تجمع حوامل سوريا-دردشة ورود سوريا-دردشة الغاليات

[رنووومة]

نسرين من اكثر من سنة ونص نظفانة على الاخير بس شو بدي ساوي قالولي عادية ورنيم كان في فرق بينها وبين نسرين 7 سنين ونص منهيك ما مريت بها لصعوبة

[مع الله]

الســـــــــــــــــــــــــــــــــــــــــــــــ ــــــــــــــلام عليكم يا حلوات كيفكن وشو اخباركن اشــــــــــــــــــــــــــــــــــــــــــــــــ ــــــــتقتلكن كتيـــــــــــــــــــــــــــــــــــــــــــــــ ــــــــــر
رنومة حبيبتي ان شاء الله ما بنحرم منك ومن سؤالك كلك ذوق يا حلوة كتير اشتقت لك
ومع اني باركتلك قبل بس مو خسارة بباركلك مرة تانية كرمال خاطر لولو الامورة ان شاء الله الف الف الف مليون مبروك والله يجعلها من الصالحات ويقر عينك فيها وباخواتها ولا يضيع لك تعب معهن ويقويك على تربايتهن
بعتلك على الماسنجر اطمن عليك وقت ولادتك بس ما رديت قلت يمكن صاير حوليكن شي مقطوع النت او انك مشغولة , وبعدين تعبت شوي وما عدت فتت عالنت ابدا سامحيني على تقصيري
رنومة انا عندي حساب فيس بوك بس بخاف عليك ضيفك لان صفحتي اندساسية بحتة وبخاف يصرلك مشاكل ههه بوسيلي الامورات ولا تنسيني من دعائك وسؤالك يا اغلى اخت

سروءة الف الف الف مليون مبروك والله يجعلها من الصالحات ويقر عينك فيها
وربي ما يحرمني منك يا غالية ولا من سؤالك علي
اشتقت لك كتير وقلبي دايما عندك صار معك متلي ولدت بالغربة وما معك حدا - معليش حبيبتي لاتزعلي الله احن واحسن من كل البشر - ربي يكرمك بكرمه معليش حبيبتي كله بثوابه وان شاء الله عقبال الولادة التانية تكوني بين اهلك وحبايبك
بوسيلي الكتكوتة الحلوة وديري بالك على حالك

هدولة يسلملي الرايق ابو قلب طيب اشتقت لك كتييييييييير وفرحت بسؤالك عني يا غالية تسلميلي يا قمر
الله يتمم لك على خير يا ام عبودة ويفرحك بشوفة النونو بكامل الصحة والعافية ويهون عليك حملو وولادتو يا عسل

عبورة الامورة كيفك وشو اخبارك واخبار البيبي ولدت ولا لسا ؟ ان شاء الله تكوني بخير وعافية والله يهون عليك ويتولاك ويكرمك بكرمه
اشتقت لكلامك وحديثك الرايق الراقي ربي يكرمك بكل اللي بخاطرك

سلولة الحلوة شلونك وشلون الحمل معك ان شاء الله كلو تمام وان شاء الله استقريت وصارت اوضاعك احسن هلق
الله يكرمك ويهونها عليك ويشرح صدرك ويعينك يا عسل

دكتورتنا الحلوة هايدي كيفك شو اخبارك واخبار مهند البطل ان شاء الله تمام .
الله يكون بعونك حبيبتي ويفرجها عليك ويطول بالك ويشرح صدرك معليش حبيبتي كلو بثوابه طولي بالك وان شاء الله الغلبة الك لان المعروف مستحيل يروح هباء ,, عامليهن باصلك وطيبتك ومتل ما امر الله ورسوله وتوكلي على الله وكل ما اتدايقتي وقفي على السجادة وحاكي رب العالمين بكل اللي مدايقك وصدقيني الله مالح يخيبك يا قمر

