اطباق مميزه ورائعه وسهله

[ايلاف]

بسم الله الرحمن الرحيم

نبدأ بسم الله

المنيو :

دجاج تكَا مسالا .

دجاج بالزبدة .

كرات البطاطس (بادا بيف )

وخارج النطاق :

آيس كريم على طريقة ملاذ لبى قلبها

كب كيك شكلين .

الطبق الأول :

تكَا مسالا

نحتاج لـ :
دجاجة مقطعة 10 قطع منقعة ومغسولة .
علبة زبادي
4بصلات مفرومة متوسطة الحجم .
3طماطات مفرومة.
بهارات مشكلة.
معجون طماط.
سكر .
( فيه ناس يحبون معها قشدة قيمر إن حبيتو حطوا )

الطريـقة :

1- نشوح البصل على زيت زيتون لين يصفر .
2- نضيف الطماط ونقلب .
3- نضيف الصلصة .
ونقلبها لين نحس إن الطماط والبصل بدو يذبلون . بعدين ناخذ هذه الحمسة ونحطها بخلاط الكاس مع الزبادي
لين يتمازجون ويظهر لنا خليط برتقالي . بنفس الوقت بجهة ثانية نحط الدجاج مكان الحمسة ونضيف لها جميع
البهارات إللي جهزناه ونقلبها شوي وبعدين نسكب الخليط على الدجاج ونضيف له كاس ونص ماء لين يتكون لنا
خليط سايل بس خاثر شوي ونقصر عليه ونخليه نص ساعة .

وهذا شكله النهائي

طبعا به ناس اول ماشافوه قالو وش ذا كنه فول !!

وبعده ماشفنا إلا بريق صحونهم

مع الرز

وهذا يوم إني اسويه نوبتن ثانية لأخوي

سهل + طعمه بالراس + امي ياحبيلها عجبها بالحيل عشانه مهب دسم

......

الطبق الثاني :

دجاج بالزبدة

نحتاج لـ :
دجاجة مقطعة قطع صغيرة ومنقع .
3 طماطات مفرومة .
بهارات ( كركم , ذرة زنجبيل , فلفل احمر , كاري ..
3 بصلات صغار .أوبصلتين وسط .
فص او فصين ثوم .
علبة زبادي وإذا ماتوفر لبن بيطلع نفس الطعم .
علبة قشطة .
علبة صلصة (معجون طماط ) نسيت اصوره
نصف اصبع زبدة مثل اللي بالصوره .

الطريقة :

1- نذوب الزبدة ع النار ونشوح عليها البصل والثوم ,لين يصفر ويذبل وبعدين نضيف الدجاج ونقلبه .

وبالخلاط نحط اللبن أو الزبادي مع الطماط وعلبة الصلصة ونخلطه ,
2-نضيف الخليط على الدجاج ونحرك.
3-نضع علبة القشطة ونحرك شوية .
وبعدها نقصر النار شوي ونخليه حوالي عشر دقايق .

ودا شكلوه

ومن جانب آخر

بجد هذا الطبق بالنسبة لي حكاية ثانية

وزي ما انتم شايفين شكله قريب بالحيل من التكَا بس الفرق إن التكَا اخف ويصلح للي عندهم ريجيم بس هذا ادسم وفي رواية مدلع أكثر

.
.
.

الطبق الثالث :

كرات البطاطس ( البادا بيف )

وهي بعد اكله هندية قريبة كثير من كبة البطاطس بس مقرمشة اكثر

ومدلعة

المقادير :

نحتاج إلى :
4 حبات بطاطس مهروسة .
كزبرة أو بقدونس , فلفل أحمر , بهارات كاري , ملح , ذرة زنجبيل
فلفل اخضر شبه مفروم .
دقيق الحمص >> حمص مطحون تلقونه بالسوبر ماركت
كاس طحين ابيض .
نشا فقط للضرورة .
م ص باكنج باودر .

