قصة ولادتي+إبرة الظهر+مستشفى دلة

[violet-girl]

السلام عليكم ورحمة الله وبركاته


أولا أنا حبيت أحكي لكم عن قصة ولادتي مو رغبة في نشرها لا

بس حبيت تستفيدون منها


أبدأ من البداية أنا طبعا بكرية وكان الطلق عندي بدأ من الساعة 11 الظهر الجمعة


طبعا كنت أتألم قبله بأسبوع بس أصلا ما كنت أعرف وش الطلق


كان يجيني ألم ويروح وأنا أقول هذا الطلق وما يكون طلق


المهم كان موعد ولادتي السبت مو الجمعة بس اللي ساعد الطلق بسرعة يجي علاقة حميمة مع زوجي صباح الجمعة


بدأ الطلق الساعة 11 قبل الظهر وصار يقوى كل شوي عاد أنا رحت مستشفى دلة وسووا لي قياس للطلق وقالت الدكتورة لسه الطلق خفيف احتمال الولادة بالليل متأخر أو بكره


كنت بأجن بصراحة لأن الطلق مرة قوي مو زي ما تخيلت قلت أكيد هذي الدكتورة ما تفهم أبدا معقولة الطلق الحقيقي يكون أقوى من كذا .........

قعدت للساعة 2 الظهر وقاست الدكتورة الرحم قالت مفتوح 1 سم بس ارجع لما ينزل مويه أو دم


قالت امي خلاص نرجع البيت وأنا بصراحة ما حبيت ارجع من الخوف


بس أمي جزاها الله الجنة آآآآآآمين ساعدتني ولولا الله ثم هي كان تعذبت


قالت أمي الطلق بيعذبك إذا الرحم ما انفتح بتطولين لما تولدين لكن أنا أعرف وش اللي بيفتح الرحم تعالي نرجع........

رجعنا وخذت أمي فحم ولعت عليه وبعدين قالت لي احط عليه كمون واتبخر

رحت تبخرت يمكن بس 3 دقايق وحسيت بشي ينزل مني وصار دم


المهم رحت طوالي للمستشفى وكنت ميتة من الألم الطلق كان قوي مرة مرة وكنت اصيح وزوجي يسرع 140 من الخوف

وكنت أحط قربة وأحس بالدفئ وارتاح ..

المهم بعد ما تبخرت بالكمون قالت الدكتورة انفتح الرحم 4 سم وبعد شوي 7 سم طبعا بفضل الله انفتح الرحم ثم بفضل أمي والكمون


اتصلت على دكتورتي طبعا هي من برا المستشفى بس تولد في دلة


بس الله يسامحها اعتذرت وقالت ما تقدر تجي بصراحة انصدمت تركتني في أصعب موقف في حياتي ما أقول إلا الله يسامحها


ودخلت قسم الولادة وكانت الغرفة باردة طلبت منهم يسكروا المكيف وكمان أمي طلبت لحاف ثاني ودفتني وقالت لازم تدفين علشان تسهل ولادتك


وانا اتعذب من الطلق كنت افكر واقول كيف بأكمل حياتي مع زوجي أنا مستحيل احمل مرة ثانية مستحيل اولد مرة ثانية كيف اجيب طفل ثاني لا استحالة اكرر هذا التجربة



المهم من كثر الألم طلبت ابرة الظهر مع إني كنت خايفة موت منها بس والله ما عاد قدرت اتحمل مع إني صبورة كثير على الألم بس ما قدرت


راح زوجي طلب الابره وجاء الدكتور يعطيني إبرة الظهر..

أنا من الخوف صار جسمي كله يرجف والدكتور يصرخ علي يقول لازم اثبت علشان يقدر يسوي الإبرة

طبعا ما قدرت قعدت أرجف كأنهم حطوني في فريزر وبعدين الدكتور مسك يدي وكان يقول لي ادعي الله واذكري الله واقرأي قرآن

والحمد لله ذكرت الله وارتحت وبدأ يسوي لي الإبرة في ظهري ما توجع أبدا أبدا

بعد شوي حسيت بتخدير في الجزء الأسفل من جسمي ولا عاد حسيت بالطلق أبدا أبدا

مع إن الطلق مستمر وأنا أشوف الجهاز حق قياس الطلق يشتغل وسألت الدكتورة المناوبة قالت لي


أنتي ما تحسين بالطلق لأنك أخذتي الإبرة


المهم أنا طلبت الدكتورة ممتازة اللي بمستشفى دلة علشان تولدني بدل دكتورتي اللي تركتني


طبعا الولادة الطبيعية عندهم ب4800 وإذا طلبتي دكتورة معينة زيادة 500 ريال

المهم جت الدكتورة المناوبة واسمها أماني وقالت لي بتولدني هي بس أنا رفضت تولدني وأصريت

إن الدكتورة ممتازة هي اللي تولدني


عاد هي انقهرت كثير كثير وراحت جابت ورقة وقالت وقعي على طلبك

ومن قهرها انقلبت علي بعد ما كانت تعاملني بحنية لأن أمي عطتها 300 أول ما دخلت غرفة الولادة علشان تهتهم فيني أكثر لكن بعد ما طلبت ممتازة غيرت معاملتها معي ومع امي بتكبر

