مشاكلي مع اهل الزوج

[ممنوع شباب]

السلام عليكم ورحمة الله وبركاته

مدري من وين ابتدي مشكلتي انا زواجي راح يكمل سنه .. وسكني بعيد عن اهلي

وزوجي يشتغل بخارج المنطقه الي ساكنين فيها فبايام داومه انام عند اهله لين يجي ..

ماعمري اذيتهم بشي وكل شي اسويه زين لهم ودخلت معهم بفتره مره بسيطه

واعتبرتهم اهلي وماحسستهم اني زوجة ولدهم .. كان علاقتي بزوجة اخوه مره كويسه بس زوجة اخوهم كانت تتكلم عليهم ورحت انا قلت لزوجي انه هالكلام ينقال صدق ولا لا

وقام حذرني منها وانتهينا منها قطعت علاقتي فيها ..

بعد فتره تهاوش زوجي مع اخوه وقال لاخوه انه اهلك يتكلمون من وراك ورد عليه حتى اهلك يقصدني انا وطنشت الموضوع انا ..

السالفه هذي صارلها 8 شهور .. واخته قايلة لهذي زوجة اخوهم انه فلانه هي الي متكلمه عليك تقصدني انا وانا ماعمري تكلمت عليها قدامهم يعني ماقالت انه اخوي الي هو زوجي هو الي متكلم

طنشت الموضوع انا كله ووكلت امري لربي ..

عندهم زوجه اخو ثانيه سالتني اذا انا مرتاحه عندهم او لا جاوبتها ايه مرتاحه بس في اشياء تضايقني من ناحية اللبس وكذا وخفت انها تروح توصل لاهل زوجي عكس الكلام الي قلتله

مسكت وحده من خواته وقلتلها ترى هذي السالفه لاسمح الله انقال كلام عني انتي ادرى باللي صار بيني وبينها هذا الكلام صارله 5 شهور ..

قبل اسبوع طلعوا هالسالفه طيب السالفه من زمان وانا لما قلت ماكان غرضي اخرب شي او اقطع علاقات مايحتاج كل هالاشياء الي تسوونها ..

من كثر مشاكلهم والله صرت اهرب اسافر لاهلي واقعد عندهم بالاشهر علشان اتحاشى النومه عندهم

حاولت اقول لزوجي انه ياخذني معاه رافض رفض قطعي .. طيب اقعد بالشقه ماراح يجيني شي يقولي ابوي مايرضى .. طيب الى متى هالحاله تعبت انا من هالوضع

دبرولي حل الله يعافيكم كيف اتعامل معهم ودي ترجع علاقتي معاهم رسميه وابطل اعاملهم كأهل لاني اكتشفت اهل الزوج مايتغيرون ابد ابد

وعلى فكره انا صارلي عند اهلي شهرين متعلله بحملي علشان كارهه الرجعه لهم

حطيت مشكلتي بينكم واعتبروني اخت وانصحوني باللي اقدر اسويه ..

[sweet moon]

المشكله كلها على بعضها

كلام حريم !!

يعني بالنسبه لي لااعير لكلام الحريم وسخافتهم واهتمامتهم بتوافه الامور اي اهتمام !!

الناس تتعلم وتطور وتطمح وبعض الحريم لساتهم على الكلام الفاضي وش قالت مرة فلان وايش عملت مرة علان

والسالفه قديمه يااختي مر عليها على حد اقوالك 5 اشهر

يعني لاتحسبين لها حساب خليك ارقى من هالامور وهالسواليف البطاله اللي لاتودي ولا تجيب

عليك بزوجك وبيتك وحملك لااكثر

بس مافهمت عليك بنقطه

زوجك وين يشتغل ؟؟ وانتي عندك شقه عند دوام زوجك ؟؟

وكيف تنامين عند اهله هم وين ساكنين ؟؟

واهلك وين ساكنين ؟

وليش ماتستقرين انتي وزوجك عند مكان دوامه ؟؟

كملي السالفه بتفاصيلها ..