الأغراض هذي راح نقسمها قسمين قسم تبع البطاطس وقسم لخليط الحمص إللي بنغلف فيه البطاطس .
القسم الأول :
ناخذ البطاطس ونسلقها تقريبا ثلاث ارباع سلقه
وبعدين نهرسها وبعدين نشوح ع النار فص ثوم مع شوية زيت ونسكر النار ونضيف له البطاطس المهروسة
مع كافة البهارات (تراني زدت كثير عن اللي بالصورة )والملح لاتنسونه , ونضيف لها الكزبرة أو البقدونس
المفرومة والفلفل الأخضر ونخلطهم زين مازين ونكور مثل ما انتم شايفين .
نقطة مهمة لازم نذوق البطاطس بعد خلطها مع عدتها عشان نتأكد إذا تحتاج زيادة بهار أو ملــــــــــــــح .

الحين نروح للقسم الثاني وهو دقيق الحمص (ترا هو أساس القرمشة ):
ناخذ تقريبا كوب إلا شوي من الحمص مع نص كوب طحين ونضيف لها ماء لين يصير مثل
خليط شبه سايل بس إنه ثخين شوي >> تكفون افهمو ا
وماننسى البكنج باودر ..ملاحظة (ترى الخليط بيطلع طعمه مر ومش ولا بد بس راح يتغير مع القلي سدؤني .

الحين ماعلينا إلا نجهز زيت عميق للقلي ونجيب كور البطاطس ونغطها بخليط الحمص ونقليها ..

وهذا شكلها

زووم تاني

وهذي مع الرز والدجاج بالزبدة

.
.
.
.
.

والحين نجي لخنبقاتي إللي خارجة عن الموضوع

أولا :

آيس كريم باسكن على طريقة ملوذ

المقادير للتذكير

ظرفين دريم ويب بس مالقيته وعوظت بهذا والحمد لله مافرق
علبة كريمة خفق مثل المزيونة اللي بالصورة علبتين صغار أو علبة ونص حليب محلى نستلة
هيرشي , وتوفي ( تبون الصدز ولا ولد جيرانهم ؟
الصدز يقول إن التوفي اللي نسوية بالبيت أطلق تسع طعش مرة من الجاهز بس انا عشاني مضطرة وماكان عندي وقت سويته بذا ومشى الحال )

الطريقة :

نجيب كريمة الخفق وتكون باردة , ونخلطها بخلاط الكيك وإذا انتفخت شوية وتضاعف حجمه نضيف لها الدريم ويب
وبعدو النستلة ونخفق لين يتضاعف اكثر بس لاتنسون هي نبهت وقالت لانجتهد بالخلط عشان كثرته تخربها
طبعا الكل انهبل عليه وجاز لهم وبرد تسبودهم بهالحر جعل ربي يبرد عليها

التغيير إللي سويته إني ماخلطت الهيرشي والتوفي مع الخليط بس صبيتهم ع الكاسات واضفت لهم الآيس

وده شكلوه

والحلا الثاني :

الكب كيك

وفي رواية المنقذ وقت الزنقات ,

هنا عندي شكلين سويتهم وبنفس الخليط

طبعا الخليط كيك ابيض جاهز وماعلينا إلا نطبق الطريقة إللي بالكرتون ونقسم الخليط لقسمين .

وكل خليط نضيف له نكهه هنا انا حطيت بالأولى كاكاو بودرة مع حبات هيرشي الصغيرة

والثاني قرفة مع سكر بني ,ونفرغهم بصواني الكب كيك .

هذا خليط القرفة والسكر البني زينته مع عين جمل مجروش أو لوز مع جوز هند وسكر ومصبوب عليها نستلة ..

شوكليت ..

القرفة..

يمديكم على ذي المايلة

تشكة اخرى

عند التقديم

[ايلاف]

منيو لهذا اليوم :
_ قوالب البتول
_ قوارب الكوسا
_ مكرونه بالبيتزا
_ حلى البتول





_ قوالب الهنوف



المقادير :
بف باستري.
نصف دجاجه مسلوقه.
بصل _ فليفله _ جزر _ كزبره وبقدونس.
جبن وقشطه وجبن موزرايلا .
ملح _ وبهارات مشكله وخلي نكهة الدجاج سبايسي.