ولما صارت أمي تسألها متى بأولد صارت تصرخ وتقول هذي بكرية وش تتوقعين أكيد بتطول ويمكن ما تولد إلا بكره

المهم الله ينتقم منها وش سوت من مصايب لي

صار نبض الجنين منخفض وشفت النبض صار لونه أحمر في الجهاز طلبت اكسجين والحقيرة طبعا الله لا يسامحها حطت بس الكمامة على فمي ولا فتحت الاكسجين ولا شي ولا حتى قالت لي أعدل وضعي على جنب علشان يرتفع النبض بس تتفرج وتضحك مع الممرضة

وبصراحة ما انتبهت إنها ما فتحت الاكسجين على بالي صار مفتوح


وبعدين من حقارتها قامت راحت وقالت لزوجي ما في أمل أولد طبيعي بتسوي لي قيصري


مع إن الرحم صار مفتوح 8 سم


المهم أثناء كلامها مع زوجي جت الدكتورة ممتازة


وفعلا يا ناااااااااااس اسم على مسمى ممتااااااااازة


أول ما دخلت ناظرت الجهاز وصرخت وقالت افتحوا الاكسجين بسرعة


وقالت اسحبي هواء علشان الجنين وصارت تطمني وتبوسني


وساعدتني والله يا بنات خلال خمس دقائق بس انفتح الرحم 10 سم وقالت يالله غرفة الولادة


رحت غرفة الودلاة وبصراحة كنت ميتة خوف ليش؟


لأني كنت أسمع صراخ اللي تولد صراخ غير طبيعي يعني يمكن سمعت صراخ أكثر من 10 والدات قبلي


والله شيء يفجع مرة مرة مرة


بس أنا كان الألم عندي مختفي تماما بسبب إبرة الظهر


دخلت الغرفة وكان الطلق يجيني بس أنا ما أحس بس الدكتورة كل ما يجي الطلق تقول ادفعي


وأنا أدفع إلى أن ولدت والحمد لله


طلعت النونو حبيبي وحطته على صدري وبعدين الممرضات بشروا أمي وزوجي بسلامتي وسلامة النونو


بعد كذا رحت لغرفتي وبصراحة تعامل المستشفى والممرضات والخدمات في دلة لا يعلى عليه وأنصح كل واحدة تفكر تولد ما تروح إلى لمستشفى دلة


وبالنسبة للدكتورة المصرية المناوبة أماني سويت فيها شكوى طويلة عريضة والله أعلم وش صار معها بس اتصلوا علي اليوم وقالوا بيسووا معها تحقيق

هذي قصتي مع الولادة

واستفيدوا منها توكلوا على الله لا يخليكم الخوف يشل تفكيركم بعدين تتعسر الولادة

ثاني شي أنصحكم بإبره الظهر والله إني لو ما سويت إبرة الظهر كانت جتني عقدة نفسية طول حياتي من ألم الولادة

إبرة الظهر تخليكي ما تحسين بالطلق وتقدرين تدفعين ولحظة خروج الرأس ما تحسين بألم يا الله كيف كانوا الحريم يصرخوا وقت الولادة كأنهم يتقطوا تقطيع

صحيح إنها غالية يمكن بألف وستمائة بس والله الواحدة لو تجمعها من الشهر الأول في الحمل ولا تتعذب عذاب ما أدري كيف أوصفه

ثالث شي إذا جاك الطلق تبخري بالكمون والله انفتح الرحم من 1 سم ل 7 سم في غضون دقايق بس

رابع شي أمي قالت أنا أعرف ليش أول كانت الولادة أسهل من الآن حتى ما كانوا يوسعون لهم ولا خياطة ولا صراخ

السبب الرئيسي هو البراد

نعم المكيفات باردة والغرف باردة لما العضلات والأعصاب تبرد ويصير الطلق مؤلم والرحم ما ينفتح والدفع يكون صعب على الواحدة

علشان كذا امي خلت الممرضة تطفي المكيف ودفتني كثير باللحاف

قالت أمي زمان كانت اللي تولد يدفوها كثير ويحطون جنبها فحم والع ويحطون على بطنها مناشف حارة علشان تولد بسهولة وما تطول إلا ربع ساعة وتكون والدة بدون عذاب والرحم ينفتح بدون توسيع يطلع النونو بسرعة

رابع شي أنصحكم في مستشفى دلة والله قمة الاهتمام والنظافة والراحة والحمد لله



أما قصتي مع النفاس في أشياء ضروري تسوونها وتستفيدون منها

لأن كل هالمعلومات أخذتها من أمي وجدتي الله يجزاهم عني خير

أول شيء لا تشربين أي شيء بارد أبدا أبدا مهما صار ولا تكثرين من شرب الموية أنا كثرت لأني كنت أحس بعطش شديد بس ضريت ابني وصار يستفرغ ولما خففت الموية رجعت له صحته


