ليش

[Omm Adam]

عزيزاتي .. كروشات منتدى حوامل الغاليات .. أجمل وأرق تحية مني لكن ..

اليوم باتكلم عن أشياء كثيــــــــره مطفشتني ومحيرني .. وقاهرتني !!!
طبعا أنا حامل وبكريه .. والمعروف إنه البكريات تدور في رؤوسهم ملايين وبلايين الأسئله .. والمفروض إللي يجاوب على هالأسئله الطبيبه المختصه .. لكن للأسف لجهلنا نستسهل المعلومة إللي تجي عالسريع من قوقل .. كل إللي علينا إنه نزور العم قوقل ونكتب السؤال المحير ونسبح في بحور المنتديات ونغرف من المعلومات الغلط !!
والمشكله أحيانا نكون عارفين إنها غلط ونصدقها ونجربها أملا في الحصول على إجابه شافيه لأسئلتنا ،، ويحدث مالا تحمد عقباه ...
والشي إللي يضحك إنك أحيانا تدوري إجابة سؤالك بمواقع مو عربية وتلاقي نفس التخاريف !!! شكله المبتعثات وإللي عايشين بره ما قصروا في أخواتنا غير العرب ههههههههه
هذا الموضوع رساله لكل إنسانه .. مسويه نفسها خبيره وتعرف كل شي .. أقلها ارحمينا من خبرتك .. وخلي المنتديات الطبيه للدكاتره أو حتى الممرضات ...

طيب .. أستعرض معاكم بعض المواضيع إللي ( تقهر ) في النت ،، وبحاول أوضح الصح إللي عرفته من طبيبتي أو من مواقع طبيه مختلفه .. وأرحب بكل إضافه أو نقاش ،،


ليش (1) : معرفة الحمل قبل موعد الدورة ،،
أدري إنك متحمسه تعرفي إنتي حامل ولا لأ بالذات البكريات أو إللي منتظرة الحمل .. لكن الصبر طيب .. والنتيجه الأكيدة فرحتها أكثر من المحتمله ..
ليش تقرّفي نفسك وغيرك بالطريقة إللي تقول حطي البول - الله يكرمكم - في قارورة وخليها مدري كم ساعه وإذا صار فيها زي القطن فإنتي حامل !! بالله ما تقرفوا ؟؟ وما تعرفوا تفرفروا أكثر شوي بالمنتديات وتعرفوا إنه هالطريقه غلط وياما كسرت قلوب بنات منتظرات الحمل ؟؟
ليش تعرضي نفسك وجنينك للخطر بالطريقة إللي تقلك حطي شوية كلوركس عالبول وإذا فار فإنتي حامل !! أو حطي دبوس وإذا سوى فقاقيع فإنتي حامل ؟؟ هذولا ما سمعوا بالتفاعل الكيميائي ؟؟ وإنه البول حمضي وطبيعي يتفاعل مع الكلور ؟؟ طيب حتى لو ما تعرفي ما تخافي هالفقاقيع تخرج غاز سام وتسممك وجنينك إذا كنتي حامل ؟؟ طيب ما صادفت معاهم إنهم منظفين التواليت بالكلوركس وجا أي ولد أو رجال أو بنت أو عجوز منتهيه صلاحيتها واستخدم التواليت وفااااااااااااار ؟!؟!