الطريقه :
نسلق الدجاج وننتفها < ماعرف اشرح
نحمس البصل لين يصير اشقر ونضيف الجزر المبشور والفليفله
وبعدها الدجاج ونضيف رشة بهارات ونضيف الكزبره والبقدونس .
وبعدين نحضر صينية الكبك كيك ونوزع عليها البف باستري وندهنها بالجبن والقشطه.
ونحط عليها خليط الدجاج ونرش فوقها الموزرايلا .
وندخلها الفرن ونشغلها من تحت لين تنتفخ وبعدها شوي من فوق لين تتحمر .
وبالهناء والعافيه
معذره على بساطة الشرح لانها فكرتي

[ايلاف]

قوارب الكوسا بالصلصة




المقادير:

كيلو كوسا طازجة
بصل مفروم
كيلو لحم مفرومة
ملح
فلفل أسود
بهارات مشكلة
كزبرة خضراء _بقدونس طازج
علبة قشطة
جبن سائل
كوب جبن مازريلا مبشورة


الطريقة:

- تقطع الكوسة إلى أنصاف بالطول ثم تفرغ من اللب و تغلي نصف إستواء ثم توضع جانبا لتصفى من الماء .
- يشوح البصل ثم تضاف اللحمة المفرومة و تقلب حتى يختفي اللون الأحمر و تشرب مائها و تستوي , تتبل بالملح و الفلفل و البهارات ثم تبعد عن النار و تضاف الكزبرة و البقدونس .
- في صينية بايركس توضع قوارب الكوسة و تحشى باللحم .
-تخلط الجبن والقشطهو تصب الصلصة فوق قوارب الكوسة بإحتراس ثم يرش الوجه بالموزاريلا .
- تلف الصينية بورق القصدير ثم توضع في الفرن و ندعها حتى تنضج ثم يرفع الورق و ندعها حتى يحمر الوجه قليلا بعد النضج و تقدم .



بالهناء والعافيه






_ مكرونه بالبيتزا :



المقادير :
مكرونه مسلوقه في ماء وملح .
فليفله مقطعه قطع صغيره جداً .
طماط مقطع قطع صغيره جداَ .
زيتون اسود واخضر .
ورشة كزبره .
جبن سائل وقشطه .
وجبن موزرايلا .

الصلصه :
طماط مطحون _ معجون طماط _ بصل مبشور _ كزبره وبقدونس
بهارات وملح وزعتر بري واذا كان عندك خلطة بهارات ايطاليه تعطي نكهه رهيبه
ونحركهم مع بعض لين تتماسك .

الطريقه :
بعد مانسلق المكرونه ونخلطها في الجبن والقشطه .
بعدها نصب عليها الصلصه ومن بعدها نرش الطماط والفليفله والكزبره .
بعدها الزيتون والموزرايلا .
وتدخل الفرن لين تتحمر .
بالهناء والعافيه





_ حلى البتول




المقادير والطريقه :


الطبقه الاولى :
بسكويت ديمه اللي يجي نفس نوعية بسكويت اوريو
غمسيها في الحليب وصفيها في الصينيه
الطبقه الثانيه :
في الخلاط بيضه وفانيلا ورشة هيل وقشطه ونصف علبة حليب محلى و 8 كيري او جبن مثلثات
ملعقتان بانكيك و رشة كاكاو
ونحط الطبقه الثانيه ع البسكويت وندخلها الفرن لمدة عشر دقائق وبعدها نرش عليها هيرشي ونضعها في الثلاجه
وبالهناء والعافيه

[ايلاف]

كبآب+ أفخآذ دجآج+ أغرآض السلطآت+ عصيرآت + والحمدلله..
...