جوري ام يزونة البطل كيفك وكيف الحلو ان شاء الله ما عم يعزبك الله يحميلك ياه يارب متل الملاك ما شاء الله لاقوة الا بالله - مبروك سنوناتو وعقبال ما تفرحي فيه وهو عريس
الله يجعله من الصالحين الراضين المرضيين ويقر عينك فيه يا غالية

ام عائشة كيفك ان شاء الله بخير وكيف الكتاكيت ان شاء الله تكوني بخير وعافية والله يحميلك ياهن ويجعلهم من الصالحين

نادو ونهال كيفكن ان شاء الله بخير وين هالغيبة عسى المانع خير ربي يكرمكن بكل اللي بخاطركن ويسعدكن سعادة الدارين

وردة اهلا وسهلا فيك يا احلى وردة سورية ربي يكرمك بالحمل السليم المعافى عاجلا غير اجل يارب ويفرجها عليك ولا يحرمك من قرب زوجك ابدا ويحل الامور على خير ويلم شملك مع اهلك وتفرحي بقرب الاهل والزوج معا
العوض بسلامتك حبيبتي بعصفورتك بس يا حبيبتي ما بيصير تتطيري وتعلقي عمرك بعمرها لان الطيرة شرك والاعمار بيد الله وعمرها هي خلص بس انت ان شاء الله الله يمد بعمرك ويديم عليك الصحة والعافية ويكرمك بسعادة الدارين ويكرمك بكل اللي تتمنيه يارب

زهورة ميت اهلين فيك بينا - يمكن انا هلق صرت الجديدة وبدي ترحيب مو انت ههههه-
ما شاء الله عليك متل الزبدية الشامي من وين ما رنيتيها بترن - بعرف انو المتل متل الزبدية الصيني بس التجربة اثبتت جدارة السوري على الكل - الله حيوووووو ههههه
ربي يكرمك بالحمل السليم المعافى عاجلا غير اجل ويعطيك كل اللي بخاطرك ويتولاك ويكرمك بكرمه
ان شاء الله ما كون نسيت حدا
الله يخليلي ياكن يا غلى اخوات بالله
بحبكن في الله هاااااااااااااااااااااااااااااااااالقد
استودعكم الرحمن

[زهرة الحب]

جوري ياعمري أنا اسفة شهيتك خلص التوبة بطلت اعيدها
رنوومة كيفك ياعمري وكيفها لولو الله يعينك الغيرة بشعة الله يقويكي وتربيهن تربية الصالحة يارب حبيبتي أنا عندي حساب على فيس بوك وأنا بعملها يابسة صحة وهنا
وردتي كيفك ياحلوة وشو اخبارك
هايدي صحة والف هنا على المجدرة والكيك معلش حبيبتي لاتزعلي طولي بالك مشان الحمل
الله يهديه ويسخرلك اه يارب
هدولتي ياعمري الملوخية بتجي خضرا وبدها غسل بتغسليها لتنضف وبعدين افتحيها بالارض لجمعة لحتى تنشف بس نشفت حطيها نشفيها مزبوط عالشمس وبعدين فركيها بتصير ناعمة متل النعناع اليابس وبتلاقي الكمالة الوصفة
http://forum.hwaml.com/t105433-10.html

حبيبتي متل ماقالتك رنوومة اذا ايكو مهبلي ماله ضرورة بلاه بأذي الجنين الله يخترلك الخير
أم ملاك وسيلا بانو تشرفت فيكي حبيبتي وأنا من حلب وعايشة بالشام
سرووءة وعبورة الشام بخير لأنو الله حاميها
مع الله الحمد الله على السلامة وأهلين فيكي حبيبتي تسلمي هاد من ذوقك يارب الله يسمع منك وأنتي خبرينا عنك وين كنتي؟ وكيف الحمل معك؟

[زهرة الحب]

[زهرة الحب]

والله عيب صلنا كل هاد بالتجمع مانضيفكن شي مابصير تفضلوا كاتو وفواكه لاتخجلوا

[زهرة الحب]