ليش (2) : معرفة جنس الجنين في وقت مبكر ,,
الصبر طيب أخواتي .. والدنيا انخلقت في 7 أيام فليش العجله ؟؟
ليش أول ما نشوف البيبي مدور في سونار الشهر الأول قلنا ولد !! وإذا بيضاوي قلنا بنت !! طيب مو كلهم يتكونوا بنفس الطريقه ؟! ولا واحد منهم على راسه ريشه ؟؟ معرووووووووف أخواتي الجنين في البدايه مدور وبعده بأيام يبدأ يصير بيضاوي .. وكلللل الأجنة سيم سيم سديق .. وإللي حابه تتأكد تشوف هالموضوع أنا حاطه فيه سونار ابني وإللي أكثر من طبيبه أكدولي إنه إن شاء الله ولد مع إنه كان مدور بأول سونار سويته .. وبيضاوي بثاني سونار !!
http://forum.hwaml.com/t83185.html#post1672783
ليش نقول إنه فلانه بطنها صغير ولد !! ولا بطنها لفوق ولد !! ليه ؟؟ والبنت طايحه وطايح حظها !!! طيب ما سمعنا عن فلانه موياتها كثيره بالتالي بطنها كبير بغض النظر عندها بنت أو ولد ؟؟ ولا وحده عندها كيس مائي ؟؟ ولا بكريه أو وحده ماتاكل تمام بطنها صغير وهذا طبيعي جدا وماله في جنس الجنين ؟؟ سيبونا من كلام جدتي وجدتك يرحم أهاليكم ..
ليش نقول عن إللي يتحرك جنينها باليمين إنه ولد ؟؟ ليه هو الولد من أهل اليمين والبنت .......؟!؟! وياللي تقولوا هالأشياء هل طووووووول الحمل الحركة في مكان واحد ؟؟ مستحيل ،، البيبي السليم ينطنط ويلفلف ويسوي الهوايل في بطن أمه يوميا .. وبالأشهر الثلاث الأخيره بتثقل حركته ويمكن يثبت راسه تحت وتصيري تحسي الحركة أغلبها مركزه في منطقه وحده وهي منطقة تواجد الأيادي والرجول .. وهي بتكون يايمين أو يسار .. وهذا وضع طبيعي للجميع وماله في جنس الجنين ..
ليش نقول عن إللي تتوحم عالحلو إنه فيها بنت ؟؟ والولد ماله نفس يعني ؟؟ أنا سمعت من طبيبه بالتلفزيون إنه الوحام هو رغبة الأم في أكل إللي ناقص بجسمها .. يعني إللي السكر عندها نازل بتشتهي السكر لو كانت حامل بتوأم أولاد .. النكته إنه وحده زميلتي لمن قلتلها إني أتوحم عالحلو تحلف إنه فيه بنت وأنا أقلها يابنت الحلال قالولي كذا مره ولد وهي تقول بالمشمش وتحــــــــــلف إنها بنت !!!
ليش نقول عن إللي جاها كلف إنها حامل بولد ؟؟ وإللي تتربرب وتحلو حامل ببنت ؟؟ هو الولد لعنه ولا مرض ولا إيش بالزبط !!! ياما سمعنا عن فلانه موحشــــــــه بالحمل ومكلفه وصايره هباب وجابت بنوته قمر ،، والعكس ،، الموضوع ومافيه هو تحسس الجسم لهرمون الحمل أو أي مؤثر خارجي زي الشمس والأكل وغيره .. وطبعا هالشي بيختلف من حمل لثاني بغض النظر عن جنس الجنين ...
الشي الوحيد إللي ممكن يكون منطقي في كل الطرق طريقة الشعير والقمح ( الطريقة الفرعونية ) لأنه تفسيرها إنها الهرمونات إللي في البول تتفاعل مع تركيبة الحبة وتعجل أو تأخر نموها حسب جنس الجنين .. والله العالم .. أنا ما جربتها ..

ليش (3) : ملامح الطفل ،،
ليش نقول عن إللي يجيها حرقة بالمعده في الشهور الأخيره إنه شعر الجنين طلع ؟؟؟ ما سمعنا إنه البيبي كل ماكبر حجمه ضغط على المعده وخلى جزء من عصارتها يرتد في المرئ ويسبب الحرقه ؟؟ طيب وإللي ما جاتها حرقة أصلا بيطلع طفلها أصلع ؟! كثيرات وبالذات الطويلات ما حسو بالحرقة لأنه أجسامهم فيها مجال كبير لنمو البيبي بدون التأثير عالمعده ..
ليش نقول عن فلانه اتوحمت على فلانه وجابت زيها وفلانه مو من العليه !!! لو الشغله كذا كان كل الناس جابت قماري !! وكان ضاع النسب لأنه الطفل ما بيشبه الأم والأب وبيشبه فلانه الحلوه وفلان القمر !!!!! أكيد الصفات إللي اتمنتها الأم صادف وجودها بالعيله حتى لو من بعيد وغير كذا بالمشمش وحده تفكر تجيب هيفا وهبي وهي ................ !!!

