اسئلة عن المركز الطبي الدولي ( فتيحي)... بليز

[مايسه حجازي]

السلام عليكم يا لزيزات
صباح / مساء الخير

انا حامل في الشهر السادس ودا اول بيبي ليا
و بتابع في مستشفى فتيحي وعندي كم سؤال عنها للي ولدو فيها ياريت تساعدوني

1/ كيف كانت ولادتك طبيعي ولا قيصري , واذا قيصري من البدايه كانت محدده ولا فجأة ؟

2/ نوع الخياطة ورايك فيها ؟

3/ ايش نوع البنج ( كمامه , ابرة ضهر ,,الخ ) ومتى اخدتيه وايش رايك فيه ؟

4/ تعامل الممرضات حنونين يصبرو عليكي ولا لا؟

5/ مساحة الغرف ونظافتها والاهتمام بالام والمولود كيف مستواه ؟

6/ يسمحو لاحد يدخل معاكي غرفة الولاده زي امك ,زوجك ,,, الخ ؟

7/ يسمحو لاحد يبات معاكي ولا لا؟

8/ الاكل عادي ولا اكل مستشفيات , وللأم والمرافق ولا بس الام ؟

9/ كم يوم جلستي في المستشفى , وكيف يحسبو الوقت يعني يوم 48 ساعة ولا بس تاني يوم ولا تاني يوم ولاده على طول تطلعي؟

10/ ايش الاشياء الي توفرها المستشفى والاشياء الي لازم اجيبها معايا زي حفائظ , صابون , شامبو وكدا ؟

11/ الفاتورة النهائية كنتي راضية عنها ولا زودو اشياء ماتعرفي عنها واذا تامين دفعوك شي غير الي حيدفعو التامين؟

12/ تقييمك للخدمة ككل هوا احسن ولا سليمان فقيه ؟

معليش طولت بالأسئلة بس بدي اعرف اكتر عن المستشفى هيا صح كمراجعات وشكل من برا حلوة بس من يعرف وقت الجد ايش يصير

وشكرا مقدما

[مهره الدنيا]

حبيبتي انا ولدت من شهر طبيعي الحمدلله

وأخذت كمامه وطول الوقت حاسه بي الالم

وتعبت مررررره

وغرفه الولاده والملاحظة خاصه لوحدك

ومسموح بمرافق واحد فقط

والممرضات صبورين شوي يعني ممرضتي الخاصه

صارت تخاصمني حسبي الله ونعم الوكيل

والله شفت الموت

الحضاااانه مررررره في اهتمام بالبيبي

لمن اطلب البيبي يجيبوه بعد ساعتين ثلاث ساعات

وموسخه في الحفاظ الله يكرمك وانا والله أغير لها

الخياطه عاديه


مسموح بمرافق انا زوجي. كن معي ومحسوب له

الأكل

مع أقامه يومين
والأشياء المتوفره حفاظ لك وللبيبي

وكلوتات للنفاس والادويه والمغطس

ودوره المياه مجهزه بالصابون والشامبو
وفرشه أسنان وما كينه ومشط




http://forum.hwaml.com/t173195.html



http://forum.hwaml.com/t113048.html

وتقييميالله يرضى على سليمان فقيه


ويااااارب اكون افدتك اختي الغاليه


وأي سؤال تحت أمرك حبيبتي

والولاده تساهيل من عند الله

[مهره الدنيا]

حبيبتي والفاتوره ما اعرف لأني

تأمين يــــا عسل

وهي المستشفى بس فخامه

والله يسهلك ويقومك بالسلامه يارب

[مايسه حجازي]

حبيبتي الله يسعدك ويجزاكي خير ويخلي لك اولادك وزوجك على ردك مع انه خوفني كتير من المستشفى

[weda]

انا كمان حابه اعرف عن المستشفى ..