هاد بمناسبة رجعت مع الله بخير وسلامة يالله مع الله لاتخجلي قطعي وضيفينا

[silla]

يا سلاااااااااااااااااام اي شو هالاكلات يا زهورة يعطيكي الف عافية
مرحبا يا حلوات
منشان الله ماتواخذوني كتير مقصرة معكم بس نفسيتي زفت زفت زفت رجعت متل ماكانت بالثالث..
والسبب الكبير منشان ماما كتير اشتقتلا وماخرج تجي ولا باي شكل

يا بنات بدي رايكم ... بهالحالة تجي حماتي اسهل ولا اولد وجوزي يدير بالو علي شو رايكم عطوني ارائكم
يعني خايفة يصدر مني شي وتقوم حماتي تحقد علي لانو بتشيل بقلبها هي
عدا اني بدي اعمللها واااااااااااااع بدي ماما ههههههههه
شو رايكم

[سرووءة]

سلولة
حبيبتي
مابتعرفي من هون لولادتك شو بصير
لسا في 4 اشهر
ادعي ربك تفرج
وخلي املك بالله كبير
بس بدك نصيحتي احتمال اذا مااجت امك ولاانت نزلتي
خلي حماتك تجي
لان البيبي بدو حدا كبير يستلمو
لاانتي راح تعرفي ولازوجك
بس طبعا خلي زوجك جنبك
واعتمادك عليه
وكلها كم يوم وبتمرء
بس شلون حماتك بتقدر تطلع وامك لا

[سرووءة]

كيفكم بنات

هي جبتلكم صور جود

اول صورة كان عمرها يومين

هي جنب الوردة\



وهي الصورة كان عمرها 10 ايام



وهي الصورة اخر صورة من يومين\
يعني عمرها كان 24 يوم





يلا شو رايكم
^^

[أم ملاك ومالك]

السلام عليكم حبيباتي ويسعد أوقاتكن يارب

وردة كيفك وشو أخبارك ؟؟ يارب تكوني بخير طمنيني شو صار معك بالي عندك والله يارب يكون مشي الحال .. طمنيني حبيبتي ماتنسي

رنومة كيفك حبيبتي وكيف بنوتاتك ؟؟ يارب تكونوا بخير الله يخليلك هنا يارب وتفرحي فيهم .. معلش حبيبتي طولي بالك ع بنوتك بس حاولي تحسسيها أنك عم تزعلي منها بس تعملها ع حالها وهيك بتصير تحاول شوي شوي بيمشي الحال الله يفرحك فيهم يارب .. وبوساتي لبنوتاتك العسولات

جوري حبيبتي ليش مدايقة صلي ع النبي (عليه افضل الصلاة والسلام) الله يعينك يارب ويفرجها ع الجميع حبيبتي بدي قلك شي حاولي أنك تعودي يزونة ع الالعاب وهل الامور وخففي تعلقوا فيكي شوي لاني إذا الله راد وحملتي راح تتعذبي معو كتير وبالاخص بفترة الحمل بتعرفي وتعب وقصص فحاولي حبيبتي .. صدقيني بنوتي ولا كأني موجودة ههههههههههه بتلعب معي وكلشي بس اذا شافتني مشغولة بتروح بتلعب بالالعاب وهلق صرت حطلها المسبح وخليها تلعب شوي بالمي واحيانا حتى انا أو ابوها بنقعد معها بالمسبح وبنلعبها خخخخخخ لذلك حبيبتي خففي عنك شوي ياعمري ومن شآن وجع اسنانو ياقلبي عليه في دهن بالصيدلية للاسنان كتير ممتاز جربتوا مرة ببنتي والله يخليكي إلهم يارب وبوساتي ليزونة العسول ربي يحميه

بانو كيفك ؟؟ يارب تكوني بخير والله يقومك بالسلامة يارب لا تأكلي هم بعد الولادة ع الركض ورا الولاد وشغل البيت الوحدة بتصير خيال هههههههههه الله يقومك بخير وسلامة يارب