ليش (4) كلي ولا تاكلي ،،
ليش نتدخل في أكل فلانه وعلناه ؟؟
ليش نقول الكبده مضررررررره ؟؟ والأناناس مفيـــــــــــد !! ترى الإثنين نفس الشي فيهم كميه كبيره من فيتامين أ إللي يمنع الإكثار منه ببداية الحمل لأنه يسوي تشوهات للجنين ،، وبعد كذا كليه عــــــــــادي .. وليش نقول الكبده لااااااازم تستوي كويس والرسول عليه الصلاة والسلام قلنا إنه ممكن ناكلها بدمها ؟!؟! وما قال الحامل تاكلها مستويه !! بالعكس كل ما كانت مو مستويه كانت أفيد بالذات للي عندها فقر دم ..
ليش فلانه تقلي كثري زنجبيل أو ليمون عشان ما تمرضي بالحمل ؟؟ والزنجبيل حار عالجسم والبيبي والمعده .. وبعد كذا نقول وحامنا قوي لأنه جبنا العيد بمعداتنا !! والليمون إللي يقبض العروق ليه ناخذه لو عندنا هبوط بالضغط ؟؟ أو حتى بدون شي لأنه ممكن يقبض الرحم ويأثر على نمو الجنين ؟؟
دكتورتي قالتلي الأكل المناسب لكل حامل هو صحن سلطه يوميا ، بيض يوميا ، دجاج أو لحم أو سمك يوميا ، فواكه يوميا والأفضل الخوخ والتفاح والمشمش .. غير كذا كلي أي شي ..
وليش الوالده إن شاء الله ماتاكل خضار زي الملوخيه والباميه ؟؟؟ إيش حشر هالأشياء بالتوسع أو الضيع للمنطقه الحساسه ؟؟ يعني المصريات والسودانيات والشاميات وغيرهم إللي يموتوا بهالأكلات كلهم خربانات ؟!؟!؟!؟! .. الوالده لازم تاكل كل شي عشان تستفيد ولو اعتمدت بس عاللحم والدجاج والهريس ومدري إيه بيجيها إمساك يقطع خياطتها ويطلعلها البواسير .. والتوسع شي من ربي ويختلف من جسم لجسم وما نقدر نتحكم فيه إلا بالعمليات التجميليله قديما أوالليزر حديثا ..
وليش لمن نحنك البيبي مانكتفي بالسنه إللي هي تمر ؟؟ ليش نضيف سمن وخرابيط ؟؟ قولتكم بيقوى الولد ولا بنهلك معدته ولمن يكبر يجلس الغلبان طول عمره يشتكي من الحرقه والقرحه ووووو ..... ؟؟؟