ثاني شيء كنت أحس إن ظهري مفتوح نصين بعد الولادة وأحس بألم شديد تحت يعني العصعوص آخر فقرة في العمود الفقري ما عاد أقدر أقوم وأجلس

وحتى رجولي وجسمي كله مفكك تفكيك


بس والله يا بنات استخدمت زيت الخردل الأصلي ( مو التقليد ) لأن التقليد منتشر في العطارات وهذا الزيت من برا المملكة شريته من وحده

المهم كل يوم ادهن جسمي فيه أنا والنونو

صار جسمي ما شاء الله لا قوة إلا بالله ولا شيء فيه يألمني وصرت أحس بقوة والله قمت اشتغل وانظف البيت ومالي إلا 6 أيام

وحتى ابني والله كل يوم ادهنه واحس جسمه يفتح ويقوى وكل شيء من آثار الولادة يروح

وهذي وصية اسمعوها مني والله لا تتركون الزيت هذا أبدا النفاس وغير النفاس والنونو والأطفال كلهم يفيد بشكل خيالي والله يقوي الجسم ويشده شد


ثالث شي وأهم شي الدفا الدفا الدفا

تدفي حتى لو الجو حاااااااار موووت تدفي لأن الدفا هو العلاااااج والله كانت أمي تدفيني بالبطانية واصرخ أقول والله حر مووووووت ما اتحمل


والعرق يتصبب مني زي الحنفية المفتوحة وتقول أمي هذا العرق هو اللي بيطلع كل البلا اللي فيك وهو العافية وفعلا والله شفت العافية بعد ما تدفيت


رابع شي لاااااااازم يكون البر وجبة رئيسية في فطورك وغداك يعني ضروري تأكلين معصوب بالبر في الصبح وجريش في الغداء أو أي أكله داخل فيها البر


لأن البر غذاء رئيسي للوالدة إذا استغنت عنه تخسر كثير من صحتها


خامسا دااااااومي على شرب القهوة علشان يتنظف الرحم ويدر الحليب ولا تتدلعين تندمين والله


سادسا إياني وإياك ما تلبسين سروال طويل وثقيل طول النفاس حتى لو الجو قمة الصيف لازم تحافظين على نفسك ولا تجلسين قدام المكيف أبدا أبدا تضرين نفسك ورحمك ما يرجع لمكانه مثل ما قالت أمي


سابعا تبخري كل يوم بمره بس من اليوم الخامس مو من أول يوم علشان الخياطة ما تشد معك ونصيحة أخوية بالنسبة للخياطة


اغسلي المنطقة بالغسول الطبي ونشفيها على طول بالمناديل وحطي كريم ميبو ولا تستعمل غيره مهما وصفت لك الطبيبة أو غيرها والله تلتئم الخياطة بسرعة والغرز ما تنفك ولا تحسين بألمها وتبخري قبل ما تحطيه بالمره



جربي طريقتي مع الخياطة والله بتدعين لي




الله يسهل على كل والدة ويكون بعونها ياااااااارب


منقول للفائده
ادعوا لصاحبة الموضوع الله يجزاها الف خير
انا مقتنعه تماما بابرة الظهرة
الله يهون علينا يااااااارب

__________________

[احاسيس انثى]

الف الف الف الف الف مبروووك حيااتي ..

[عذبوك ياقلبي]

يسلموووو ياعمري

[~*جْ ــوَلىْ*~]

مشكورة على النقل

وربي يسهل علينا وانا ما افكر بإبرة الظهر نهائي

تعب ساعة ولا كل ساعة

[violet-girl]

احاسيس انثى
الموضوع منقول حبيبتي
عقبالي يااارب

عذبوك ياقلبي
الله يسلمك حبيبتي


~*جْ ــوَلىْ*~
حبيبتي اختي لها 4 سنوات ماخذذتها وماشاء الله عاادي
اهم شي عند دكتور شااطر- وهي نفس الشي ولدت في دله

[violet-girl]

up>>>>>>>>

[طبيبة القلوب]

الله يجزاها خير اللي كتبت الموضوع واللي نقلته ....
لكن عندي كم سؤال اتمنى اللي عندها خبرة ترد علي....

بالنسبة لكمون ...لازم اجهزه يكون حب ؟؟؟ ولا بودرة وارميه فوق الفحم ؟
تاني شي انا راح اولد بعز الشتاء .؟.. ايش تنصحوني وانا اصلا من النوع اللي ما اتحمل الشتاء ايش اسوي؟؟؟


تالت شي !!! اذا الموية ما اكتر منها من ايش اشرب وقت ما اعطش؟؟


ياريت تشاعدوني انا بكرية وراح اولد لوحدي

[violet-girl]

طبيبة القلوب
مشكوره اختي

الله يعينك حبيبتي ويهون عليك حملك وولادتك يااارب

ان شاء الله البنات يفيدونك
انا حامل باول بيبي

[كآدي]

الف شكر لك يا عسسل

[ام حتوم]

الف الف مبروك ياقلبي
والله يجزاك خير ع النصايح