انا اراجع في فقيه بس المستشفى زحمه مره واخر مره تعبت رفضو يستقبلوني يقولو مافي سرير ولا غرف فاضيه وصحبتي كذا قالولها روحي مستشفى ثاني عشان الغرف مليانه :(

نبغا تجاارب كمان في الطب الدولي والتكلفه شامله كم ..؟

[om renad]

انا ولدت عندهم من سنتين
و مرررة عناية و رعايه
و بنتي مايجيبونها الا نظيفة و متروشة و حفاظتها نظيفة مجرد ما اطلبها تجيبها الممرضة يتاخرو اذا دكتور الاطفال يكشف عليها
بالعكس يطفشوني كل شوية تجيبها ليه
وانا ما ابغى الا انام من تعب الولادة
ولادتي كانت عملية
و زي ما قالت اختي مهرة يدخل معايه مرافق واحد زوجي و مرة امي الله يحفظهم لي
و غرفة الملاحظه كنت لوحدي فيها
و غرفهم بشكل عااااام نظييييفة
24 ساعه الممرضات موجودات وقت ما تحتاجينهم كل ما تخلص مناوبة وحده تجيب اللي بدالها و تعلمني مدام انا خلصت دوام
اذا تبغي حاجه هذي بدالي موجوده و الحمدلله مرة كانو حنونين معايه >>>> الولادة و الدكاترة و الممرضات كلها تساهيل من رب العالمين
خذي معاكي ملابس و غيارات لك انا ما ارتحت للغيارات حقتهم ما احبها
و اكلهم تمام قبل كل وجبه يجون يسالون اذا معاكي مرافق ولا لا
و يسالونك ايش تحبي تاكلي

وان شاء الله ولادتي شهر ذو الحجه ورح اولد عندهم باذن الله
دعواتكم لي بالتسهيل و المرة ذي يارب تكون ولادتي طبيعيه


آآآآسفة طولت عليكم و كتبت قصة حياتي بس حبيت افيدكم باللي اعرفه
بالنسبة للفاتورة انا كمان على التأمين

[Omm Adam]

يسعد صباحكـ/مساءكـ
ربي رزقني بتأمين وأنا ببداية التاسع فقلت أبغى أولد بأفخم مستشفى وللأسف قالولي أروع مستشفى الـIMC من ناحية الدكتورات والممرضات وكـــــــــــــــــل الخدمات ..
إن شاء الله حاكتب قصة ولادتي قريب لكن حاليا بجاوب على أسئلتك لكن اتذكري إنه أكبر خطأ سويته إني ما اخترت دكتورة معينة أتابع معاها وتولدني .. كل إللي قالولي هالمستشفى ممتاز ولدو مع دكتوراتهم لكن أنا قلت بما إنه كلهم تمام فخليني عالبركه والحمدلله على كل حال ...

1/ كيف كانت ولادتك طبيعي ولا قيصري , واذا قيصري من البدايه كانت محدده ولا فجأة ؟
طبيعي ولله الحمد مع طلق صناعي أو على قولتهم محفز

2/ نوع الخياطة ورايك فيها ؟
خياطة عادية وتعتبر متوسطه مو ممتازة ولا رديئة

3/ ايش نوع البنج ( كمامه , ابرة ضهر ,,الخ ) ومتى اخدتيه وايش رايك فيه ؟
أول شي أدوني إبره عادية وللأسف أدوني إياها وأنا لسه ما اتألمت .. شكله روتين .. ولمن احتجتها قالولي لا ماينفع قبل 6 ساعات بعدين بيبي ينام !!
بعدين أدوني كمامة حلاوتها إنك تنامي وما تدري عن الوقت أو الألم .. بس أنا اتحسست منها سخنت واستفرغت أشياء خضرا وانتي بكرامه مع إني ما أكلت من قبلها بيوم
آخرها طلبت إبرة ظهر وكانت ممتازة بس بعد شوي بدأت أحس بالألم وناديت الممرضات وأنا معصبه قلتلهم أنا دافعة ألفين ونص عشان ما أحس بالألم قالولي هذي مخففه قلت زيدو الجرعه ما أبغى تعب زيادة وزادوها والحمدلله كله كان تمام بس وقت خروج البيبي تحسي بضغط مو ألم كأنك بتنفجري .. بس مره حلوه قبل وبعد الولاده وأنا أضحك وأتفرج عالتلفزيون تبارك الله !!!

