفس مواصفاتك ,,وتعجبني البنت اللي زيك ....


عنجد الف مبارك الك ,,,ربنا يكرمك ويتربى بعزكم ياربي ....

وادعيلي ربنا يقومني بالسلامة