مستشفى imc (فتيحي ) جدة

[Omm Adam]

السلام عليكم ورحمة الله وبركاته


بنات أحد جرب الولادة في مستشفى imc (فتيحي ) بجدة ؟
أنا أعرف إنه كخدمات قمه في الروعه لكن أنا همني الدكتورات والخياطه والعنايه بالبيبي ..

أرجوكم صرت بالتاسع ومحتاجه آرائكم عاااااااجلا بارك الله فيكم

[..ام بدر..]

انا من اللي اسمعه انه نظافه وعنايه واهتمام فيك وفي البيبي مرره حلو وداايم يمدحو دكاترتهم ...هذا اللي انا اسمعه بصراحه ماجربته

[demoshka]

والله مابعرف بس ان شاء الله البنات تفيدك

[تعبت أستناك]

نصح زميل زوجي اني اروح عند دكتورة بفتيحي اضن سما ناظر انها تدرس بالجامعه شي كذا وانها ممكن تولدني بالجامعه

دعواتك

[غلاامي]

انا ماولدت بس صحباتي ولدو يقولو عنايه ممتازة جدا خشي وانتي مغمضه بس اسعارها للي مافي تامين غاليه وانا بتابع فيها وان شاء الله لو ربي راد بولد فيها

[ام فوفه]

تجارب تانيه الله يسعدكم حتى انا فتحت ملف بس لسه ماراجعت هناك اتمنى احد يفيدنا بافضل دكتوره هناك

[Omm Adam]

..أم بدر..
الله يعطيكي العافية تسلمي ماقصرتي


توأم كوكو
يعطيكي العافيه عالمشاركة ورفع الموضوع


تعبت أستناك
الله يقومك بالسلامه يارب .. أنا رحت ومررررره مافي مواعيد إلا متأخر وأنا خلاص مايمديني ..


غلاامي
الحمدلله كنت ناويه علي مستشفي وبروحله لكن طلعلي تأمين وقلت أدلع نفسي بأول ولادة .. يعطيكي العافيه عالإفادة


ام فوفه
أنا صليت استخارة ورحت المركز الطبي الدولي imc وقلتلهم أبغى أي استشاريه - أحسن من اخصائيه - قالولي كلهم لازم حجز وأقرب شي بعد أسبوعين .. مافي غير وحده ممكن تكون انتظار وانتي وحظك قلت أوكي .. والحمدلله دخلت عندها .. اسمها سحر العيدروس سعودية ومرررره حبوبه وماتبخل عليكي بأي معلومه وتعطيكي معلومات عن الولادة وتجهيزاتك لها .. بس حسيتها مستعجله شوي كأنه الزياره الأولى فتح ملف .. يعني أسئله عامه وسونار عالسريع .. وقالتلي المره الجايه أجيب معايه التحاليل الكليه إللي يسووها ببداية الحمل وكمان تقرير السونار التفصيلي إللي يتسوي عند أخصائية أشعه وإللي ماكنت أدري عنه شي لكن بالصدفه مره كنت عند أهلي بالطايف ورحت أراجع بالسادس وقالتلي الدكتورة هذي الأشعه المفروض تنعمل بالشهر 3 أو الرابع عشان نتطمن علي البيبي لو الله لا يقدر فيه تشوه .. وسوتها ليه واحتفظت بالتقرير وإن شاء الله ما أحتاج أعيدها ولا التحاليل ..
وكمان قالتلي بنسويلك مسحه من تحت لأنه كل وحده فيها فطريات طبيعيه لكن إذا زادت عن حدها تضر البيبي وهو نازل بالذات عيونه ..
وسألتها عن إبرة الكزاز قالتلي مو ضروريه وإحنا ما نعطيها ...
مممم إيش كمان .. أيوه سألتها عن التخدير وقت الولادة قالت نعطيكي كمامه وإبره بالفخذ هذي أول مره أسمع عنها .. يخففولي الألم بنسبة 75٪ وإذا ما اتحملت يعطوني إبرة ظهر لو طلبت .. قلت لا ما أبغاها من دحين .. وبعد الولادة يخدروني تخدير أقوى عشان الخياطه .. يعني تمام التمام ..
الشي الوحيد إللي ماعجبني إنه وقت الولادة إذا ولدتي عند الدكتورة المناوبه عادي لكن إذا تبغي دكتورتك وسوولها استدعاء عشانك تزودي فلوس 2500 أو 4000 حسب درجتها ( أخصائيه أو استشاريه ) أنا قلت ما يهمني لأنه ماشاء الله كل دكاترتهم يمدحو فيهم ..
بس هذا إللي صار وإن شاء الله الأسبوع الجاي أحككيكم إيش بيصير معايه ..

[سحـآب]

الله يعطيكي العافيه ويسهل أمورك


بس أنا أختي ولدت فيها بالنسبه للخياطه قالت لها ماأسوي لك خياطه اللي ييسوها في أي مستشفى يعني خياطه عاديه بس

وادا تبى خياطه تجميليه تعالي بعد ماتخلصي أسوي لك هيا ولها سعر لوحدها


مع أنو في أي مستشفى تاني يسوى الخياطه التجميليه وقت ماتولدي وخلاص

[Omm Adam]

سحاب
آمين جميـــــــع يارب
والله مدري بس أبشري أسألك إياها الزياره الجايه ..
أنا عن نفسي سمعت بالليزر وكنت مرررره أبغاه لأنه يخلص من آلام الخياطه لكن قالولي إنه زي التجميلي يضيق المنطقه وأنا بصراحه للآن أعاني مع زوجي من ضيق المنطقه ونفسي تتوسع شوي .. وقريبتي سوت تجميلي واتعذبت بعد الأربعين ونصحتني ما أسويها إلا بعد عدة ولادات ..