[ريوماتي]

فطيرة تركية تشبه لحد كبير البيتزا .. اسمها في تركيا Pide أو Pita
كل منطقة في تركيا ليها الوصفة الخاصة بيها .. بس تقريبا العجينة واحدة . الأختلاف بيكون في نوع الحشو فقط
و طبعا احنا ممكن نبدع في الحشوات زي ما احنا عايزين .... النهارده حنعملها بحشوة اللحم المفروم


المقادير دي تعمل 2 بيتا (فطيرة) كبيرة ... ممكن تعملي المقاس اللي انتي عايزاه


مقادير العجين :
1 معلقة طعام خميرة جافة
1 كوب لبن دافئ
1 ملعقة صغيرة سكر
1 ملعقة صغيرة ملح
1 بيضة
3 ملعقة طعام زيت نباتي ( دوار شمس أو ذرة )
3 أكواب دقيق


مقادير الحشو :
من ثلث إلى نصف كيلو لحم مفروم
بصلة متوسطة مفري
2 فص توم مفري
2 معلقة طعام زبده او زيت نباتي
نصف ملعقة صغيرة كمون
ربع ملعقة صغيرة فلفل اسود مطحون طازج
1 ملعقة صغيرة ملح
نصف كوب بقدونس مفري
2 ملعقة طعام نعناع اخضر مفري
2 ملعقة طعام عصير ليمون
2 حبة طماطم مقطعة مكعبات صغيرة
1 كوب جبنة موتزاريلا
2 بيضة
قليل جدا من النشا


لعمل العجين :
ندوب السكر و الخميرة الجافة في اللبن الدافئ و نتركهم حتى تبدأ في التخمر
في طبق العجن نضع الدقيق و الماح و الزيت والبيضة و نضيف ليهم خليط اللبن و الخميرة ونعجن حتى نحصل على عجينة لامعة و متماسكة - حوالي 10 : 12 دقيقة ....انتي و عضلاتك بقى باضحك
نغطي العجين بقليل جدا من الزيت و نغطيها بفوطة و ننتركها في مكان دافئ لتختمر و يتضاعف حجمها


لعمل الحشوة :
في طاسة نضع الزبد او الزيت و نحمر فيه البصل حتى يكون لونه دهبي فاتح .. نضيف التوم ثم اللحم المفروم و نتبله بالكمون و الملح و الفلفل و نقلب حتى يتغير لون اللحم و يستوي ( زي اللحم العصاج بالضبط )
نرفع اللحم عن النار و نضعه في طبق و نتركه ليبرد .. نضيف اليه البقدونس و النعناع و عصير الليمون


لتشكيل الفطائر :
نقسم العجين المختمر نصفين و نشتغل كل جزء على حدى
نفرد العجين لسمك حوالي 1/2 سم على شكل بيضاوي
ننقل العجين لصينية الخبز
نرش وجه العجين بقليل جدا من النشا ( النشا مش حيخلي العجين يشرب اي سوائل من الحشو ة)
نفرد نصف كميه اللحم و الطماطم و الموتزاريلا
نتني حروف الفطيرة علشان تبقى شبه المركب
نضرب البيض مع الملح و الفلفل و ندهن حواف الفطيرة بالبيض و باقي البيض نصبه فوق الحشوة بطريقة متساويه
نكرر الخطوات دي لعمل الفطيرة التانية
تخبز الفطائر في فرن سابق التسخين على درجة حرارة عالية ( زي ما بنخبز البيتزا ) لمدة 25 دقيقة او حتى تصبح ذهبية