ليش (5) : العطار والصيديله ,,
ليش ننصح فلانه بكذا من العطار أوكذا من الصيدليه ؟؟ هل إحنا دكاترة ؟؟ أو حتى معالجين طبيعيين ؟؟ حتى العطار ماله حق يوصف أي علاج لأنه ما يدري بتفاصيل الحاله .. مثلا أنا شخصيا عانيت من البواسير قبل ما أحمل ومع الحمل عانيت بزياده ومانفع معاي إلا علاج من طبيبه مختصه .. لكني كنت خايفه على البيبي من العلاج إللي هو مضاد حيوي فقرأت عن فوائد المره وإنها بديل عن المضادات الحيويه ومفعولها رائع للبواسير .. جربتها والله لا يوريكم .. جاتني حساسيه مقققققرفه وحبوب صغيره بالمنطقه تخليني أقوم من النوم أنط كأنه أحد يعض فيه !! طبعا ماكنت عارفه انها السبب .. تركتها ورجعت للمضاد وراحت الحساسيه .. بعدها رجعت للمره وصار نفس الشي وطول أكثر ومافاد المضاد معاه على طول زي الأول .. وقتها عرفت إنها السبب ورميتها .. يمكن هيه لها فوائد بس مو كل الأجسام زي بعض .. وكله كوم وإللي تقول في النفاس حطي كسره صغيره زي التحميله كوم !! ياناس قرف قرف قرففففف ،، كيف تتحملي تدخلي أشياء غريبه مو معقمه لجسمك ؟؟ وبعدين تعالوا ابكوا و قولوا التهابات وافرازات وخياطه انفكت ومدري إيه !! ولا إللي تقلك انقعي امره وبللي الفوطه فيها والبسيها ،، والله حرام عليكم تنصحو الناس بهالشي .. في ناس أجسامها حساااااااسه حتى الفوطه تلبسها وهي تبكي لأنه بمجرد ما تنبل تسويلها رطوبه وحساسيه وفطريات .. فمابالكم إنها تلبسها مبلوله أصلا ؟؟؟ وتعالوا هنا إيش الشمم دا ؟؟؟ ماعمري سمعت عنه إلا لمن حملت ،، يعني الجرح بيتلوث من ريحة فلانه وعلانه ؟؟ طيب أفهم كيـــــــــــــــف ؟؟؟ المعروف إنه الجرح يتأثر بالشي إللي يلامسه من غبار أو هوا أو أي شي .. لكن إنتي وطفلك جروحكم معقمه ومغطيه بالملابس النظيفة فكيف عطر بيأثر عليها ؟؟؟؟؟؟ كبري عقلك شويه وسيبي الكلام القديم لزمانه ...
وليش لازم من القرفه والزنجبيل ووووو ........ وقت الولادة ،، إنتي ليش مستعجله ؟؟؟ مصيره الرحم يفتح والطلق يقوى إلا إذا في مشكله طبيه عندك ،، بعدين مين قلك إنه لازم تولدي باليوم الفلاني بالضبط ولا بتعشري ؟؟؟ يعني مرررره إحنا عارفين متى صار الحمل بالمللي ؟؟ ولااااازم نولد بالموعد المحدد ؟؟ أولا بالنسبة لحسابات السونار فأنا دكتورتي قالتلي لا تعتمدي على السونار في تحديد عمر الجنين إلا ببداية الحمل لأنه لمن يكبر البيبي يصير يطلع عمره حسب حجمه وفي بيبيهات كبار وفي صغار فما نعتمد عليه أبدا ،، وبالنسبه لحسابك بالذات البكريات فالزواج يخربط الهرمونات وممكن يصير تأخير بالحمل وإحنا حاسبينها على نظام وإحنا بنات ،، لا تسووا زي حرمة أخويه خلصت التاسع وصارت تبلبع أعشاب على مزاجها لين ماجاها طلق بدون ما يفتح الرحم وولدوها قيصري وبنتها ياحرام جات نتفه ،، أصغر وحده بالعيله ،، وهذا يعني إنه لسه مو وقتها ،،، خلاص وكلي أمرك لربك واعرفي إنه هالجنين له عمر ربي كاتب بدايته وماعلينا إلا نستنى إلا إذا كان في مشكله صحيه واتبعنا نصيحة الدكاترة فيها ..
ليش نقول لفلانه خذي الدوا الفلاني بعد الولاده والدوا العلتاني للبيبي .. ليه مافي دكاتره ؟؟؟ يعني المرهم أو الحبوب أو أو أو مشي معاكي يعني بيمشي معايه ؟؟ أنا عن نفسي حتى المسحات الطبيه حقت السره ما جبتها لأنه يمكن في نوعيه أحسن الدكتورة أدرى بيها مني .. خلينا نولد بالسلامه وإللي تكتبه الدكتورة الله يحييه ..
ولا إللي الله يهديها كاتبه خلطه لفتح عنق الرحم .. طيب إيش استفدنا رحم مفتوح بدون طلق ؟؟ ولا ناويين تخلو الناس كلهم طلق صناعي وبعدين تيجو تقولوا الولادة صعبه مـــــــــوت !!
والمصيبه إللي تقلك وقفي الكالسيوم بالتاسع لأنه يقسي راس الجنين .. طيب الراس لمن يقسى مو معناه إنه العظام تقوى ؟؟ والطفل يكون أحسن ؟؟ ولا نبغى نولد بسهولة على حساب صحة عيالنا .. والمشكله تجي تصيح بعدين من هشاشة العظام ونقص الكالسيوم !!
وليش الولد لمن ينمغص نديله ماء غريب ؟؟ ما قد سمعنا إنه له تأثير سلبي على دماغ الطفل ؟؟ مانشوف البيبي بعد ماياخذه يروح في ساااااابع نومه مدري كم ساعه ؟؟ ولا المهم يسكت وبس !! ولا نشربه أعشاب وأشياء مانعرف غير إنها تريح بطنه وماندري عن مضارها شي .. زي إللي شربت بنتها عصير برتقال وهي يادوب شهرين إلا عشان يفك عنها الإمساك ومدري إيش صارلها وراحت للدكتوره وأعطتها موشح تهزئ محترم لأنه المفروض ماتاخذ العصير بهالعمر وبهالجرعه لأنه يوسع الأمعاء ..