هدولة العسولة كيفك ياقلبي ؟ يارب تكوني بخير النور نورك حبيبتي .. أي والله هي ملوكتي الله يسلمك يارب (شقية ؟؟ كلمة قليلة عليها هههههههههه) الله يخليكي وتحبك العافية يارب وانتي كمان الله يقومك بخير وسلامة يارب وتفرح بالبيبي يارب أي والله حبيبتي شكلوا بس يجي بدوا يلومني كتير بحملي الاول ماكنت هيك ابدا بيعين الله الله يفرجها ع الجميع يارب

هايدي كيفك حبي وكيف هنودة ؟؟ يارب تكونوا بخير ..صحة وهنا ع الكيك والمجدرة والله اطيب شي من شوي ماما كانت عم تقلي عاملة مجدرة قلتلا كتير مشتهية عليها وجاي ع بالي .. واول امس عملت كيك بس نسيتوا بالفرن فحترق هههههههه صايرة كتير عم انسى .. حبيبتي بالنسبة لحماتك الله يسامحها يارب والله في حمايات قلبون متل الحجر الله كريم ياعمري .. بس زوجك الله يهديه يارب حبيبتي حسسيه أنك زعلانة منو بس لاتقاطعيه ولطشيه بالحكي أنك متغير او صاير عم تقسى علي وانك حبيتيه لانه حنونو ومن هل كلام ياعمري وإن شاء الله ع الولادة بس يشوف هنودة راح يتغير بإذن الله .. الله يوفقك يارب بدراستك بس شو تخصصك إذا مافي مانع .. بالتوفيق يارب

مع الله هلا حبيبتي كيفك ؟؟ يارب تكوني بخير ويخليلك ماعندك .. هلق مش عارفة شي عنك بس تشرفت بمعرفتك حبيبتي

زهرة كيفك حبيبتي يارب تكوني بخير .. شكرا" كتير ع المساعدة بالتوقيع الله يعطيكي العافية يارب وشكرا" ع الضيافة يم يم يم ما اطيبها مو متل كيكتي الي احترقت ههههههه طمنيني عنك ولا تقطعي التجمع

سيلا ياعمري كيفك ؟يارب تكوني بخير والله يقومك بخير وسلامة حبيبتي إن شاء الله بيوم وليلة تنتهي كل الاوضاع وترجع سوريا أحسن من الاول بجاه الواحد الاحد يارب معلش طولي بالك إلا ماتفرج حبيبتي لسا معك وقت وإن شاء الله بتشوفي أمك ع خير وسلامة وتحمل طفلك أول وحدة يارب معلش حبيبتي وحماتك كمان أم واكيد راح تعينك أكيد مو متل أمك بس بيعين الله والله يخليكم دايمين لبعض يارب ويفرح قلبك بشوفة أمك يا الله ياكريم

سروءة كيفك ؟ يارب تكوني بخير .. ماشاء الله وتبارك الله والله أكبر الله يحميها يارب ويخليلك هي وتكون من الصالحات والله هي آحلى من الورد ياعمري عليها آماااااااانة بوسيلي هي حبيبتي الله يخليها يارب وماشاءالله عليها الله يحميها

عبير حبيبتي كيفك ؟؟ يارب تكوني بخير .. الله يقومك بخير وسلامة يارب أنتي والبيبي وتفرحي فيه ويكون من الصالحين يا الله ياكريم يارب تكون ولادتك سهلة متل رمش العين بجاه الحبيب المصطفى طمنيني عنك حبيبتي قلبي معك

أم عائشة يارب تكوني بخير مافيني غير ادعيلك أنك تكوني بخير وطمنيني عنك وعن البيبيات يارب بجاه الحبيب المصطفى


يارب ماكون نسيت حدا سامحوني بنات اذا نسيت حدا

مع كل الود

تحياتي (^_*)