4/ تعامل الممرضات حنونين يصبرو عليكي ولا لا؟
رائعين بكل ما تعنيه الكلمة من معنى .. حتى وحده اعتذرت لمن خلص دوامها وقالتلي سامحيني وجاتني ثاني يوم للغرفه تتطمن علي سلمت علي بالأحضان وباركتلي وقالتلي فين بيبي ههههههههههه يسعدها خففت عني كثييييير

5/ مساحة الغرف ونظافتها والاهتمام بالام والمولود كيف مستواه ؟
المستشفى فندقي درجة أولى يعني نظافة مليون بالميه وأي وقت تتوسخ الغرفة تقدري تناديهم ينظفوها
أما الاهتمام بالمولود كان طيب من ناحية النظافة والفحص وغيره ويلبسوه من عندهم بعدين يطلبوكي لبس لمن يغيروله .. بس ما عجبوني بشي وقهروني بشي .. ما عجبوني إنهم يتأخرو لمن يجبوه من الحضانه .. وقهروني إنه ماخرج حليبي من البداية وهذا طبيعي وهم يقولو إحنا نديه صناعي وبالآخر طلعو 24 ساعه مو مدينه شي والول حرام ذبلااااااااان .. ومع إني قريت معلومه إنه الطفل لمن ينولد يقدر ما ياكل 3 أيام ويعيش لكن هم كذبو علي وقهروني لين ما قلتلهم جيبو الولد وأكلوه قدامي
وأنا دخلت المستشفى بدري لأنهم قالولي عندك بكتريا مهبليه ممكن تنتقل للبيبي وقت الولاده ويجيله التهاب رئوي فوقت الولاده نديكي مضاد حيوي والبيبي خلاص يصير محمي .. ودخلت بدري وأخذت المضاد وبالآخر يقولولي نبغى نخلي الولد يومين تحت المعاينه يمكن جاله التهاب رئوي !!!!!! انهرت وصرت أبكي وخليت زوجي يطلعه على مسؤوليته .. أحسهم بس يبغو فلوس ...

6/ يسمحو لاحد يدخل معاكي غرفة الولاده زي امك ,زوجك ,,, الخ ؟
مرافق واحد فقط يعني زوجك معاكي وأمك بتدخل لازم زوجك يخرج مؤقتا

7/ يسمحو لاحد يبات معاكي ولا لا؟
يسمحو عادي وفي كنبه تنفرد وتصير سرير لمرافق واحد

8/ الاكل عادي ولا اكل مستشفيات , وللأم والمرافق ولا بس الام ؟
الأكل أكثر الأشياء روعة في الموضوع كله ولا مطاعم 7 نجوم .. وقبل كل وجبه يجيبولك منيو تختاري منه إنتي ومرافق واحد فقط

9/ كم يوم جلستي في المستشفى , وكيف يحسبو الوقت يعني يوم 48 ساعة ولا بس تاني يوم ولا تاني يوم ولاده على طول تطلعي؟
اليوم 24 ساعه عادي وأنا على التأمين يشمل يومين ولاده طبيعي و3 قيصري .. طبعا أنا قضيت أكثر من يوم في الولادة فما جلست بعدها إلا ساعات وخرجوني أو أدفع

10/ ايش الاشياء الي توفرها المستشفى والاشياء الي لازم اجيبها معايا زي حفائظ , صابون , شامبو وكدا ؟
توفر كللللل شي كأنك بفندق حتى فرشاية الأسنان .. بس جيبي لبسك ولبس البيبي

11/ الفاتورة النهائية كنتي راضية عنها ولا زودو اشياء ماتعرفي عنها واذا تامين دفعوك شي غير الي حيدفعو التامين؟
أنا تأمين وإبرة الظهر بس على حسابي .. وطبعا إذا تبغي دكتورة معينة تولدك تدفعي على حسب طلبها في بعضهم بـ2500 وبعضهم بـ4000 !!!