ليش (6) : النظافه ،،
ليش نتدخل في فلانه وعلتانه لازم تشيلي بالحلاوه ولا بالموس ؟؟ والله إللي تقدر عالحلاوة فخير وإللي ما تحبها أو ما تقدر عليها فالموس موجود .. وطبعا إذا كان الموس سنه فمو معناه إنه الحلاوه أو الشمع حرام أو يضر ..
ليــــــــــــــــش كبيــــــــــــــره بعض إللي يستخدموا الحلاوة يروحوا صوالين يسوولهم ؟؟ أو تجيب أختها تسويلها ؟؟ والله الموضوع أسهل من كذا .. اشتغلي عمياني أو بمرايه وخلي جلستك مسدوحه لانايمه ولا جالسه .. وموعيب ولا قرف إنك تطلبي من زوجك المساعده لأنك في حاله خاصه وإذا ماوقف معاكي دحين متى بيساعدك ؟؟؟ وإذا مرررره عجزتي فاحتسبي الأجر واستخدمي الموس حتى لو كانت يآذيكي .. أما فلانه وعلتانه حرااااااااااااام وعيييييييييييب ....الله يطول ويبارك بعمرك ياأمي ،، تقلي أنا كنت بس يبدأ معايه الطلق خفيف أسوي بالحلاوة !! ماشاء الله ...
ليش نخلي الممرضات يروشونا بعد الولادة ؟؟ فين الباشا عنك ؟؟ بعدين حبكت النظافه وقتها ؟؟؟ شطفي نفسك بمويه من تحت وثاني يوم لمن تصحصحي اتحممي واتعطري وروقي نفسك بنفسك ،، مدري ليش في ناس تستهين بالعورات .. والله إني شايله هم كيف برضع البيبي فمابالكم بترويش !! وكذا ممرضه !!
طبعا غير إللي بتسوي بعد الأربعين حمام مغربي وحنه في أماكن خاصه ومساج أو تمريخ بدون سب الخ الخ الخ .. مانقول غير الله الهادي
والعكس إللي تجيكي مهووسة نظافة وتقلك زوجك لا يقربك في التاسع !! بالذات إذا فتح الرحم لأنه يجيبلك كل الجراثيم ... طيب إيش رأيك إنه دكتورتي قالتها وبكل صراحه كثري من العلاقة ،، سألتها ليه ؟؟ قالتلي ترطب عنق الرحم يعني تسهل الولادة بإذن الله .. وكمان تساعد على فتح الرحم وتحمية الطلق بشكل طبيعي .. ولا جابت سيرة الجراثيم أبــــــــــــدا ..