بدآية تبلت أفخآذ الدجآج..لأن الكبآب جآيبته جآهز بس يبغى له شَوي ..مآأمدآني أسويه بالبيت.
التتبيله (( علبة زبآدي + ملح+بهآرآت+ خل+ ليمون+ شوي فلفل أسود))
ومعروف كل مآتأخرن متبلآت كل مآكآن الطعم أحلى.. لآتنسون تخرمونهن..
وفيه تتبيله مآأعرفش عنهآ بس يقآل أنهآ تشقر ولآ تخليه مآنضج من وسطه..
(( ملح + ليمون+ مآء+ شوية بهآرآت ))
المهم هنآ أفخآذنآ متبله..

وهنآ الكبآب دخلت أعوآد الخشب فيهآ..

بعدهآ شبيت المنقل نآر لشوي الأفخآذ..

ورصيتهم على الشبك.. وهآك يآشوي..

وإلآ الكبآب شويتهم بالشوآية الكهربآئيه (( الوقت محدود ))

نجي للسلطآت شغلهآ مآيبي شي..

1) سلطة الخس بالخلطة الفرنسيه ..
( خس مقطع طولي+ فآصوليآ حمرآ شوي + شوي ذرة+ بطآطس مقلي مربعآت+
شوية ليمون + ملعقة زيت زيتون للمعة + الخلطة الفرنسية ذيك معروفه تحطين اللي تحسينه كآفي))
وتخلطينهن..مع رشة سمآق. .. للتزين رشة مقدونس مقطع صغير

2) سلطة الكرمب بالزبآدي..
( علبة زبآدي + كرمب مبشور طولي+ جزر مقطع طولي ويكون خفيف+ خيآر مقع طولي أيضآ
ويكون خفيف+ ففل أخضر بآرد أيضآ مقطع طولي +بطآطس عيدآن + شوي ليمون
+ ملعقة زيت زيتون ايضآ للمعة+ رشة سمآق+ ذرة +فآصوليآ حمرآ))
للتزين البآقي من البطآطس العيدآن

3) أخر وحده معروفه ..السلطه الحلوة..
(( كرمب مبشور طولي + جزر مبشور طولي + بدآل المآيونيز زبآدي أفضل وكآن شوي مآيونيز..+
السكر اللي تشوفينه كآفي .. ))

،’

تجهزين الرز المطلوب .. تغسلينه ولو تحبين تربصينه مآفيش مشكله
ربصته أنآ ربع سآعه تقريبآ ...
بعدهآ مآء حآر + كم حبة مسمآر+ كم حبة دآرسين + الزيت الكآفي + الملح الكآفي ..
وتحطين الرز... المآء لآزم يكون خآرج عن الرز قرآبة نصف عود الملعقه علشآن يكون نثري
ومآينخبز... والملح يكون خآرج شوي لأنه مع الطبخ رآح يسحب الرز الملح..
تغسلين عودين فلفل حآر وتحطينه كذآ مع الرز بدون تقطيه ومع قمعه..
إذآ بدأ يطبخ تقصرين عليه .. مآيبي شيء نص سآعه بالكثير خآلص ..
أنتِ عآد شيكي على الرز شوفي كآن يبي زيآده طبخ وإلآ يبي شوية مويه ..
كآن زيتي أنآ زيت الزيتون أخف وأزين..

الكشنه جهزتهآ لوحدهآ ..( حمست بصل مع زيت ويوم تشقر حطيت الزبيب مع شوية كركم ))

سهل مآيبغى حآجه..
(( حبتين ليمون+ طحينه ملعقتين تقريبآ + كأسين ونصف من البليله سوآء
أنتم طآبخينهآ او جآهزه+ علبة زبآدي .. + زيت زيتون ربع كأس تقريبآ ))
أخلطيهن بالخلآط البرآون أفضل حآجه ..والأفضل يكون وضع الطحينه أخر شيء علشآن مآيتعقد .
عآد شوفي الطعم فيه نآس تحب الحمض وفيه نآس تحب زيآده طعم الطحينه
وفيه نآس مآتحب طعم الطحينه يطلع على حسب أذوآقكم..