12/ تقييمك للخدمة ككل هوا احسن ولا سليمان فقيه ؟
ماجربت فقيه لكني ناويه عليه هالمره من كثر ما يمدحوه .. وعشان الزحمه رحت للمستوصف السعودي الأمريكي عند دكتورة سهام أكثر من رائعه وماعندها زحمه كثير بالذات الصباح وتولد بفقيه

معليش طولت بالأسئلة بس بدي اعرف اكتر عن المستشفى هيا صح كمراجعات وشكل من برا حلوة بس من يعرف وقت الجد ايش يصير
تعامل المستشفى بشكل عام حلو لكن أنا بقلك على كم مأساه صارتلي عشان تستفيدي ...
* وقت الولاده إللي داخل داخل وإللي طالع طالع وأحيانا يسيبو الباب مفتوح وزوجي عصب كل شويه يروح يسك الباب ..
ووقت ماكنت أدف وخلاص البيبي يطلع تدخل وحده قمة في المياعه تكلم الدكتورة تقلها في واحد جا يبغاكي تكشفي على زوجته هو قاع يخاصم برا .. والدكتورة عصبت تقلها مو شايفتني أولد المخلوقه !! إذا هي بكريه خليها تستنى مابتولد بسرعه .. وتروووووح الست وترجع بكل برود دكتورة يبغاكي تكشفي دحين ضروري وتقوم الدكتورة معصبه وتكلمه مدري إيش قالتله ورجعت بسرعه !!
* الجدران مو عازله للصوت يعني أول ما تدخلي قسم الولاده وطول ما إنتي جالسه بتسمعي أفلام هنديه وإذا كان مرافقك زوجك الله يعينه .. أنا زوجي شرد بالأول بعدين رجع وكان مرعوووووووووب بس الحمدلله إبرة الظهر خلتني ريلااااااااااااااكس
* كنت بغرفة وقالو جهاز تخطيط نبض الجنين خربان ونقلوني لمكان ثاني .. وللأسف التليفون بغرفتي كان بعيد عني وجهاز نداء الممرضات معطل وللأسف زوجي نومه ثقيل ولمن احتجت الحمام وانتي بكرامه قلت أقوم والمغذي بيدي وأروح الحمام لكن للأسف بعد ما قمت لقيت المغذي حبله قصييييييييييير ومشبوك بالكهربا وماقدرت أتحرك للتليفون لأنه المويه كبت زي الشلال وخفت أتحرك وأزحلق وصرت أبكييييييييييييييييييييييييييييييييييييييييييييييي يييي لين ماقام الباشا
* الدكتورات يجيبو البلا .. تجيكي وحده تكشف وتقلك لاأحد يكشف عليكي غير لمن أجي وبعد نص ساعه تجي وحده ثانيه وثالثه ورابعه حسيت كأنهم بيحفروا كوسا
ولمن تعبت من الكمام جاتني دكتورة حقيره تقلي إنتي منهارة خذي إبرة ظهر أقلها أنا مسخنه .. كنت أرجف بشده ومو قادره أتحرك أحس قلبي بيوقف وهي تصر قومي إمشي .. أقلها قيسي الحراره تقلي لا إنتي منهارة ومابتقدري تولدي كذا وجلست ورايه لييييين ما أخذت الإبره وكشفت علي وقالت ممتاز الرحم فاتح 9سم شوية وتولدي وغابت ولا جات وبعد ساعتين جات الدكتورة إللي ولدتني وقبل ماتحط يها للكشف فتحت عيونها وقالت خلاااااص بيبي شعره برا بس دفي يعني الولد شويه وينخنق والدكتورة الأولى طناااااااااااش ... غير إني بعد مأخذت إبرة الظهر كنت لسه برجف وقلتلها دحين أخذت الإبره ولسه تعبانه ممكن تقيسي حرارتي .. ولمن قاستها طلعت 40 وبكل رزاله قالت أدوها مضاد حيوي ثاني وخافض حراره


اعذريني طولت عليكي لكني ليه حوالي 10 شهور والده ولسه مقهوره وماكان عندي كمبيوتر عشان أكتب قصتي وأفضفض .. أسأل الله أن يسهل عليكي ويريح بالك ..

[مايسه حجازي]

ام ريناد

مره شكرا حبيبتي , وربي يسهلك ولادتك وتقومي بالسلامه يارب وتجيبي احلا بيبي سليم ومعافى يارب

ام ادم

الحمدلله على سلامتك متاخره شوي وتسلمي على ردك حبيبتي كويس قولتيلي عشان احدد دكتورتي من الان لاني كنت مفكره اي دكتورة وخلاص

مره شكرا حبيباتي افدتوني بردودكم الله يخلي لكم اولادكم ويرزقكم برهم يارب