ليش (7) : الأسامي ومعانيها ،،
الحمدلله حملنا وولدنا وقمنا بالسلامه .. وفرحتنا بالبيبي نستنا حسن اختيار الاسم وكل همنا اختيار أسماء جديده عالموضه !! طيب إحنا مانعرف إنه لكل إنسان نصيب من معنى اسمه ؟؟ يعني إللي تسمي عدي كيف تتوقع ابنها يطلع !! وإللي تقلك سميت ريتال وهو من الترتيل أقلها لو عندك معرفة بسيطه بقواعد اللغة العربيه حتعرفي إنه ( رتل يرتل ترتيلا فهو مرتل وكثير الترتيل هو رتّال ) فمن فين جات ريتال ؟!؟!؟! وبالنسبة للأسامي الأجنبيه ياترى رحنا لأهل بلد هذي الأسامي وعرفنا معانيها بالضبط ولا اعتمدنا على قولة فلانه وعلانه ؟! وحده من قريباتي سمت بنتها رولين وسألتها إيش معناه قالتلي المرأة الجميله المحبوبة الطويلة الشعر البيضاء البشرة ........ حشا صار موضوع تعبير !! يرحم إللي قالو ريماس هو نور الشمس وطلع تراب القبور والعياذ بالله ,,, أخواتي حاولوا تدوروا أسامي لطيفه معناها طيب أهم من أي شي .. وإللي مصره على أسامي غربيه حتلاقي بديل قريب لها في العربية .. زي إللي بتسمي جودي على اسم الممثله الأجنبيه الفلانيه .. ليش ما يكون الاسم جوديّ بإضافة شده للياء وبكذا يكون اسمه عربي ومعناه الجبل المبارك إللي رست عليه سفينة نوح عليه السلام ... وماريّا ليش ما يكون ماريا بدون شدة عالياء إللي هو اسم من أسماء زوجات النبي عليه الصلاة والسلام وهو اسم أعجمي ماله معنى .. وطبعا إللي ماله معنى أفضل من إللي مو معروف معناه ..
شوفوا هالرابط عن آداب تسمية المولود :
http://z00m-n.com/vb/t19927.html


ليش (8) : عادات الأربعين ,,
عاد هنا مهما اتكلمت ماراح أخلص .. البسي كذا .. كلي كذا .. لمي رجولك .. خبي البيبي أول ما يجو الناس بعدين طلعيه .. كحلي البيبي - والكحل هالأيام ماشاء الله مرررررررررره أصلي !!! - واكتبي اسم الله على جبين البيبي بالكحل عشان ماينحسد وكأنه صبورة !! .. وأشياء لا تعد ولا تحصى ... طيب ممكن سؤال صغيـــــــــــــــر ؟؟ ليش ماقد سمعنا عن هالأشياء عند الأجانب ؟ وماشاء الله عيالهم أصح وأذكى من عيالنا ؟؟ بخلي الموضوع لكم تفكروا فيه وتقلبوه براحتكم لين ما تلاقوا الجواب ..
عن نفسي بفلها بالنفاس وبعيش حياتي لأني مو كل يوم بجيب طفل !! في الأيام الأولى بلبس الروب أو بيجاما وبنام كثير لأني بكون تعبانه .. وأول ما تفك الغرز برجع للبسي وحركتي وحياتي الطبيعيه 100%
آخر شي بقله ليش هو موقف حضرته من كم سنه لمن صاحبتي ولدت وكان عندها لمة حريم ماشاء الله .. وحدة منهم شوي وتبكي على بنتها لأنه ياحرام انقطع دم النفاس عليها قبل الأربعين وزوجها طلب يجامعها !!! والأم تولول والحريم تولول تعاطفا معاها .. وأنا على وجهي مليون علامة تعجب !! حتى إللي ربي حلله بتحرموه ؟! يعني ما قد سمعت دكتورة عربيه ولا أجنبيه ولا جايه من أدغال أفريقيا تقول هالكلام .. من فين جبتوووووه ؟؟ وبعدين إيش يعني الوحدة ترجع بيتها قبل الأربعين ؟؟ تخلص نفاسها وتجلس ببيت أهلها مبسوطه وفرحانه والغلبان زوجها جالس لوحده بين أربع جدران لامين يونسه ولا ياكل معاه ولا يحزنون .. وبالآخر تعالوا قولوا ليه أزواجنا يطلعوا استراحات وبعضهم والعياذ بالله يخون حرمته ,,,,
امشوا على مبدأ الحلال والحرام وسيبوا العادات والتقاليد على جنب ربي يهديكم ..