الشكل النهآئي لكل شيء..
قلينآ بطآطس عيدآن+ قطعت بصل وفلفل أخضر بآرد..

،’

،’

،’
رزي النثري ~> كل(ن) يمدح بقله..

،’

[ايلاف]

نقطع بصل وحبة طمآطم .. وفلفل حآر عودين..نحمسهم زي كذآ..

بعدهآ نخلطهن إذآ نحمسوآ بالخلآط مع شوي مويه..

نحط كأس تقريبآ من الطحين البر في الخلآط مع هذآ وزيآده مويه .. نخلطهم..

بعد كذآ نسكبه بالقدر ونحط شوية صلصه والبهآرآت والملح الكآفي ..ونشوف ثقله اللي تحبون ..
يمكن يحتآج شوية طحين بس أنتبهوآ مو تحطونه على طول بالقدر رآح يصير عقد أخلطوه بالخلآط
الطحين..فيه نآس يحبونه نفس الشوربه وفيه نآس لآ أثقل شوي وفيه نآس يحبونه يقصونه قصص..
(( يعني يصير ثقيل مره )) طبخ نصف سآعه كآفي واللي يبي أكثر كيفه بس يقصر عليه إذآ بدأ يطبخ..
عآد أنآ صآر أثقل من الشوربه بحبتين ...مآنحب الشيء الثقيل..

الشكل النهآئي...
رشيت فوقه شوية مسمنه

ومن زآوية أخرى...

،’
الطبق الأخير ...

قوآلب السيلكون هنآ اللي عندي ..

،’
المقآدير ..

( شوكلآته خآم _ بني غآمق + أبيض_ للحشوة...+ شعرية أحمد+ سكر + قشطه+
والحبيبآت هذه شوكلآته مغطآة بفول سودآني ))

نذوب الشوكلآته البنية بحمآم مآئي زي كذآ ..

ونبدأ نحشي القوآلب بطبقه خفيفه لكن مو مرة المهم يكون فيه مكآن للحشوه ..

~> كنت مستعجله وحوسه تشوفون ..

ندخلهن للفريزر..
على بآل مآيجمدن نجهز الحشوة.. عآد كل وآحد واللي يحب ..
نحمس الشعرية بشوية زبده ..

بعد مآشقرنآهآ ..

بعد كذآ نسوي التوفي ...
(( نذوب السكر على النآر وبعدهآ بسرعه نحط القشطه ونحرك بسرعه علشآن مآتعقد لين نشوفه
خلآص ..)) ونحط الشعريه عليه...

ونذوب بعد الشوكلآته الخآم الأبيض نفس طريقة البني بحمآم مآئي...

بعد مآخرجنآ القوآلب من الفريزر..

نبدأ نحشي الحين .. الشعريه مع حب الشوكلآته بالفول السودآني..

نسيت أصور الخطوة هذي لكن نغطيهآ بشكولآته الخآم ... أو اللي حآب علشآن يقلل من الحلآ..
ببسكوت أوريو مطحون مع شوية نستله .. علشآن يمسك...

بعد كذآ نرجعه للفريزر ثآني طبعآ مآيبغى وقت طويل يكفيه عشر سبع دقآئق..
وبعدهآ نخرجه ونبدأ نفككهن من السيلكون شوي شوي .. ونحطهم بالورق أو باللي تحبون..

والشكل النهآئي للكل من كذآ زآوية ..

،’
الورود مع قوآلب التفآح أيضآ..

،’

[um_khalid]

مشكورة غاليتي
:)
كلها اطباق تشهي
سلمت الايادي

[ايلاف]

شكرا على مرورك الكريك
مووووووووررررره

[Almasah]

:)
يسلمو ع الوصفات
احلى شيء حسيتها اللي بالبف باستري

[المستحيله]

مشكوره اختي طبخات روووووووووووووووعه..
جاري التنفيذ....

[saarraah]

ماشاء الله تبارك ... سلمت يديك
بصراحه روووعه