[روز بااريس]

الحل يازوجك ينقل دوامه بمدينه اهله او انتي تروحين عنده وش دخل ابوة ليه يرفض !!!

[ممنوع شباب]

زوجك وين يشتغل ؟؟ وانتي عندك شقه عند دوام زوجك ؟؟

يشتغل بالقصيم وانا شقتي بحايل

وكيف تنامين عند اهله هم وين ساكنين ؟؟

اهله بحايل وانام عندهم لاراح زوجي القصيم لدوامه

واهلك وين ساكنين ؟

بالشرقيه

وليش ماتستقرين انتي وزوجك عند مكان دوامه ؟؟

رافض رفض قطعي اني اروح معاه حاولت كثر من مره لكن دايما تنتهي السالفه بمشكله تستمر ايام ويتهمني اني مااقدر ضروفه وماعندي تحمل ولاصبر


حاول ينقل لكن ماربي كتب يجيه نقل ..

وابوه وش دخله لانه بنظره كيف اجنبيه بعيده عن اهلها وتقعد لحالها بالشقه وتنام ومامعاها احد فاجباري اروح لهم

وياليت عندي مكان خاص لا انام مع 5 من خواته وانواع القلق غير خواتهم المتزوجات الي يجون يوميا باطفالهم

ومن ناحيه مشكلتي انها كلام حريم ادري انه كلام حريم وقيل وقال وسوالف تمر عليها سنه ويرجعونها كانها امس صارت

حياتي منعفسه والسبه اهله

يمكن تقولين المشكله بسيطه لكن والله ماهي بسيطه خصوصا لاصرتي لحالك وينقلون كلام ويواجهونك كاننا بروضه اطفال

مااقول الا الله يصبرني ويعجل بنقل زوجي

[زاهية]

عشان ترتاحين خلي علاقتك بأهل زوجك وقرايبهم علاقة رسمية جدا وبكذا تتخلصين من المشاكل ويبدون اهل زوجك يحبوك ويلتمسوا لك الاعذار


اما مسألة انه زوجك مو راضي ياخذك معه مكان دوامه ففيها شئ غامض
وليه انتي لك شهرين عند اهلك وانت متزوجه وزوجك مرتاح من ابتعادك عنه ؟؟

معناتها ان زوجك مستغني عنك ((احذري لا يكون متزوج عليك وساكن مع زوجته الثانية ومنبسط ومرتاح ))

ومافيه مره اخذك لمكان سكنه !!!!!!!

حبيبتي اعذريني ان كنت ارعبتك

ولمعلوماتك اهل القصيم يرضون ان بناتهم يتزوجن مسيار
بس هاذي وجهت نظري

[ممنوع شباب]

لما يكون بدوامه ع طول يكلمني ويتراسل معاي وعذره انه هو ماله خلق لحاله بسبب الطريق

وانا جالسه عند اهلي لانه قايلتله اني تعبانه من الحمل

ومايندرى عن الرجال مافي شي بعيد عليهم .. الله يستر ويسخره لي يارب

[روز بااريس]

طيب هالوضع مؤقت والا على طوول ؟؟

يعني لما تقومين بالسلامه بتعيشين انتي وولدك عند اهله !!

[ممنوع شباب]

والله ياروز العلم عند الله هل برضو لما اجيب بنتي بيصير نفس الوضع ولا بيتغير

لكن املي بربي كبير انه الاوضاع تتغير واستقر في شقتي بدل هالبعد الي انا فيه

دعواتكم لي بتيسير امري

[روز بااريس]

ان شاء الله

الله ييسر لك يارب

[السماح]

حبيبتى تصير الكثير من المشاكل بسبب القيل والقال
عليكى حبيبتى أن تكونى كتومة جداااا
ولو ما أعجبك شىء فيهم ما تقولى لأحد منهم
أى شىء أبدا
حتى لا يعملوا لكى مشاكل