أخيرا أعتذر على الإطاله لكن كان لازم أفضفض ،،،،،، وأحاول أصلح ما أفسده الدهر ... وربنا يوفقنا جميـــــــــعا لكل خير وصلاح ..

[محبوبة ميمو]

والله كلامك صح الخرابيط هي سبب مشاكلنا
اشربي هذا لا هذا والله تعبنا من التجارب على انفسنا
الله يسامحنا

[الحمد لله..]

موضوع جدا جدا جدا راااااااااااااااااائع

تسلم ايديك يالغلا

[ام الهادي]

مشكوووووورة اختي فعلا المفروض الناس تخلي العادات القديمة والتقاليد الي ما بنتفع وبالعكس بتضر
الوحدة في فترة الحمل المفروض تاكل لحوم وخضروات وفواكه وعصائر طبيعية وتاكل الي نفسها فيه بدون ما تكتر لانه الي بزيد عن حده بنقلب ضده ودي معلومة صحيحة وتخليها من نصايح لا ودت ولا جابت
والي يجيها من ربنا كله خير سواء بنت او ولد ولا يقعدوا يحللوا من شكل البطن او نوع الوحام
وفي الاخير الوحدة ما تعمل باي كلام تسمعه
وبتمنى من الكل يتاكد من صحة الكلام الي يوصله قبل ما يطبقه ويحصل شي تندم عليه بعدين

[المستحيله]

ما اقول الا جزاك الله خير ع الموضوع الاكثر من رائع...
كلامك صحيح واهم شي الي يناسبك مو شرط يناسب غيرك...

[عليا لولو]

عندك حق جزاااك الله خير
موضوعك مررره استفدت منه وفعلا في اشياء كنت مصدقتها لاني بكرية وقولت اكيد الي كتبها عندهوخبرة بس للاسف طلع كلام فاضي

[Omm Adam]

محبوبة ميمو
ام الهادي
المستحيله
عليا لولو

شـــــــــــــــــــــــــاكره مرور الجميــــــــــــــــــــــع
والحمدلله إني قدرت أفيدكم ولو بالقليل
وربنا يقوم كل الحوامل بالسلامه

[فارما جيرل]

موضوعك رووعة وصح كلو مية بالمية بس برضو بضل كل واحد متمسك بخرابيطه وبعاداته وتقاليده وربنا يصلح الحال\\


شكرررررررررررررا

[Omm Adam]

فارما قيرل
يعطيكي العافيه منوووووره ،،
طيب ليش مانخلي نظام الحمل والنفاس داخل في موضوع العولمه ؟!
يعني نلبس زي الأتراك وناكل زي اليابانيين ونستخدم التكنولوجيا زي الأمريكان والولاده والنفاس تي تي تي تي زي ما رحتي زي ماجيتي !! إيش فايدة العلم إللي اتعلمناه بالمدارس وإللي اتمنوه أمهاتنا وجداتنا وما لقيوه ؟

[اميرة الخيال]

يعطيك الف عافيه والله موضووع جدا مهم ...
اتمنى الكل يستفيد من هالكلام