خوف شديد على الجنين

[غيوم المطر]

السلام عليكم ورحمة الله وبركاته
بنات انا عندي مشكلة
انا مهووسه بجنيني واخاف عليه بشكل جنوني.. كل اسبوعين اروح اسوي تصوير واذا طولت وماسويت تصوير تصيبني حاله اقعد ابكي وماانام واصير مكتئبه واصير اتهاوش مع زوجي عشان يوديني
عشان اصور سونار...
مع اني كل اسبوعين اسوي تصوير.. ومستمرة الحاله معي ...
البارح مانمت غير الفجر وانا نايمه كان الجنين يتحرك ولما قمت الساعه 7 الصبح رحت لاختي عشان تروح تختبر وانا اقعد عند عيالها ماقدرت انام وماحسيت بحركة الجنين والساعه 10 دقيت على زوجي وطلبت انه يودني اكشف رفض وقعدت ابكي لحد ما وافق وطلع من دوامه ورحنا للمستوصف وكشفت علي دكتورة اول مرة اراجع عندها ...
سالتني متى سويتي تصوير اخر مرة علمها زوجي انه الاسبوع اللي راح وقال لها اني كل اسبوعين اصور سونار المهم الدكتوره قعدت تهزء فيني ....انقهرت انا عارفه ان خوفي مبالغ فيه بس مو قادرة احس ان ممكن يصير فيني شي اذا صار لجنيني شي ....وش الحل علموني كيف اتخلص من وساوسي وخوفي
انا بالشهر الخامس وماقد طحت او حسيت بالالام وهذا اول حمل لي ساعدوني كيف اتخلص من خوفي.

[الديماس]

توكلي على الله اولا واخيرا ثم استودعيه ربك اللذي لا تضيع عنده الودائع
حاولي تشغلي نفسك شوي بالقراءة بالزيارات بترتب بيتك بس لا تتعبين نفسك
خليك واثقة بالله سبحانه وعلى فكرة ترى هذا شي طبيعي لما حملت حملي الاول كنت مثلك بس لا شفتيه وشفتي الازعاج وحملتي ثاني مرة راح تختفي هالحاله

[Fuoonkh]

اول شي اذكري الله
واذا جاك هالوسواس استغفري الله
ترررى والله الشيطان يوسوس فيييك حبيبتي لا تسوين كذا بنفسك !!
انا كنت زيك بدايةة حملي لكن لاني كنت تعبانه صدق ,
لان اجهضت قبل ثم جاني طلق مبكر ثم التهاب بالمسالك البوليـه وصديد في البول وكل هالالتهاب يسبب طلق مبكر فـ كنت اتعب من الالام ,
وكنت دايم اروح المستشفى على الم وتعب عشان كذا يسوون لي سونار او يسمعوني النبض ,,

حبيبتي لاتصيرين كذا ترى والله مو زين لنفسيتك ولا زين حق البيبي !!
خلاص تكفيك حركه منه لو وحده باليوم ترى احيانا يكونون كسولين ولا فيهم يتحركون واحيانا نشيطين انا زيك كنت اخاف بس مو ابكي عشان اسوي , كنت ابكي من الالم ,
وكنت اخاف يصير فيه شي بس خلاص الحين تعودت حتى اذا وصلتي السابع والثامن ترى نفس الحكايه يوم حركه كويسه يوم حركاته شويه ,
لاتصيرين موسوسه وتعوذي من ابليس
ترى نفسيتك تأثر في البيبي ودايم اذا بكيتي كثير وعصبتي كثير ترى يكون زيك عصبي وبس يبكي !!
احمدي ربك ماتحسين باألم او بأي شي عشان توسوسين فـ تطمني
وترى مو حلو كل اسبوعين رايحه تسوين سونار ممكن كثرته تضر !

وخلاص بلا وسواس , قولي بنفسك دايم انو لو حركه وحده تكفيني بس المهم احس فيييك وانت في بطني ,
:) واستودعيه الله وتوكلي على الله
ومو زين تتعلقين كذا لان لو لا سمح الله بسم الله عليك الرحمن الرحيم لو ماتم حملك وش بتسوين !! بتنهارين !!
خلاص وكلي امرك على الله واللي ربي كاتبه بيصير ,
قولي لو رحت اسوي مليون سونار وهو مو بخير ربي ماراح يخليه بخير الا بأمر من عنده وربي يطمني عليه مو السونار وربي بيحفظه لي وخلي ثقتك بالله قويه
وان شاء الله ياررررب ماتشوفين الا كل خيرررر وخلاص ترى حتى زوجك والله يطفش منك
والحين بس ساكت لكن مو كل شوي بيمشيها اخرتها بيقول صيحي لين تقولين امين منيب موديك انتي موسوسه
ولو جاء يوم لا سمح الله وحسيتي بشيء صدق وقلتي له ودني بيقول انتي موسوسه ولا راح اوديك

فـ توكلي على الله , وثقي بالله , ولا تثقين بالمستشفيات ووالله ماوراهم الا الهم وكثرةة السونار بتجيب لك الوسواس وكل شوي دكتوره بتطلع في حملك شيء
خلاصصصص لاتوسوسين


واسفه طولت عليك بالكلام حبيبتي ~,
بالتوفيق الله يقر عينك بشوفته سليم معافى بين يديك ,

[طبعي شيوخي]

توكلي على الله حبيبتي واللي الله كاتبه بتاخذينه
وان شاء الله بتشوفينه بحضنج وبتشبعين منه وبتفرحين فيه
الله يسهل عليج يارب .


أختج: طبعي شيوخي

[احلى من العسل]

وكلي ربك وهوكفيل ان يحفض لك جنينك لاالمستشفى ولاالسونار يقدرون يسوون لك شي توكلي على الله وحصني جنينك كل صباح ومساء وماراح يصيرله شي وزي ماقالت الاخت موزين كل شوي تاذين زوجك وتطلعينه من عمله راح يطفش ولوجات ساعه الجد وحسيتي بتعب حقيقي ماراح يصدقك كلنى نخاف على حملنى بس نوكل الله والي ربنا كاتبه بيصير غصب عنا مانقدر نغيربالقضاء والقدر ولسى انتي توك باول شهورك والمشوارقدامك طويل لازم تتحملي وتصبري وعلى فكره ترى التوتر والقلق يئثرعلى الجنين بعدين يطلع ولدك متقلب المزاج ويتعبك لازم اثنا حملك تبتعدين عن التفكير وتريحين نفسيتك
الله يوفقك

[غرام الوجدان]

والله يا قلبي انا مثلك دايما خايفه على البيبي واحس ان لو جهاز السونار ينشرى من السوق كنت شريته وخليته على بطني طووووووووووول الوقت وودي كل اسبوع اسوي سووووونار حتى فكرت اشتري جهاز النبض من مذركير يمكن تخف الحاله عندي .... وطبعا هذي الحاله عندي بسبب الحمل السابق والمشكله اللي مريت فيها ويبقى التوكل على الله افضل حل لان مهما عملتي مارا يصير الا اللي كاتبه ربي

[بعد روحي]

عندنا وعندك خير ياغناتي
كأنك تتكلمين عني هع
الله يقومنا بالسلامه ويحفظ اجنتنا يااااااااااااااااااارب